ރަޖުނީ މަސައްކަތުން އެކަހެރިކޮށްފި

އެޗްޑީސީގެ ގޯތީގެ ވައްކަމުގެ މައްސަލަ ތަހުގީގުކުރާ ފުލުހުންގެ އިކޮނޮމިކް ކްރައިމް ޑިޕާޓްމަންޓްގެ ވެރިޔާ ސުޕްރިންޑެންޓް އޮފް ޕޮލިސް ރަޖުނީ ޝުއައިބު ވަގުތީ ގޮތުން މަސައްކަތުން އެކަހެރިކޮށްފި އެވެ.
މާލޭ ރަށްވެހިންނަށް ގޯތި ދިނުމަށް ހިންގި "ބިންވެރިޔާ" ސްކީމުގެ ދަށުން ގޯތި ނުލިބޭ ބަޔަކަށް، ގަވާއިދާ ހިލާފަށް އެޗްޑީސީން ހުޅުމާލެއިން ގޯތިތަކެއް ދިން މައްސަލަ ފެންމަތިވެ، އެ މައްސަލައިގެ ޖިނާއީ ތަހުގީގެއް މިހާރު ވަނީ ފަށާފަ އެވެ. ފުލުހުން ބަލަނީ ޑޮކިއުމެންޓުތަކެއް ފޯޖުކުރި މައްސަލަ އެވެ.
ރަޖުނީ އާއި އޭނާގެ އަންހެނުންނަށް ނުހައްގުން ފްލެޓް ލިބުނު ކަމަށް ބުނެ، ސޯޝަލް މީޑިއާގައި ދައުރުވަމުންދެ އެވެ. އެ ޕޯސްޓްތަކުގައި ބުނާގޮތުން ރަޖުނީއާއި އޭނާގެ އަންހެނުންނަށް ފްލެޓް ލިބުނީ، ވިނަރެސް ފްލެޓްތަކުންނެވެ.
ރަޖުނީއަށް ފްލެޓް ލިބުނީ ކިހިނެއްތޯ ބެލުމުގެ މަސައްކަތް ފުލުހުން ބަލަމުންދާއިރު ފުލުހުންގެ ތަރުޖަމާނު އަހުމަދު ޝިފާން ވިދާޅުވީ ރަޖުނީ ސަސްޕެންޑްކުރީ އިކޮނޮމިކް ކްރައިމް އިންވެސްޓިގޭޝަންސް ގައި މިވަގުތު ކުރަމުންގެންދާ ބިންވެރިޔާ އަދި ގެދޮރުވެރިޔާ ސްކީމާގުޅޭ ތަހުގީގުގެ ކްރެޑިބިލިޓީ ހިފެހެއްޓުމާއި އެ ތަހުގީގަށް އެއްވެސް ކަމަކުން ނުރަނގަޅު އަސަރެއް ނުފޯރާނެކަން ޔަގީންކުރުމަށްޓަކައި ކަމަށެވެ.
"އަދި މި ނިންމުމަކީ އެސްޕީ ރަޖުނީ ޝުއައިބާ ގުޅޭގޮތުން މި ހިދުމަތުން ޔަގީންކުރަމުންދާ ކަންކަމުގައި، އެ ފަރާތުން އެއްވެސް ނުރަނގަޅު އަމަލެއް ހިންގާފައިވާކަން މިހާތަނަށް ފާހަގަކުރެވިގެން ނިންމި ނިންމުމެއް ނޫންކަމުގައިވެސް ދަންނަވަމެވެ" ޝިފާން ވިދާޅުވި އެވެ.މިދިޔަ ސަރުކާރުން ވިނަރެސް ފްލެޓްތައް ދޫކޮށްފައިވަނީ ދެ ގޮތަކަށެވެ. އެއްގޮތަކަށް އެ ފްލެޓްތައް ދިނީ އިއުލާނު ކޮށްގެން ކުރިމަތިލީ މީހުންގެ ތެރެއިން ޝަރުތު ހަމަވާ ފަރާތްތަކަށެވެ. ބާކީ ނުދެވި ހުރި 123 ވިނަރެސް ފްލެޓް ދޫކޮށްފައިވަނީ މި ސަރުކާރުންނެވެ. ދެން އެ ފްލެޓްތައްދިނީ ސީލައިފް ކުންފުނީގެ ސަބަބުން ފްލެޓް ނުލިބި ތިބި މީހުންގެ ތެރެއިން ސިވިލް ކޯޓުން ކުރި ހުކުމްގައި ކަނޑައަޅާފައިވާ މީހުންނަށެވެ. ވިނަރެސް ފްލެޓަށް ޝަރުތު ހަމަވެ، އެ ފްލެޓް ލިބޭ މީހުންގެ ނަންނަތައް އެޗްޑީސީން އާއްމު ވެސް ކުރި އެވެ. އާއްމު ފަރާތްތަކުން ކަންބޮޑުވުން ފާޅުކޮށް، ސޯޝަލް މީޑިއާގައި ކުރަމުންދާ ޕޯސްޓްތަކުގައި ބުނީ ރަޖުނީ އާއި އޭނާގެ އަންހެނުންގެ ނަން އެއިން އެއްވެސް ލިސްޓެއްގައި ހިމެނިފައިނުވާ ކަމަށެވެ. ރަޖުނީ އާއި އޭނާގެ އަންހެނުންނަށް ނުހައްގުން ފްލެޓެއް ލިބުންކަން މިހާތަނަށް ކަށަވަރު ކުރެވިފައެއް ނުވެ އެވެ. 'ދެން' އަށް ވަނީ ފްލެޓަށް އެދި ހުށަހެޅުނު ލިޔުމާއި، ރަޖުނީއަށް ފްލެޓް ލިބުނުކަން އަންގައިދޭ ލިޔުން ލިބިފަ އެވެ. މައުލޫމާތު ލިބިފައިވާ ގޮތުން ރަޖުނީ ވިނަރެސް ފްލެޓަށް އެދި ފޯމު ހުށަހަޅާފައިވަނީ 2021 ވަނަ އަހަރުގެ ސެޕްޓެމްބަރު މަހުގެ 28 ވަނަ ދުވަހު އެވެ. އަދި އޭނާ ފްލެޓަށް އެދި ހުށަހަޅާފައިވަނީ، އޭނާ އަންހެނުންނާއެކު ދިރިއުޅޭ ގޮތަށް، ކޯ-އެޕްލިކަންޓް ފޯމެކެވެ.



.jpg)
.jpeg)

ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.