ކުންފުންޏެއްގެ ހަވާލުގައި އުމުރާއަށް ދިޔަ 24 މީހަކު ރާއްޖެ ނާދެވި ތާށިވެއްޖެ
އަލް ހިޖްރަ ގްރޫޕުގެ ހަވާލުގައި އުމުރާގެ އަޅުކަން އަދާކުރުމަށް ރާއްޖެއިން ދިޔަ 24 މީހަކު ސައުދިއަރަބިޔާގައި ތާށިވެއްޖެ އެވެ.
އެ ގްރޫޕުން މީހުން އުމުރާއަށް ގެންދަން ނެގީ އެއްކޮޅު ޓިކެޓް ކަމަށްވެ އެވެ.
އެހެންވެ ރާއްޖެ އެނބުރި އަންނަން އަދިވެސް ޓިކެޓް ހަމަޖެހިފައެއް ނުވެ އެވެ. އެ މީހުން އުމުރާއަށް ފުރުމުގައިވެސް މައްސަލަތަކެއް ދިމާވި އެވެ. އޭރު ދިމާވީ ޓިކެޓާ ވިސާގެ މައްސަލަ ކަމަށް އެ ގްރޫޕުގެ ޑިރެކްޓަރު, މުސްތަފާ މުހައްމަދު ވަނީ ދެން އަށް ވިދާޅުވެފަ އެވެ.
ހިޖްރަ ގްރޫޕުން ފޭސްބުކްގައި އާއްމުކުރި ބަޔާނެއްގައި ބުނީ އުމުރާވެރިން ރާއްޖެ ގެނައުމަށްޓަކައި ކުންފުނިން މަސައްކަތްކުރަމުންދާ ކަމަށެވެ.
"އެހެންނަމަވެސް އަދި މިއަދާއި ހަމައަށްވަނީ މިކަމުގައި ކުރިމަގެއް ނުފެނިފަ އެވެ" ގްރޫޕުން އާއްމުކުރި ބަޔާނެއްގައި ބުންޏެވެ.
ހާލުގައި ޖެހުނު މީހުން ރާއްޖެ ގެންނަން މަސައްކަތް ކުރަމުންދާ ކަމަށް އިސްލާމިކް މިނިސްޓަރު ޑރ މުހައްމަދު ޝަހީމް އަލީ ސައީދު ވަނީ ވިދާޅުވެފަ އެވެ.
މިނިސްޓްރީގެ މީޑިއާ ވަޓްސްއެޕް ގްރޫޕުގައި ޝަހީމް ވިދާޅުވީ އެ މީހުން އެނބުރި ރާއްޖެ ގެނައުމަށް ކޮށްދެވެން އޮތް ކަމެއް މިނިސްޓްރީން ކުރާނެ ކަމަށެވެ.
"މައްކާގައި މިވަގުތުގައި އޮތް މޯލްޑިވްސް ހައްޖު ކޯޕަރޭޝަންގެ މެދުވެރިކޮށް، ހާލުގައި ޖެހުނު އުމްރާވެރިންނަށް އެހީވުމަށް މިދަނީ މަސައްކަތްކުރަމުން. އަޅުގަނޑުވާނީ ހައްޖު ކޯޕަރޭޝަންގެ އެމްޑީއަށް އިރުޝާދު ދީފަ. ދިވެހި އެއްވެސް ރައްޔިތަކަށް ދިމާވާ ދަތިކަމެއްގައި އެހީ ނުވެ އަޅުގަނޑުމެން ނުތިބޭނަން. ރައީސް އަބަދުވެސް އިރުޝާދު ދެއްވަނީ ރައްއްޔިތުންނާ ގާތުން މަސައްކަތްކުރުމަށް. ދިމާވާ ކަންކަން ހައްލުކުރުމަށް" ޝަހީމް ވިދާޅުވި އެވެ.
މީގެ ކުރިން ހައްޖާއި އުމްރާއަށް ދާން މީހުންގެ އަތުން ފައިސާ ނެގުމަށް ފަހު އޮޅުވާލުމުގެ މައްސަލަަތައް ދިމާވެ އެވެ.
Ads by STO
