މޫސުން ގޯސްވެ ހާލުގައި ޖެހުނު ބަޔަކަށް އެހީތެރިކަން ފޯރުކޮށްދީފި
ފ. ފީއަލިން އެ އަތޮޅު ދިގުވަރަށް ދަތުރުގޮސް އުޅުނު ބަޔަކު ހާލުގައި ޖެހުމާ ގުޅިގެން އެ މީހުން އަނބުރާ ގެނައުމުގައި ރަށު ކައުންސިލާއި ޕޮލިސް ޕޯސްޓާ އަދި އެމްޓީސީސީގެ މުވައްޒަފުން އެހީތެރިކަން ފޯރުކޮށްދީފި އެވެ.
ހާލުގައި ޖެހުނީ އިއްޔެ މެންދުރުފަހުގެ ވަގުތެއްގައި ފީއަލިން ދިގުވަރަށް ދަތުރު ގޮސް އުޅުނު ބައެކެވެ. ފީއަލި ޕޮލިސް ޕޯސްޓަށް ބަޔަކު ހާލުގައި ޖެހިފައިވާ ކަމުގެ މައުލޫމާތު ލިބުމާ ގުޅިގެން އެ މީހުންނަށް އެހީތެރިކަން ފޯރުކޮށްދިނުމުގައި ފުލުހުންނާ އެކު ހަރަކާތްތެރިވެފައި ވަނީ ފީއަލީ ކައުންސިލާއި އެމްޓީސީސީ ފެރީގައި މަސައްކަތްކުރާ މުވައްޒަފުންނެވެ.
ކަމާ ގުޅޭ މައުލޫމާތު ހިއްސާކުރައްވަމުން ފީއަލި ކައުންސިލުގެ އޮފިޝަލަކު "ދެން" އަށް ވިދާޅުވީ އެ މީހުން ދަތުރު ދިޔައީ ކުޑަ ޑިންގީއެއްގައި ކަމަށެވެ. ރަށަށް ނާދެވިފައި ތިބި ކަމުގެ މައުލޫމާތު ލިބުނީ ރޭ އިޝާ ވަގުތުގައި ކަމަށެވެ. ފަޅު ރަށަށް ދަތުރުކުރީ ދެ ގްރޫޕަކަށް ބަހާލައިގެން ކަމަށާއި ފުރަތަމަ ގްރޫޕުގައި ހިމެނޭ މީހުން އިރުއޮއްސުމުގެ ކުރިން ފީއައްޔަށް އައި ކަމަށެވެ.
"އަނެއް ގްރޫޕް ފަރުމަތީ ތިއްބައި ބަލައި މި ދިޔައީ. ފަރު ވަރަށް ބޮޑަށް ހިކުނީމާ، އަނދިރިވެ، ވާރޭ ބޯކަމުން ވާނުވާ ނުއެނގިފައި ތިބީ،" އޭނާ ވިދާޅުވި އެވެ.
އޮފިޝަލް ވިދާޅުވި ގޮތުގައި ޑިންގީގައި ތިބި މީހުންނާ ހިސާބަށް ދެވުނީ ގާތްގަނޑަކަށް 8:30 ހާއިރު ކަމަށާއި 9:00 ޖެހުމުގެ ކުރިން އެ މީހުން ރަށަށް ގެނެސްފައިވާ ކަމުގަ އެވެ.
ޑިންގީ ފުންކުރީ ފުލުހުންގެ ޓީމުން ފަރުމައްޗަށް ފައިބައިގެން ކަމަށާއި އެ މީހުން ފީއައްޔަށް ގެނައީ ފެރީގައި ކަމަށް ވިދާޅުވި އެވެ. އޭގެ ތެރޭގައި ހިމެނެނީ ޑިންގީ ދުއްވަން ހުރި މީހާ ފިޔަވައި އެއް އާއިލާއަކަށް ނިސްބަތްވާ ހަތަރު އަންހެނުންނާއި ދެ ފިރެހެނުން ކަމަށެވެ.
ހާދިސާގައި އެއްވެސް މީހަކަށް އަދި އެ މީހުން ދަތުރުކުރި ޑިންގީއަށް ގެއްލުމެއް ލިބިފައެއް ނުވެ އެވެ.
