މާލެއިން 9 މިލިއަން ލީޓަރުގެ ފެން ހިންދައިފި
ރާއްޖެއަށް މިހާރު ކުރަމުންދާ ވިއްސާރާގައި މާލޭގައި ފެންބޮޑުވުމުގެ ސަބަބުން މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން 16 ޕަމްޕު ބޭނުންކޮށް، 6 ސަރަހައްދަކުން 9،917 ޓަން (9 މިލިއަން ނުވަ ސަތޭކަ ސަތާރަ ލީޓަރު) ގެ ފެން ހިންދައިފި އެވެ.
އެމްއެންޑީއެފުން ބުނީ، ފެން ހިންދުމުގެ އޮޕަރޭޝަން ހިންގާފައިވަނީ މާލޭގެ 6 ސަރަހައްދެއްގައި ކަމަށެވެ. އެގޮތުން ފެން ހިންދާފައިވާ ސަރަހައްދުތައް :
- ވެސްޓްޕާކް
- އައިޖީއެމްއެޗް
- ސަލްމާން މިސްކިތް
- ބޮޑު ވަޅު
- މާފަންނު ފެރީ ޓާމިނަލް
- ދިވެހި ރާއްޖޭގެ އަޑު
އެމްއެންޑީއެފުން ބުނި ގޮތުގައި ވެސްޓްޕާކާއި އައިޖީއެމްއެޗް ސަރަހައްދުން ފެން ހިންދުމަށް ކޮންމެ ސަރަހައްދަކަށް 5 ޕަމްޕު ބޭނުން ކޮށްފައިވެ އެވެ. އަދި ސަލްމާން މިސްކިތް ސަރަހައްދުން ފެން ހިންދުމަށް 3 ޕަމްޕާއި، ބޮޑު ވަޅާއި، މާފަންނު ފެރީ ޓާމިނަލް އަދި ދިވެހިރާއްޖޭގެ އަޑު ސަރަހައްދުން ފެން ހިންދުމަށް ބޭނުން ކޮށްފައިވަނީ ކޮންމެ ސަރަހައްދަކަށް ޕަމްޕެކެވެ.
މުޅި ރާއްޖެއަށް މިހާރު މޫސުން ގޯހެވެ. މެޓް އޮފީހުން މިއަދު ބުނީ، ރާއްޖެއަށް މޫސުން ގޯސްވެފައިވަނީ ރާއްޖޭގެ މަތިން މެދުގައި އޮތް ކޮޅިގަނޑެއްގެ އަސަރު ކުރަމުންދާތީ ކަމަށެވެ.
ގއ އިން ފެށިގެން އައްޑޫ އަތޮޅު ފިޔަވައި ރާއްޖޭގެ އެހެން ސަރަހައްދުތަކަށް ގުގުރުމާއެކު ބޯކޮށް ވާރޭ ވެހޭނެ ކަމަށް މެޓުން ލަފާކުރެ އެވެ.
އެމްއެންޑީއެފާއި ފުލުހުން ގުޅިގެން މާލޭގެ މަގުތަކުން ފެން ހިންދުމުގެ މަސައްކަތް ކުރަމުންދާއިރު، ފުލުހުން ވަނީ މަގުތަކުގައި ބަރު އުޅަނދުތައް ނުދުއްވުމަށާއި، ޒަރޫރީ ބޭނުމަކަށް ނޫން ގޮތަކަށް ހަތަރު ފުރޮޅުލީ އުޅަނދު ވެސް ނުދުއްވަން އިލްތިމާސް ކޮށްފަ އެވެ.
