ގޯތި މައްސަލަ: 9 މީހެއްގެ ޕާސްޕޯޓް ދޫކޮށްލައިފި

ބިންވެރިޔާ ސްކީމުގެ ދަށުން ގޯތި ނުލިބޭ ބަޔަކަށް ގޯތި ދޫކުރި މައްސަލާގައި ރާއްޖެއިން ފުރުން މަނާކުރި 9 މީހެއްގެ ޕާސްޕޯޓް ދޫކޮށްލައިފި އެވެ.

Ads by STELCO

ފުލުހުން ތަހުގީގުކުރަމުންދާ ލިޔުންތަކެއް ފޯޖުކުރި މައްސަލައާ ގުޅިގެން މިދިޔަ ސަރުކާރުގެ ހައުސިން މިނިސްްޓްރީގެ އިސްވެރިން ހިމެނޭ ގޮތަށް 20 މީހަކުގެ ޕާސްޕޯޓް އޮތީ ހިފަހައްޓާފަ އެވެ.

އެ މައްސަލައިގެ އަޕްޑޭޓް ހިއްސާކުރަމުން ފުލުހުން މިއަދު ބުނީ އޭގެ ތެރެއިން 9 މީހެއްގެ މައްޗަށް ނެރެފައިވާ އަމުރު ބާތިލުކޮށްފައިވަނީ ޕްރޮސެކިއުޓާ ޖެނެރަލް (ޕީޖީ) އާ މަޝްވަރާކޮށް, ޕީޖީގެ ލަފާގެ މަތިން ކަމަށެވެ. އެ މީހުންގެ ނަންތަކެއް ފުލުުހުން ހާމައެއް ނުކުރެ އެވެ.

ފުލުހުން ބުނީ، އަމުރު ބާތިލްކުރި މީހުންގެ ތެރޭގައި އެޗްޑީސީގެ ކުރީގެ އެމްޑީ އިބްރާހިމް ފަޒުލް ރަޝީދު އާއި އޭނާގެ ބޭބެ އަދި އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދު ނުހިމެނޭ ކަމަށެވެ.

ސޯޝަލް މީޑިއާއިން އާންމުވި ލިޔުންތަކުން އެނގޭ ގޮތުން ގޯތި ލިބުނު ކަމަށް ބުނާ ފަޒުލްގެ ބޭބެއާއި އެހެން މީހަކު ވަނީ ވަށާފާރު ރޭނުމުގެ ހުއްދައަށް އެދި އެޗްޑީސީގެ ޕޯޓަލްއަށް ހުށަހަޅާފަ އެވެ. އެހެންވެ އެ ދެ މީހުންނަށް ގޯތި ލިބިފައިވާކަން ކަށަވަރުކުރުމަށް އެޗްޑީސީން ހައުސިން މިނިސްޓްރީއަށް ސިޓީއެއް އޮތީ ފޮނުވާފަ އެވެ.

ނަމަވެސް ހައުސިން މިނިސްޓްރީން ޖަވާބުގައި، އެޗްޑީސީއަށް ފޮނުވި ސިޓީގައި ބުނީ ބިންވެރިޔާގެ ސްކީމުން އެ ދެ މީހުން ގޯއްޗަށް އެޕްލައިވެސް ނުކުރާ ކަމަށާއި އަދި އެ ދެ މީހުންނަށް ގޯތި ދޫވެސްކޮށްފައި ނުވާ ކަމަށެވެ.

ބޭބެ ފޯޖު ލިޔުމެއް ހުށަހެޅި މައްސަލައިގައި އޭނާގެ ދައުރެއް ނެތް ކަމަށް ފަޒުލް މީގެ ކުރިން ވިދާޅުވެފައިވެ އެވެ. ފަޒީލަށް ގޯތީގެ ލިޔުން ދީފައިވަނީ ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީން ކަމަށް ފުލުހުން ވަނީ ބުނެފަ އެވެ.

ނަމަވެސް އުސޫލުން ބޭރުން އެއްވެސް މީހަކަށް އެއްވެސް ލިޔުމެއް ދީފައިނުވާ ކަމަށް އަކްރަމް ވިދާޅުވެފައިވެ އެވެ.