ބަންގްލަދޭޝް ސަރުކާރުން ނޫސްވެރިންގެ ސެކްރެޓޭރިއެޓަށް ވަދެނިކުމެ އުޅުމުގެ ބަދަލުތަކެއް ގެނެސްފި
ބަންގްލަދޭޝްގެ ސަރުކާރުން ނޫސްވެރިންނަށް ސެކްރެޓޭރިއެޓަށް ވަދެނިކުމެ އުޅުމަށް އިތުރު ބަދަލުތަކެއް ގެނެސްފި އެވެ.
މިނިސްޓްރީ އޮފް ޕަބްލިކް އެޑްމިނިސްޓްރޭޝަނުން ނެރުނު ސާކިއުލާއެއްގައި ބުނީ މި ބަދަލާއެކު ދެން ނޫސްވެރިންނަށް ސެކްރެޓޭރިއެޓަށް ވަދެވޭނީ ހަމައެކަނި ޕްރެސް ކޮންފަރެންސްތަކަށާއި، ބްރީފިންގްތަކަށާއި އަދި އެހެނިހެން ރަސްމީ ހަރަކާތްތަކަށް އެކަނި ކަމަށެވެ.
ނޫސްވެރިންނަށް ސެކްރެޓޭރިއެޓުގެ އެކި ފަންގިފިލާތަކަށް ވަދެވޭނީ ކަމާބެހޭ އޮފީސްތަކުގެ ހުއްދަ ލިބިގެން ކަމަށްވެސް އެ ސާކިއުލާގައި ފާހަގަކޮށްފައި ވެއެވެ.
މި ނިންމުމާ ގުޅިގެން ބަންގްލަދޭޝްގެ ނޫސްވެރިންގެ މެދުގައި ކަންބޮޑުވުން ފާޅުކޮށްފައިވެ އެވެ. ގިނަ ނޫސްވެރިން ދެކޭގޮތުގައި މިއީ ނޫސްވެރިކަމުގެ މިނިވަންކަމަށް އެޅޭ ހުރަހެކެވެ. އަދި މިކަމުގެ ސަބަބުން މައުލޫމާތު ހޯދުމަށް ދަތިތަކެއް ކުރިމަތިވާނެ ކަމަށްވެސް އެ ނޫސްވެރިން ބުންޏެވެ.
މިކަމާ ގުޅިގެން ސަރުކާރުން ބުނީ މި ފިޔަވަޅުތައް އަޅާފައިވަނީ ސެކްރެޓޭރިއެޓުގެ ސަލާމަތީ ކަންކަން ހަރުދަނާކުރުމަށްޓަކައި ކަމަށެވެ. އަދި މިއީ ނޫސްވެރިކަމުގެ މިނިވަންކަން ހަނިކުރުމަށް އެޅޭ ފިޔަވަޅެއް ނޫން ކަމަށް ސަރުކާރުން ބުންޏެވެ.
މި ނިންމުން ތަންފީޒުކުރަން ފަށާނެ ވަކި ތާރީހެއް އިއުލާންކޮށްފައެއް ނުވެއެވެ.
Ads by STO
