ޗެކު ބައުންސްވި މައްސަލާގައި މަޝްއަރަށް ދައުވާކުރަން ފޮނުވައިފި
ހައްޖާ އުމުރާގެ އަޅުކަމަށް މީހުން ގެންދިޔުމަށް ދިން ހުއްދަ ބާތިލްކުރުމުން، ޓްރެވެލް އެޖެންސީއަކަށް ނަން ބަދަލުކޮށްގެން ހުސްވި އަހަރުގެ ރަމަޝާން މަހު އުމުރާއަށް މީހުން ގެންދިޔަ މަޝްއަރު ޓުއާސްއިން، ޓްރެވެލް އެޖެންޓަށް ފައިސާ ދައްކަން ދިން ޗެކުތަކެއް ބައުންސްވި މައްސަލާގައި އެ ކުންފުނީގެ ވެރިންނަށް ދައުވާކުރަން ޕްރޮސެކިއުޓާ ޖެނެރަލް (ޕީޖީ) ގެ އޮފީހަށް ފުލުހުން ހުށަހަޅައިފި އެވެ.
ފުލުހުންގެ މީޑިއާ އޮފިޝަލް މިއަދު ވިދާޅުވީ އެ ގްރޫޕަށް ދައުވާކުރަން ޕީޖީ އަށް ފޮނުވީ ހުސްވި ޑިސެމްބަރު މަހުގެ 2 ވަނަ ދުވަހު ކަމަށެވެ.
ޕީޖީ އޮފީހުން "ދެން" އަށް ބުނީ އެ މައްސަލަ އޮތީ ޑިއުޓީ ޕްރޮސެކިއުޓާ މަރުހަލާގައި ކަމަށެވެ.
އެ އެޖެންސީން އުމްރާއަށް މީހުން ފޮނުވަން ފްލައިޓް ޗާޓަރު ކުރީ އިނާ މޯލްޑިވްސްގެ ދަށުން ހިންގާ ''އޭސް ޓްރެވެލް'' އާއި ''އޭސް އޭވިއޭޝަން'' އިންނެވެ. ފްލައިޓް ޗާޓަރުކުރީ ސްރީލަންކަން އެއާލައިން އާއި ގަތަރު އެއާލައިންގެ އިތުރުން އެމިރޭޓްސް އެއާލައިނުންނެވެ. އެ މީހުންގެ ހަވާލުގައި 50 މީހަކު އުމުރާގެ އަޅުކަމަށް ދިޔަ އެވެ. ފައިސާ ދައްކަން ދިން 4 ޗެކުވެސްވީ ބައުންސެވެ.
އެ ގްރޫޕުގެ ހަވާލުގައި 2023 ގައި 207 މީހަކު އުމްރާއަށް ދިޔައިރު އެމީހުން ގެންދަން ފްލައިޓް ޗާޓަރުކުރި ދިވެހި ކުންފުންޏަށް ފައިސާ ދައްކަން ދިން ދެ ޗެކްވެސް ވީ ބައުންސެވެ. އެއީ އެއްލައްކަ ސާޅީސް ހާހަށްވުރެ ގިނަ ޑޮލަރެވެ. ހަމަ އެ ދަނޑިވަޅުގައި ސައުދީ އެއާލައިންސްގެ ފްލައިޓެއް ގައި އެ ގުރޫޕުން ގެންދިޔަ 70 ވަރަކަށް މީހުންގެ ރިޓާން ޓިކެޓްގެ ފައިސާ ނުދައްކާ މައްސަލަ ވެސް އުޅޭ ކަމަށް ކުރީގެ އިސްލާމިކް މިނިސްޓަރު ޑރ އަހުމަދު ޒާހިރު ވިދާޅުވެފައިވެ އެވެ. އެއީ ގާތްގަނޑަކަށް 90 ހާސް ޑޮލަރެވެ.
އެ ކުންފުންޏާއި ކުންފުނީގެ ވެރިޔާ އަލީ ފާރިޝް އަށް އެއްވެސް ފައިސާއެއް ނުދެއްކުމަށް އިސްލާމިކް މިނިސްޓްރީން ވަނީ މީގެ ކުރިން އެދިފަ އެވެ.
