Monday, 16 November 2026
Advertisement
STO — McCoy (leaderboard)
ޚަބަރު

އިކްރާމަށް ހުކުމްކޮށްފި، އަނިޔާވި މީހާއަށް 100،000 އަށް ވުރެ ގިނަ ރުފިޔާ ދިން 

އިކްރާމަށް ހުކުމްކޮށްފި، އަނިޔާވި މީހާއަށް 100،000 އަށް ވުރެ ގިނަ ރުފިޔާ ދިން 
ހުސްވި އަހަރުގެ ޖުލައި މަހުގެ 31 ވަނަ ދުވަހު ބާރު ސްޕީޑުގައި ދުއްވާފައި ދިޔަ ރޭސް ކާރަކުން، ވިނަރެސް ކައިރީގައި ސައިކަލެއްގައި މަޑުކޮށްގެން އިން މީހެއްގެ ގައިގައި ޖެހި ހިނގި ނުރައްކާތެރި އެކްސިޑެންޓުގައި އަނިޔާވި މީހާގެ ބޭސްފަރުވާއަށާއި ސައިކަލަށް ލިބުނު ގެއްލުންތަކަށް ކާރު ދުއްވަންއިން މ. ލޭންޑްއޮފްގާޑްން, އިބްރާހީމް އިކްރާމް މިހާތަނަށް 100،000 އަށް ވުރެ ގިނަ ރުފިޔާ ދައްކާފައިވާ ކަމަށް ބުނެފި އެވެ. އެ މައްސަލައިގައި އިކްރާމުގެ އިތުރުން ދައުވާކޮށްފައި ވަނީ ހ. ނޫރަންމާގެއާގެ, އިކްރާމުއްރަހްމާނާއި ގއ. ކަނޑުހުޅުދޫ, އާޒާދުގެ, ޖިނާހް އިސްމާއީލުގެ މައްޗަށެވެ. އިކްރާމުގެ މައްޗަށް އުފުލި 6 ދައުވާއަށް އިއުތިރާފުވެ، ދައުލަތާ އެކު އޭނާ ވަނީ އިއުތިރާފުގެ އެއްބަސްވުމެއްގައި ސޮއިކޮށްފަ އެވެ. އެހެންކަމުން އަވަސް ނިޔާގެ ދަށުން މިއަދު ބޭއްވި އަޑުއެހުމަކީ ހުކުމް ކުރަން ބޭއްވި އަޑުއެހުމެކެވެ. އޭނާގެ މައްޗަށް އުފުލި ދައުވާތަކަށް އަދަބު ކަނޑައަޅަން އެއްބަސްވެފައި ވަނީ:
  • އަނިޔާއެއް ދިނުމުގެ ކުށުގެ ދައުވާ - ޖަލު ބަންދުގެ އަދަބު ޖޫރިމަނާއަށް ބަދަލުކޮށް، 44،800 ރުފިޔާގެ ޖޫރިމަނާއެއް 8 މަސް ދުވަހުގެ ތެރޭގައި ދެއްކުން
  • މީހަކު ފަރުވާލެއްނެތި ކުރާ އަމަލެއްގެ ސަބަބުން މީހެއްގެ ހަށިގަނޑަށް ބޮޑު އަނިޔާއެއް ލިބިދާނެ ކަމުގެ ބިރެއް ކުރިމަތިކުރުވުމުގެ ކުށުގެ ދައުވާ - 3 މަސް ދުވަހުގެ ޖަލު ބަންދުގެ އަދަބަކާއި 19،200 ރުފިޔާގެ ޖޫރިމަނާއެއް 8 މަސް ދުވަހުގެ ތެރޭގައި ދެއްކުން
  • މުދަލަށް ގެއްލުންދިނުމުގެ ކުށުގެ ދެ ދައުވާ - ބޭސްފަރުވާގެ ހަރަދަށް ގާތްގަނޑަކަށް 24،000 ރުފިޔާ އަދި ސައިކަލަށް ލިބުނު ގެއްލުންތަކަށް 95،000 ރުފިޔާ ދައްކާފައި ވުމުން އެ ދެ ދައުވާ އަނބުރާ ގެންދަން
  • އެކްސިޑެންޓުވުމުން އެކަމުގެ ރިޕޯޓު ނުކުރުމުގެ ކުށުގެ ދައުވާ - 5،400 ރުފިޔާގެ ޖޫރިމަނާއެއް 8 މަސް ދުވަހުގެ ތެރޭގައި ދެއްކުން
  • އެހީއަށް ބޭނުންވެފައިވާ މީހާއަށް އެކަަށީގެންވާ ސަބަބެއްނެތި އެހީތެރިކަން ފޯރުކޮށްނުދިނުމުގެ ކުށުގެ ދައުވާ - 600 ރުފިޔާގެ ޖޫރިމަނާއެއް 8 މަސް ދުވަހުގެ ތެރޭގައި ދެއްކުން
ދައުލަތާ އެކު އިކްރާމް ވި އިއުތިރާފުގެ އެއްބަސްވުމާ އެއްގޮތަށް ތިން މަހަށް ޖަލަށް ލުމަށާއި 70،000 ރުފިޔާއިން ޖޫރިމަނާކުރަން ނިންމައި ކްރިމިނަލް ކޯޓުން މިއަދު ވަނީ ހުކުމްކޮށްފަ އެވެ. ދައުލަތުންނާއި އިކްރާމު ވެސް ފާހަގަކޮށްފައިވާ ގޮތުން އެކްސިޑެންޓުގައި އަނިޔާ މީހާއަށް އޭނާ ވަނީ މިހާތަނަށް 119،000 ރުފިޔާ ދީފަ އެވެ. ދައުވާތަކަށް އިކްރާމް އިއުތިރާފު ވިނަމަވެސް އެ މައްސަލައިގައި ދެން ދައުވާކުރި އިކްރާމުއްރަހްމާނާއި ޖިނާހު ވަނީ ދައުވާތަކަށް އިންކާރުކޮށްފަ އެވެ.

