މަރުވި ނޭޕާލް އަންހެން މީހާގެ ހަށިގަނޑު އެންމެ ފަހުން ގައުމަށް ފޮނުވައިފި
ރާއްޖޭގައި މަރުވި ނޭޕާލް އަންހެން މީހާގެ ގެ ހަށިގަނޑު އެ ގައުމަށް އެންމެ ފަހުން ފޮނުވައިފި އެވެ.
ކަންޗަން ދޫގެލް (25އ) މަރުވީ މިދިޔަ ނޮވެމްބަރު މަހުގެ 9 ވަނަ ދުވަހު އެވެ. ނަމަވެސް ދެ މަސްވާން ކައިރިވި އިރު ވެސް އޭނާގެ ހަށިގަނޑާ ހަވާލުވާނެ މީހަކު ނުވެގެން އޮތީ މޯޗަރީގައި ބާއްވައިފަ އެވެ.
އެހެންވެ ފުލުހުން ފަހުން ދިޔައީ އޭނާގެ ހަށިގަނޑު ނޭޕަލްއަށް ފޮނުވުމަށް މަސައްކަތްކުރަމުންނެވެ.
ފުލުހުން މިއަދު ބުނީ ކަންޗަންގެ ހަށިގަނޑު މިދިޔަ އަންގާރަ ދުވަހު ގައުމަށް ފޮނުވާފައިވާ ކަމަށެވެ.
ފުލުހުން ކުރިން ބުނެފައިވާ ގޮތުން ކަންޗަށް ހޮސްޕިޓަލަށް ގެންގޮސްފައިވަނީ ވަރަށް ބޮޑަށް ބަނޑުގައި ރިއްސާތީ އެވެ. އަދި ހޮސްޕިޓަލަށް ގެންދިއުމުގެ މަގުމަތީގައި ހަބަރު ހުސްވެފައިވާކަން ތަހުގީގުގެ ހޯދުންތަކުން އެނގޭ ކަމަށް ފުލުހުން ބުނެފައިވެ އެވެ.
މެޑިކޯ ލީގަލް ރިޕޯޓާ ހަވާލާދީ ފުލުހުން ބުނެފައިވަނީ ކަންޗަން މަރުވި ސަބަބު މިހާތަނަށް އެނގިފައިނުވާ ކަމަށެވެ. އެ ރިޕޯޓުގައި މަރުވި ސަބަބު "އަންނޯން" ކަމަށް ބަޔާންކޮށްފައިވެ އެވެ. އަދި އެ ރިޕޯޓުގައި ޖިންސީ އަނިޔާއެއް ލިބިފައިވާކަން އެއްވެސް މިންވަރަކަށް ފާހަގަކޮށްފައިނުވާ ކަމަށް ވެސް ފުލުހުން ވަނީ ބުނެފަ އެވެ.
ކަންޗަންއަކީ ލޭގައި ހުންނަ މާއްދާއެއް ކަމަށްވާ ރެޑް ބްލަޑް ސެލްސް މަދުވެ، އޮކްސިޖަން ލިބުމަށް ދަތިވާ ބައްޔެއް ކަމަށްވާ 'އެނީމިއާ' ގެ ރެކޯޑު އޮންނަ މީހެއް ކަމަށް ވެސް ފުލުހުން ބުނެ އެވެ.
Ads by STO
