ތަހުގީގަށް އެއްބާރުލުން ދިނުމަށް ހައިދަރު މުވައްޒަފުން ގާތު އެދިއްޖެ
"ބިންވެރިޔާ" ސްކީމުގެ ދަށުން ގޯތި ނުލިބޭ ބަޔަކަށް، ގަވާއިދާ ހިލާފަށް ގޯތިތަކެއް ދިން މައްސަލަ ފެންމަތިވެ، ކުރަމުން އަންނަ ޖިނާއީ ތަހުގީގަށް އެއްބާރުލުން ދިނުމަށް ކިބައިން ހައުސިން، ލޭންޑް އެންޑް އާބަން ޑިވެލޮޕްމަންޓް މިނިސްޓަރު ޑރ. އަލީ ހައިދަރު އަހްމަދު އެ މިނިސްޓްރީގެ މުވައްޒަފުންގެ ކިބައިން އެދިވަޑައިގެންފި އެވެ.
މާލޭ ރަށްވެހިންނަށް ގޯތި ދިނުމަށް ހިންގި "ބިންވެރިޔާ" ސްކީމުގެ ދަށުން ގޯތި ނުލިބޭ ބަޔަކަށް، ގަވާއިދާ ހިލާފަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހުޅުމާލެއިން ގޯތިތަކެއް ދިން މައްސަލަ ފެންމަތިވެ އެ މައްސަލައިގެ ޖިނާއީ ތަހުގީގެއް ފުލުހުން ވަނީ ފަށާފަ އެވެ. ފުލުހުން ބަލަނީ ޑޮކިއުމެންޓުތަކެއް ފޯޖުކުރި މައްސަލަ އެވެ.
މައްސަލަ އާ ގުޅިގެން ހައުސިން މިނިސްޓްރީން ޑެޕިއުޓީ މިނިސްޓަރުންނާއި ސީނިއާ ޕޮލިޓިކަލް ޑިރެކްޓަރުން ހިމެނޭހެން 9 މުވައްޒަފުން ވަނީ ސަސްޕެންޑްކޮށްފަ އެވެ. "ދެން" އަށް މައުލޫމާތު ލިބިފައިވާ ގޮތުން އެ މީހުން ސަސްޕެންޑްކުރީ މިދިޔަ ހަފުތާގެ ބުރާސްފަތި ދުވަހުގެ ރަސްމީ ގަޑި ނިމުނު ފަހުންނެވެ. އެ މުވައްޒަފުން ސަސްޕެންޑްކުރި ސަބަބު ބަޔާންކޮށްފައެެއް ނުވެ އެވެ.
އެ މުވައްޒަފުން ސަސްޕެންޑްކުރީ މުސާރަ ނުހިނގާ ގޮތަށް ކަމަށާ އެ މީހުން އަދިވެސް ތިބީ ސަސްޕެންޝަނުގައި ކަމަށް މައުލޫމާތު ލިބެ އެވެ.
"ބިންވެރިޔާ" ސްކީމާ ގުޅިގެން ފުލުހުން ކުރަމުން އަންނަ ތަހުގީގަށް އެއްބާރުލުން ދިނުމަށް ހައުސިން މިނިސްޓަރު އެދިވަޑައިގެންފައި ވަނީ މުވައްޒަފުންނަށް މިއަދު ފޮނުއްވި އިންޓާނަލް މެމޯއެއްގަ އެވެ.
އެކަމާ ގުޅޭގޮތުން ހައިދަރު "ދެން" އަށް ވިދާޅުވީ އެ މެމޯއަކީ ކޮންމެހެން ނެރެން ޖެހިގެން ނެރުނު މެމޯއެއް ކަމަށެވެ. އެ މެމޯ ނެރެފައި ވަނީ ފުލުހުންގެ ތަހުގީގަށް އެއްބާރުލުން ދިނުމަށް އެދި ކަމަށް ފާހަގަކުރެއްވި އެވެ.
ޝަރުތު ހަމަނުވިޔަސް ގޯތި ދޫކުރި މީހުންގެ ތެރޭގައި އެޗްޑީސީގެ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ ބޭބެ އަދި މާލެ ވޯޓަ އެންޑް ސްވަރޭޖް ކޮމްޕެނީ (އެމްޑަބްލިއުއެސްސީ) ގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދާއި އެހެން މީހަކު ހިމެނޭ މައްސަަލައެއް އެންމެ ފުރަތަމަ ފެންމަތިވީ ސޯޝަލް މީޑިއާއިންނެވެ.
މައްސަލަ އާ ގުޅިގެން މިދިޔަ ބުރާސްފަތި ދުވަހު ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ވަނީ ފުލުހުން ކުރިއަށްގެންދާ ތަހުގީގަށް ޖާގަދީ ފުރިހަމަ އެހީތެރިކަން ދިނުމުގެ ގޮތުން، އެ ތަހުގީގު ނިމި އެ ބޯޑުން ވަކި ގޮތެއް އަންގަންދެން އެ ކުންފުނީގެ ޗެއާމަން އަހްމަދު ނާސިފު ފިޔަވާ އެޗްޑީސީގެ ޑިރެކްޓަރުންގެ ބޯޑުގެ ހުރިހާ މެމްބަރުން ސަސްޕެންޑްކޮށްފަ އެވެ.
އެޗްޑީސީގެ ބޯޑު މެމްބަރުންނާ އެކު އެ ކުންފުނީގެ މެނޭޖިން ޑިރެކްޓަރު ކަމުގެ މަގާމުގައި ހުންނެވި ފަޒުލް ވެސް ވަކި ގޮތެއް އަންގަންދެން އޮފީހަށް ނުނިކުމެވޭ ގޮތަށް ޕީސީބީން ސަސްޕެންޑްކުރި އެވެ. އެހެންނަމަވެސް މިދިޔަ ހޮނިހިރު ދުވަހު ފަޒުލް ވަނީ މެނޭޖިން ޑިރެކްޓަރުގެ މަގާމުން އިސްތިއުފާ ދެއްވާފަ އެވެ.
ޕީސީބީން އިއްޔެ ވަނީ އެޗްޑީސީގެ ޑިރެކްޓަރުންގެ ބޯޑުގެ މެމްބަރުން ސަސްޕެންޑް ކުރުމަށް ނިންމި ނިންމުން ނިމުމަކަށް ގެނެސްފައިވާކަން ހާމަކޮށްފަ އެވެ.
"ބިންވެރިޔާ" ސްކީމުގެ ދަށުން ގޯތި ނުލިބޭ ބަޔަކަށް ގަވާއިދާ ހިލާފަށް ގޯތިތަކެއް ދިން މައްސަލަ އާ ގުޅިގެން ފަޒުލް އާއި ފަޒީލްގެ އިތުރުން އެމްޑީޕީ ސަރުކާރުގެ ހައުސިން މިނިސްޓްރީގެ ކުރީގެ ބައެއް ވެރިން ހިމެނޭހެން ޖުމްލަ 20 މީހެއްގެ ޕާސްޕޯޓު މިދިޔަ ހުކުރު ދުވަހު ވަނީ ހިފަހައްޓާފަ އެވެ.
