ގޯތި މައްސަލަ: ހިޔާނާތްވި މީހުންނަށް އަވަސް އަދަބުދޭން ޓްރާންސްޕޭރެންސީން ގޮވާލައިފި
ރައްޔިތުންގެ ހައްގު ގެއްލޭ ފަދަ ހިޔާނާތާއި ކޮރަޕްޝަނުގެ މައްސަލަތައް މިނިވަންކަމާއި ފުރިހަމަކަމާއި ހާމަކަން ބޮޑު ގޮތެއްގައިި ތަހުގީގުކޮށް، އާންމުންގެ އިތުބާރު ދެމެހެއްޓުމަށް ޖިނާއީ އިޖުރާތްތައް ދަމަހައްޓައި، ހިޔާނާތްތެރިވެފައިވާ ފަރާތްތަކާ މެދު އަވަސް ގޮތެއްގައި ގާނޫނީ އިމުގެ ތެރެއިން ހައްގު އަދަބު ދޭން ޓްރާންސްޕޭރެންސީ މޯލްޑިވްސްއިން ގޮވާލައިފި އެވެ.
މާލޭ ރަށްވެހިންނަށް ގޯތި ދިނުމަށް ހިންގި "ބިންވެރިޔާ" ސްކީމުގެ ދަށުން ގޯތި ނުލިބޭ ބަޔަކަށް، ގަވާއިދާ ހިލާފަށް ހައުސިން ޑިވޮލޮޕްމެންޓް ކޯޕަރޭޝަން (އެޗްޑީސީ) އިން ހުޅުމާލެއިން ގޯތިތަކެއް ދިން މައްސަލަ ފެންމަތިވެ، އެ މައްސަލައިގެ ޖިނާއީ ތަހުގީގެއް މިހާރު ވަނީ ފަށާފަ އެވެ.
އެކަމާ ގުޅިގެން ޓްރާންސްޕޭރެންސީން ރޭ ނެރުނު ބަޔާނުގައި ބުނީ ދައުލަތުގެ އިސް މަގާމުތަކުގައި ތިބޭ ފަރާތްތަކުގެ މެދުގައި މަސްލަހަތު ފުށުއެރުމުގެ މައްސަލަަތަކަކީ ކޮރަޕްޝަންގެ މައްސަލަތަކުގައި ވަރަށް އާންމުކޮށް ފާހަގަވާ ކަމެއް ކަމަށެވެ. ވުމާ އެކު މަސްލަހަތު ފުށުއަރާ ފަދަ މައްސަލަތައް ހައްލުކުރަން ހަރުދަނާ ނިޒާމެއް ގާއިމު ކުރެވިފައި ހުރުމަކީ މުހިންމު ކަމެއް ކަމަށެވެ.
އެޗްޑީސީގެ މެނޭޖިން ޑިރެކްޓަރުގެ ބޭބެއަށް ގޯތި ލިބުމުގެ ޝަރުތު ފުރިހަމަ ނުވާއިރު، ގޯތި ދޫކޮށްފައިވާ ކަމަށް ބުނެ ކޮށްފައިވާ ތުހުމަތާ އަދި ގަވާއިދާ ހިލާފަށް 50 އަށް ވުރެ ގިނަ ގޯތި ދޫކޮށްފައިވާ ކަމަށް ތުހުމަތުކުރާ ރިޕޯޓުތަކަކީ ރައްޔިތުންގެ މެދުގައި ކަންބޮޑުވުން އުފެދި ސުވާލު އުފެދޭ ކަމެއް ކަމަށް ބަޔާނުގައިވެ އެވެ.
އަދި އެއީ ރައްޔިތުން ދައުލަތާއި އަދި މުއައްސަސާތަކަށް ކުރާ އިތުބާރު ކުޑަވެ، ދައުލަތުގެ އިންސާފުވެރިކަމާއި ހާމަކަމާއި ސަރުކާރުގެ މުއައްސަސާތަކުގެ ނަޒާހަތްތެރިކަމާ މެދު ސުވާލު އުފެދޭ ކަމެއް ކަމަށެވެ.