އިކްރާމުއްރަހުމާނުގެ މައްޗަށްކޮށްފައިވާ 6 ދައުވާ:

  • އެކްސިޑެންޓުވުމުން އެކަމުގެ ރިޕޯޓު ނުކުރުމުގެ ކުށުގެ ދައުވާ
  • އެހީއަށް ބޭނުންވެފައިވާ މީހާއަށް އެކަަށީގެންވާ ސަބަބެއްނެތި އެހީތެރިކަން ފޯރުކޮށްނުދިނުމުގެ ކުށުގެ ދައުވާ
  • އަނިޔާއެއް ދިނުމުގައި ބައިވެރިވުމުގެ ކުށުގެ ދައުވާ
  • މީހަކު ފަރުވާލެއްނެތި ކުރާ އަމަލެއްގެ ސަބަބުން މީހެއްގެ ހަށިގަނޑަށް ބޮޑު އަނިޔާއެއް ލިބިދާނެ ކަމުގެ ބިރެއް ކުރިމަތިކުރުވުމުގެ ކުށުގެ ދައުވާ
  • މުދަލަށް ގެއްލުން ދިނުމުގައި ބައިވެރިވުމުގެ ކުށުގެ ދެ ދައުވާ

ޖިނާހުގެ މައްޗަށްކޮށްފައިވާ 4 ދައުވާ:

  • އަނިޔާއެއް ދިނުމުގައި ބައިވެރިވުމުގެ ކުށުގެ ދައުވާ
  • މީހަކު ފަރުވާލެއްނެތި ކުރާ އަމަލެއްގެ ސަބަބުން މީހެއްގެ ހަށިގަނޑަށް ބޮޑު އަނިޔާއެއް ލިބިދާނެ ކަމުގެ ބިރެއް ކުރިމަތިކުރުވުމުގެ ކުށުގެ ދައުވާ
  • މުދަލަށް ގެއްލުން ދިނުމުގައި ބައިވެރިވުމުގެ ކުށުގެ ދެ ދައުވާ

ރިއެކްޝަން

Advertisement
Allied — Dhen Online (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.