އޮފިސަރުންގެ ހިޔާނާތުގެ މައްސަލައިގައި ކަސްޓަމްސް މަޖިލީހުގެ ކޮމިޓީއަށް ހާޒިރުކުރަނީ
މޯލްޑިވްސް ކަސްޓަމްސް ސާވީސްގެ އޮފިސަރުންތަކެއްގެ އެކައުންޓުގައި 400 މިލިއަން ރުފިޔާ ދައުރުވި މައްސަލައިގައި ކަސްޓަމްސްގެ އިސްވެރިން ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ (241) އަށް ހާޒިރުކުރަން ނިންމައިފި އެވެ.
ކަސްޓަމްސްގެ އިތުުރުން ފުލުހުންނާއި ހޯމްލޭންޑް ސެކިއުރިޓީ އެންޑް ޓެކްނޮލޮޖީ މިނިސްޓްރީގެވެރިން ހާޒިރުކުރާ ބައްދަލުވުން ބާއްވަން ނިންމާފައިވަނީ އަންނަ ހަފްތާގެ ބުރާސްފަތި ދުވަހު އެވެ. އެއީ މަޖިލީހުގެ އެހެން މަސައްކަތްތައް ވެސް ހުރުމާއެކު ދައުރުން ބޭރުން މަޖިލީހުގެ ޖަލްސާއެއް ވެސް ބާއްވާ ދުވަސްވެސްމެ އެވެ.
241 ކޮމިޓީގައި ހިމެނިވަޑައިގަންނަވާ މަޖިލީހުގެ ނައިބް ރައީސް އަހުމަދު ނާޒިމް ވަނީ އެކަން "ދެން" އަށް ޔަގީންކޮށްދެއްވާފަ އެވެ. ނާޒިމް ވިދާޅުވީ ތިން އިދާރާއެއްގެ ވެރިން ހާޒިރުކުރަނީ ހިޔާނާތުގެ އިތުރުން ކަސްޓަމްސްގެ ބޮންޑެޑް ވެއާ ހައުސްއިން ސިނގިރޭޓްތަކެއް ގެއްލުނު މައްސަލައާ ގުޅޭ ގޮތުން ސުވާލުކުުރުމަށް ކަމަށެވެ.
ފުލުހުން ތަހުގީގުކުރަމުންދަނީ ކަސްޓަމްސްގެ އޮފިސަރުންގެ މަނީލޯންޑަރިން، ހިޔާނާތް އަދި ރިޝްވަތު ނެގި ކަމަށް ތުހުމަތު ކުރެވޭ މައްސަލައެކެވެ.
އެނގިފައިވާ ގޮތުން 400 މިލިއަން ރުފިޔާ ދައުރުކޮށްފައިވަނީ ކަސްޓަމްސްގެ 10 އޮފިސަރެއްގެ އެކައުންޓުގަ އެވެ. އޭގެ ތެރެއިން މި ވަގުތު ތަހުގީގުކުރަމުން ދަނީ 3 އޮފިސަރެއްގެ މައްސަލަ ކަމަށް އިތުބާރު ހުރި މަސްދަރަކުން ދެން އަށް މައުލޫމާތު ދީފައިވެ އެވެ.
އެ މައްސަލައާ ގުޅިގެން ކަސްޓަމްސްގެ އޮފިސަރެއްގެ ރިޓަޔާމަންޓްވެސް މަޑު ޖައްސާލައިފައިވާ ކަމަށް ކަސްޓަމްސްއިން ބުނެފައިވެ އެވެ.