ޓްރާންސްޕޭރެންސީން ވަނީ ރައްޔިތުންގެ އިތުބާރު ދައުލަތަށް ހޯދުމަށާއި ކޮރަޕްޝަނަށް ހުށަހެޅޭ ގޮތަށް ހުރި ނިޒާމީ ގޮންޖެހުންތަކަށް ހައްލު ގެނައުމަށް މައިގަނޑު 7 ފިޔަވަޅެއް އެޅުމަށް ސަރުކާރަށް ގޮވާލާފަ އެވެ. އެއީ؛
- ގިނަ އަދަދެއްގެ ރައްޔިތުންގެ ހައްގު ގެއްލޭ ފަދަ ހިޔާނާތާއި ކޮރަޕްޝަނުގެ މައްސަލަތައް އަވަސް ގޮތެއްގައި މިނިވަންކަމާއި ފުރިހަމަކަމާއި ހާމަކަން ބޮޑު ގޮތެއްގައިި ތަހުގީގުކޮށް، އާންމުންގެ އިތުބާރު ދެމެހެއްޓުމަށް ޖިނާއީ އިޖުރާތްތައް ދަމަހައްޓައި، ހިޔާނާތްތެރިވެފައިވާ ފަރާތްތަކާ މެދު އަވަސް ގޮތެއްގައި ގާނޫނީ އިމުގެ ތެރެއިން ހައްގު އަދަބު ދެވުން
- މުއައްސަސާތަކާއި ކުންފުނިތަކުން ކޮރަޕްޝަނާއި ބާރުގެ ބޭނުން ނަހަމައިން ހިފުން ހުއްޓުވަން ހަރުދަނާ ފިޔަވަޅުތަކެއް އަޅައި ވިސްލްބްލޯކުރާ ފަރާތްތައް ރައްކާތެރިކުރާ ނިޒާމް ހަރުދަނާ ކުރުމަށް މަސައްކަތް ކުރުމާއި މިނިވަން އޮޑިޓުތައް ކުރުން
- ހާމަކަން ބޮޑު ހެޔޮ ހިންގުމުގެ ނިޒާމެއް ބިނާކުރުމަށް، އަދި ބާރުގެ ބޭނުން ނަހަމަ ގޮތުގައި ބޭނުންކުރުން ހުއްޓުވަން މުއައްސަސާތަކުންނާއި ކުންފުނިތަކުގައި މަސްލަހަތު ފުށުއެރުމާ ގުޅުންހުރި ސިޔާސަތުތައް ތައާރަފުކޮށް ތަންފީޒުކުރުން
- ސިޔާސީ މަގާމުތަކުގައި ތިބޭ މީހުންނާއި ކުންފުނިތަކުގެ ބޯޑު މެންބަރުންނަށް އެކަށީގެންވާ ޑިއު ޑިލިޖެންސް އަދި ވެއިޓިން ޕްރޮސެސްއަކާ އެކު މެރިޓް ބޭސްޑް، ހާމަކަން ބޮޑު އުސޫލެއްގެ ދަށުން މަގާމަށް އައްޔަންކުރުމާ އަދި ސިޔާސީ މަގާމުތަކުގައި ތިބޭ ފަރާތްތަކުގެ މައުލޫމާތުތައް އާންމުކުރުން
- ނުހައްގު މުއްސަނދިކަން ހުއްޓުވަން ގާނޫނީ އޮނިގަނޑު، ވަކި ގާނޫނެއްގެ ގޮތުގައި ތަސްދީގުކޮށް ތަންފީޒުކުރުން
- އިސްވެރިންގެ މައްޗަށް ކުރެވޭ ކޮރަޕްޝަނުގެ ތުހުމަތުތައް ތަހުގީގުކޮށް ފިޔަވަޅު އެޅޭނެ ހާމަކަން ބޮޑު، އެކަށީގެންވާ މިންވަރަށް ރައްޔިތުންނަށް އިތުބާރު ލިބޭނެ ނިޒާމެއް އެކުލަވާލާ ތަންފީޒުކުރުން
- ކޮރަޕްޝަނާ ދެކޮޅަށް ކުރާ މަސައްކަތް ހަރުދަނާކުރަން ޝަރުއީ ނިޒާމުގެ ތެރެއިން މުއައްސަސާތަކުގެ މިނިވަންކަން ދަމަހައްޓައި، ގާނޫނު ތަންފީޒުކުރާ އިދާރާތައް، ވަކިވަކި ފަރުދުން ޖަވާބުދާރީ ކުރުވަން ބާރުވެރިކުރުވުން
ޓްރާންސްޕޭރެންސީން ވަނީ ކޮރަޕްޝަން ނައްތާލުމުގައި ސަރުކާރުގެ ގާބިލުކަމާ މެދު ރައްޔިތުންގެ އިތުބާރު އިތުރުވާނީ އަމިއްލަ މަންފާއަށް ދައުލަތުގެ ވަސީލަތްތައް ނަހަމަ ގޮތުގައި ބޭނުންކުރާ ފަރާތްތަކާ މެދު އަޅަން ޖެހޭ ފިޔަވަޅުތައް އަޅައި، ދައުލަތުގެ ހިންގުމުގެ ނިޒާމުގެ ހާމަކަމަށް އަހައްމިއްޔަތުކަން ދިނުމުންކަން ވެސް ފާހަގަކޮށްފަ އެވެ.
މީހަކު ޚިޔާނާތް ވެއްޖެ ތަ ؟؟؟؟؟؟