ހުޅުމީދޫން ބަޔަކު ބޭލީ އޮންނަ އުސޫލާ އެއްގޮތަށް : ފުލުހުން
ހެލްތު ޕްރޮޓެކްޝަން އޭޖެންސީ (އެޗްޕީއޭ) ގެ އުސޫލާ ޚިލާފަށް ފުލުހުންގެ ލޯންޗެއްގައި ބަޔަކު ހުޅުމީދޫން ބޭލިކަމަށް ދެކެވޭ ވާހަކަ ފުލުހުން ދޮގު ކޮށްފިއެވެ.
ފުލުހުންގެ މީޑިއާ އޮފިޝަލަކު "ދެން" އަށް މައުލޫމާތު ދެއްވަމުން ވިދާޅުވީ، އެޗްޕީއޭގެ އުސޫލާ ޚިލާފަށް ފުލުހުންގެ ލޯންޗެއްގައި ބަޔަކު ހުޅުމީދޫން ބޭލި ކަމަށް ދެކެވޭ ވާހަކަތަކަކީ ރަނގަޅު ވާހަކަތަކެއް ނޫން ކަމަށެވެ.
"އެއީ ރަނގަޅު މައުލޫމާތެއް ނޫން. އެބުނާ ލޯންޗެއްގައި ބާލާފައި ވަނީ އޮންނަ އުސޫލުތަކުގެ ތެރެއިން، ކައުންސިލުން ހުއްދަ ދީފަ ތިބި ބަޔަކު" ފުލުހުން ވިދާޅުވިއެވެ.
ފުލުހުން ވިދާޅުވީ، ހުއްދަ ދެއްވީ ކައުންސިލުން ކަމަށާއި ހުއްދަ ދެއްވީ ކޮން ގޮތަކަށްތޯ ސާފުކުރަން ޖެހޭނީ ކައުންސިލުން ކަމަށެވެ.
"މޮނީޓަރިންގައި އޮންނައިރު ފައިބާކަށް އަޅުގަނޑުމެންނަކަށް ހުއްދައެއް ނުދެވޭނެ. ކައުންސިލުން ބަލާ ހަމަތަކަކަށް ބަލާފައި ހުއްދަ ދޫކުރަނީ" އޮފިޝަލު ވިދާޅުވިއެވެ.
ރާއްޖޭގެ ރަށްތަކުގެ ތެރެއިން މިހާރު، ކޮވިޑް-19 އެންމެ ހަލުވިކަމާ އެކު ފެތުރެމުން އަންނަ އެއް ރަށަކީ ހުޅުމީދޫ ކަމަށްވުމާއެކު ކޮންޓެކްޓް ޓްރޭސިން ހެދުމަށްޓަކައި އެޗްޕީއޭއިން ވަނީ އެ ރަށަށް އަރައި ފޭބުން މަނާކޮށްފައެވެ.
އޮންލައިން ނޫހަކުން ބުނެފައި ވަނީ އެ ރަށުގައި މަސައްކަތް ކުރާ ފުލުހަކު، އޭނާގެ އަނބިމީހާ ފުލުހުންގެ ލޯންޗެއްގައި ހުޅުމީދޫން ބޭލުމަށް ފަހު. ސ. ހިތަދޫ އަށް ގެންގޮސްފައިވާ ކަމަށް އެނޫހަށް މައުލޫމާތު ލިބިފައިވާ ކަމަށެވެ.
