ގޯތި މައްސަލައިގައި މުޒާހަރާކޮށްފި
މާލޭ ރަށްވެހިންނަށް ގޯތި ދިނުމަށް ހިންގި "ބިންވެރިޔާ" ސްކީމުގެ ދަށުން ގޯތި ނުލިބޭ ބަޔަކަށް، ގަވާއިދާ ހިލާފަށް އެޗްޑީސީން ހުޅުމާލެއިން ގޯތިތަކެއް ދިން މައްސަލައިގައި، ސަރުކާރުގެ އިސްވެރިން އިސްތިއުފާ ދިނުމަށް ގޮވާލާ މުޒާހަރާކޮށްފި އެވެ.
އުސޫލާ ހިލާފަށް ބިމާއި ފްލެޓް ދިން މައްސަލަ ފެންމަތިވެ، ފުލުހުން ވަނީ އެ މައްސަލައިގެ ޖިނާއީ ތަހުގީގެއް ފަށާފަ އެވެ. ފުލުހުން ބަލަނީ ޑޮކިއުމެންޓުތަކެއް ފޯޖުކުރި މައްސަލަ އެވެ.
އެ މައްސަލަ ފެންމަތިވެ، އެންމެ ބޮޑަށް ތުހުމަތުތައް އަމާޒުވި އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ރޭ ވަނީ އިސްތިއުފާ ދެއްވާފަ އެވެ. އޭނާ ވަނީ ތުހުމަތުތަކަށް އިންކާރު ކުރައްވާފަ އެވެ.
އެ މަގާމުން އިސްތިއުފާ ދެއްވީ ބިންވެރިޔާ ސްކީމް އާ ގުޅިގެން މިހާރު ކުރިއަށްދާ ތަހުގީގަށް ފުރުސަތު ދިނުމަށާއި ކުންފުންޏާއި ސަރުކާރުގެ ސިޔާސަތުތައް ނުހުއްޓި ކުރިއަށް ގެންދިއުމުގެ ފުރުސަތު ދިނުމުގެ ގޮތުން ކަމަށް އިސްތިއުފާގެ ސިޓީގައި ފަޒުލް ވިދާޅުވި އެވެ.
އެޗްޑީސީގެ ގޯތި ވައްކަމުގެ މައްސަލަ ތަހުގީގުކުރާ ފުލުހުންގެ އިކޮނޮމިކް ކްރައިމް ޑިޕާޓްމަންޓްގެ ވެރިޔާ، ރަޖްނީ ޝުއައިބާއި އޭނާގެ އަންހެނުންނަށް ނުހައްގުން ފްލެޓް ލިބުނު ކަމަށް ބުނެ، ސޯޝަލް މީޑިއާގައި ދައުރުވަމުންދާ ޕޯސްޓްތަކާ ގުޅިގެން ފުލުހުން ވަނީ މައްސަލަ ބަލަން ފަށާފަ އެވެ.
އެކަމާ ގުޅިގެން ފުލުހުންގެ ތަރުޖަމާނު އަހުމަދު ޝިފާން ވިދާޅުވީ ރަޖުނީ ސަސްޕެންޑްކުރީ އިކޮނޮމިކް ކްރައިމް އިންވެސްޓިގޭޝަންސްގައި މިވަގުތު ކުރަމުން ގެންދާ ބިންވެރިޔާ އަދި ގެދޮރުވެރިޔާ ސްކީމާ ގުޅޭ ތަހުގީގުގެ ކްރެޑިބިލިޓީ ހިފެހެއްޓުމާއި އެ ތަހުގީގަށް އެއްވެސް ކަމަކުން ނުރަނގަޅު އަސަރެއް ނުފޯރާނެކަން ޔަގީން ކުރުމަށް ޓަކައި ކަމަށެވެ.
މިއަދު ދަރުބާރުގެ ސަރަހައްދުގައި ކުރިއަށް ގެންދިޔަ މުޒާހަރާގައި އެންމެން އެއް އަޑަކުން ގޮވީ، ރަޖްނީ އިސްތިއުފާ ދިނުމަށެވެ. އަދި ރަޖްނީ އާއި ފަޒުލް ހައްޔަރު ކުރުމަށެވެ. ހައުސިން މިނިސްޓަރު ޑރ. އަލީ ހައިދަރު އަހުމަދު ފިލީ ކަމަށާއި، ސަރުކާރުގެ އިސް މަގާމުތަކުގައި ތިބި ބޭފުޅުންނަށް އަމާޒުކޮށް އެއީ "ގޯތި ވަގުން" ކަމަށް މުޒާހަރާގެ ބައިވެރިން ގޮވަމުން ދިޔަ އެވެ.
"ރައްޔިތުންގެ ބިންތައް ވަގަށް ނެގީ. ފްލެޓްތަކުގައި ވާނުވާ ނޭންގިގެންދާއިރު އަޅުގަނޑުމެންނަށް އިނގޭ ފްލެޓްތައް ވެސް ވަކި އިންސާފުވެރި ގޮތަކަށް ނުދޭނެކަން. މިއުޅެނީ ހައްގުވެރިންނަށް ދޭށޭ ކިޔަސް، އެހެން އެކަން ނުކުރާނެ ކަމުގެ ވަރަށް ބޮޑެތި ހެކިތަކެއް ފެނިގެން ގޮސްފި،" މުޒާހަރާގެ ބައިވެރިއަކު ބުންޏެވެ.
ގޯތި މައްސަލައަކީ ވަރަށް ބޮޑު "ޖަރީމާ" އެއް ކަމަށާއި، އެ ތުހުމަތުތައް ކުރެވޭ ފަރާތްތަކުން ހަމައެކަނި އިސްތިއުފާ ދިނަސް ނުފުދޭ ކަމަށް މުޒާހަރާގެ ބައިވެރިން ބުންޏެވެ. މުޒާހަރާގައި ގޮވާލާފައިވަނީ ގޯތި މައްސަލައާ ގުޅުންހުރި ފަރާތްތައް ހައްޔަރު ކުރާށެވެ.
"ހިތާމައަކީ ރާއްޖޭގެ ރައްޔިތުން އިންސާފު ހޯދަން މިއަދު ދާނެ ތަނެއް ނެތީމަ. އެންމެ މަތިން ފެށިގެން އެންމެ ތިރިޔާ ހަމައަށް މިކަމުގައި ބައިވެރިވެފައި މި ތިބެނީ،" މުޒާހަރާގެ ބައިވެރިއަކު ބުންޏެވެ.
މުޒާހަރާތައް ކުރިއަށް ގެންދަން ނިންމާފައިވަނީ ސިލްސިލާކޮށް، ކޮންމެ އާދިއްތަ އަދި އަންގާރަ ދުވަހެއްގަ އެވެ. މުޒާހަރާ ކުރިއަށް ދާނީ ހެނދުނު 9:00 އިން ފެށިގެން 11:00 އަށް ކަމަށް އެ މީހުން ބުންޏެވެ.
