ހައިވޭގައި 3 ސައިކަލު ޖެހި އެކްސިޑެންޓުވެ، 5 މީހަކަށް އަނިޔާވެއްޖެ
ސިނަމާލެ ބްރިޖު ހައިވޭގައި މާލެއިން ހުޅުމާލެ އަށް ދަތުރުކުރާ ފަޅީގައި ރޭ 3 ސައިކަލު ޖެހި އެކްސިޑެންޓެއް ހިނގައި 5 މީހަކަށް އަނިޔާވެއްޖެ އެވެ.
ފުލުހުންގެ މީޑިއާ އޮފިޝަލް މިއަދު ވިދާޅުވީ ރޭ 12:11 ހާއިރު އެ އެކްސިޑެންޓް ރިޕޯޓް ކޮށްފައިވާ ކަމަށާއި، އެކްސިޑެންޓް ހިނގަން މެދުވެރިވީ ސައިކަލެއް އޯވަޓޭކް ކުރަން އުޅުމުގެ ތެރޭގައި ދެ ސައިކަލު ޖެހި އެކްސިޑެންޓުވެ، ފަހަތުން އައި އެހެން ސައިކަލެއް ޖެހިގެން ކަމަށެވެ.
ފުލުހުން ބުނީ، އެކްސިޑެންޓުގައި އަނިޔާވި 5 މީހުންގެ ތެރެއިން 4 މީހަކަށް ފަރުވާދިނުމަށް ފަހު ރޭ ދޫކޮށްލާފައިވާ ކަމަށެވެ. އަނެއް މީހާއަށް ޓްރީޓޮޕް ހޮސްޕިޓަލުގައި ފަރުވާދެމުންދާއިރު އެ މީހާގެ ހާލު ސީރިއަސް ނޫން ކަމަށް ޑޮކްޓަރުންނާ ހަވާލާދީ ފުލުހުން ބުންޏެވެ.
އެ އެކްސިޑެންޓުގައި ގަވައިދާ ހިލާފަށް ދުއްވި ސައިކަލު ޓޯކޮށް، މައްސަލަ ތަހުގީގުކުރަމުންދާ ކަމަށް ފުލުހުން ބުންޏެވެ.
ބްރިޖުގައި ހިނގާ އެކްސިޑެންޓުތައް އަނެއްކާވެސް މި ވަނީ އިތުުރުވާން ފަށާފަ އެވެ. އެކްސިޑެންޓުތައް މަދުކުރަން ފުލުހުން މަސައްކަތްވެސް އެބަކުރެ އެވެ.
