ޕާކިސްތާނުގެ އައިއެސްއައި ބަންގްލަދޭޝްގައި އަލުން ހަރަކާތްތެރިވަނީ
ޕާކިސްތާނުގެ އިންޓަ ސާވިސަސް އިންޓެލިޖެންސް (އައިއެސްއައި) އިން ބަންގްލަދޭޝްގައި އަލުން ހަރަކާތްތެރިވާކަމަށް ންޑިއާ.ކޮމްއިން ޝާއިރުކޮށްފައިވާ ރިޕޯޓެއްގައި ބުނެފި އެވެ.
އެ ރިޕޯޓުގައި ބުނީ އައިއެސްއައި ހަރަކާތްތެރިވަނީ ކޮކްސް ބަޒާރު ސަރަހައްދުގައި ހުރި ރޮހިންގިޔާ ކޭމްޕްތަކުގައި ތިބި މިލިޓަންޓުންނަށް ހަތިޔާރު ފޯރުކޮށްދީ، އަލަށް ރެކްރޫޓްކުރެވޭ މީހުންނަށް ތަމްރީނު ދިނުމަށް ކަމަށެވެ.
ރިޕޯޓުގައި ބުނީ މި މައުލޫމާތު ހާމަކޮށްފައިވަނީ ބަންގްލަދޭޝްގެ ސަލާމަތީ ބާރުތަކުން ކުރި ތަހްގީގަކަށްފަހު ކަމަށެވެ. ނަމަވެސް، މި މައުލޫމާތު ސީދާ ކޮން ފަރާތަކުން ލިބުނުކަމެއް ސާފުކޮށް ބަޔާންކޮށްފައެއް ނުވެ އެވެ.
މީގެ އިތުރުން ބުނީ މި ހަރަކާތްތައް ހިންގަމުންދަނީ އަރަކާން ރޮހިންގިޔާ ސަލްވޭޝަން އާމީ (އާރްސާ) އާއި ގުޅިގެން ކަމަށެވެ. އާރްސާ އަކީ ރޮހިންގިޔާ މުސްލިމުންގެ ހައްގުތަކަށް ވަކާލާތުކުރާ ކަމަށް ބުނާ ޖަމާއަތެކެވެ.
މި ކަމާ ގުޅޭ ގޮތުން ޕާކިސްތާނުގެ ސަރުކާރުން އަދި އެއްވެސް ބަޔާނެއް ނެރެފައެއް ނުވެ އެވެ. އަދި ބަންގްލަދޭޝްގެ ސަރުކާރުންވެސް މި ކަމާ ގުޅޭ ގޮތުން ރަސްމީކޮށް އެއްވެސް އެއްޗެއް ބުނެފައެއް ނުވެ އެވެ.
މިއީ ސަރަހައްދުގެ ސަލާމަތާއި ރައްކާތެރިކަމަށް ނުރައްކަލެއް ކަމަށްވެސް ރިޕޯޓުގައި ފާހަގަކޮށްފައި ވެއެވެ. އަދި މިފަދަ ހަރަކާތްތަކުން އިތުރު ހަމަނުޖެހުންތަކަކަށް މަގުފަހިވެދާނެ ކަމަށްވެސް ބުނެފައިވެ އެވެ.
