އީސީ އަށް މެންބަރުން އައްޔަންކުރަން ދައުރުން ބޭރު ޖަލްސާއެއް ބާއްވަނީ
އިލެކްޝަން ކޮމިޝަން (އީސީ) އަށް ދެ މެންބަރަކު އައްޔަންކުރަން ދައުރުން ބޭރު ޖަލްސާއެއް ބޭއްވުމުގެ މަސައްކަތް ފަށާފައިވާ ކަމަށް މާފުށި ދާއިރާގެ މެންބަރު ހުސައިން ރިޒާ އާދަމް މިއަދު ވިދާޅުވެއްޖެ އެވެ.
މިނިވަން މުއައްސަސާތަކުގެ ކޮމިޓީގެ މުގައްރިރުކަންވެސް ކުރައްވާ ރިޒާ އެހެން ވިދާޅުވީ މިއަދު ކުރިއަށް ދިޔަ ކޮމިޓީ ބައްދަލުވުމުގަ އެވެ. އެ ކޮމިޓީގައި ކުރިއަށް ދިޔައީ އީސީ އަށް ދެ މެންބަރުން އައްޔަންކުރަން ރައީސް ޑރ މުހައްމަދު މުއިއްޒު ފޮނުއްވާފައިވާ ބޭފުޅުންނާ އިންޓަވިއު ކުރުމެވެ.
އެ ދެ މަގާމަށް އައްޔަންކުރަން ރައީސް ފޮނުވީ ހިއުމަން ރައިޓްސް ކޮމިޝަން (އެޗްއާރުސީއެމް) ގެ ކުރީގެ ނައިބު ރައީސް, މުހައްމަދު ޒާހިދާއި ހޯމްލޭންޑް މިނިސްޓްރީގެ ކުރީގެ ޕާމަނަންޓް ސެކްރެޓަރީ އަބްދުއްރަހްމާން ސަލާހު ރަޝީދުގެ ނަމެވެ.
އިންޓަވިއު ނިންމާލަމުން އިތުރު ސުވާލެއް އޮތްތޯ ކޮމިޓީން ޒާހިދު ގާތު އެހެމުން އޭނާ ވިދާޅުވީ އީސީގެ މެންބަރުކަމުގެ މަގާމު ހުސްވާތާ 60 ދުވަހުގެ ތެރޭގައި އެ މަގާމަށް މެންބަރަކު އައްޔަންކުރަން ޖެހޭ ކަމަށް ގާނޫނު ގައި ބުނާ ކަމަށެވެ. ނަމަވެސް މަޖިލީސް މިހާރު ރިސެސްގައި އޮތުމުން 60 ދުވަސް ހަމަވާނީ ރިސެސްގެ މުއްދަތުގައިކަން އޭނާ ފާހަގަކުރި އެވެ.
އެހެންވެ ޒާހިދު އެދިވަޑައިގެންނެވީ ކޮމިޓީން އެކަމަށް ރިއާޔަތް ކުރުމަށެވެ. ޒާހިދުގެ ސުވާލަށް ޖަވާބު ދެއްވަމުން ރިޒާ ވިދާޅުވީ ގާނޫނީ ހުސްކަމަކަށް ދިޔުމުގެ ފުރުސަތު ނުލިބޭނެހެން، މުއްދަތު ހަމަވުމުގެ ކުރިން މަޖިލީހުގެ ޖަލްސާއެއް ބާއްވަން އެދިވަޑައިގަންނަވާނެ ކަމަށެވެ.
"އެ މުއްދަތު ހަމަވުމުގެ ކުރިން ދައުރުން ބޭރުން މި ދެންނެވި ބައްދަލުވުމެއް ބާއްވާނަން ޖަލްސާއެއް ފާސްކުރުމަށްޓަކައި, މުއްދަތު ހަމަވިއަކަ ނުއެއް ދޭނަން"
ޖަލްސާ ބާއްވާނެ ސީދާ ތާރީހެއް ރިޒާ ވިދާޅެއް ނުވެ އެވެ.
މަޖިލީހުގެ ގަވާއިދު ބުނާ ގޮތުން މަޖިލީހުގެ ތިން ވަނަ ދައުރަކީ އޮކްޓޯބަރު 1 އިން ފެށިގެން ނޮވެބަރު ނިޔަލަށެވެ. ނަމަވެސް ނިންމަން ޖެހޭ މުހިއްމު މަސައްކަތްތަކެއް ހުރުމުން ދައުރު އިތުރުކޮށް, އެ ދައުރު ނިންމާލީ މި މަހުގެ 12 ވަނަ ދުވަހު އެވެ.
ދެން މަޖިލީސް ހުޅުވޭނީ ފެބްރުއަރީ 1 ވަނަ ދުވަހު އެވެ. އެއީ ފުރަތަމަ ދައުރު ކަމަށްވާއިރު އެ ދައުރު ނިމޭނީ މޭ މަހުގެ 15 ވަނަ ދުވަހު އެވެ. އަދި ދެ ވަނަ ދައުރަކީ ޖޫން 1 އިން ފެށިގެން އޮގަސްޓް 15 އަށެވެ.
Ads by STO
