ފްލޯޓިން ސޯލާ ޕެނަލް ޖަހާނެ ރަނގަޅު ތަންތަން ދެނެގަންނަން ދިރާސާއެއް ހަދަނީ
ރާއްޖޭގެ އެކި ސަރަހައްދުތަކުގެ ތެރެއިން ފްލޯޓިން ސޯލާ ޕެނަލް ޖަހާނެ އެންމެ ރަނގަޅު ތަންތަން ދެނެގަތުމަށް ދިރާސާއެއް ހަދަން ނިންމާފައިވާ ކަމަށް އެންވަޔަރަންމަންޓް މިނިސްޓަރު ތޯރިގު އިބްރާހިމް ވިދާޅުވެއްޖެ އެވެ.
ދައުލަތުގެ މީޑިއާގެ ޕްރޮގްރާމެއްގައި ވާހަކަ ދައްކަވަމުން ތޯރިގު ވިދާޅުވީ މިހާރުގެ ޓްރެންޑަކީ މޫދުގައި ސޯލާ ޖެހުން ކަމަށެވެ.
ވޯލްޑް ބޭންކުގެ ޕްރޮޖެކްޓެއްގެ ތެރެއިން ޕްރައިވެޓް ޕާޓްނާޝިޕްގެ ދަށުން ކުރިއަށް ގެންދަން ނިންމާފައިވާ 10 މެގަވޯޓުގެ ސޯލާ މަޝްރޫއު އޮތީ ބީލަމަށް ހުޅުވާލާފައި ކަމަށެވެ. މިހާރު ކުރަމުންދާ މަސައްކަތަކީ އެ ބީލަންތައް އިވެލުއޭޓްކުރުމުގެ މަސައްކަތް ކަމަށް ވެސް މިނިސްޓަރު ވިދާޅުވި އެވެ.
"އޭގެ އިތުރުން 100 މެގަވޯޓުގެ ސޯލާ ޕެނަލްގެ މަސައްކަތްތައް ވެސް ފުރަތަމަ އިނީޝިއަލް ޕާމިޓް ދެވި، ދެވަނަ ޕާާމިޓާ ހަމައަށް ގާތްގަނޑަކަށް ދެވިފައި މި ވަނީ. އެހެންވީމާ ވަރަށް ލާޖް ސްކޭލްގައި އަޅުގަނޑުމެން މަސައްކަތް ކުރަނީ،" ތޯރިގު ވިދާޅުވި އެވެ.
މިނިސްޓަރު ވިދާޅުވީ ރާއްޖޭގެ އެކި ސަރަހައްދުތަކުގައި ފްލޯޓިން ސޯލާ ޕެނަލް ހަރުކުރަން އެންމެ ރަނގަޅު ތަންތަން ދެނެގަތުމަށް ދިރާސާއެއް ހެދުމަށް އިންޓަނޭޝަނަލް ރިނިއުބަލް އެނާޖީ އޭޖެންސީ (އައިރީނާ) ގައި އެދިވަޑައިގެންފައިވާ ކަމަށެވެ.
"އެ ބޭފުޅުން (އައިރީނާ) އިން އެ ކަންތައްތައް ކޮށްދެއްވަން އެ ބޭފުޅުންގެ ކޮމިއުނިކޭޝަންއެއް ލިބިފައި އެބައިން. އެ ބޭފުޅުން އެ ކަންތައްތައް ކޮށްދެއްވާނަމޭ،" ތޯރިގު ވިދާޅުވި އެވެ.
އޭގެ އިތުރުން ރާއްޖޭގައި އިއާދަކުރަނިވި ހަކަތައިގެ ދާއިރާއިން މީހުން ތަމްރީންކުރަން ބޭނުންވާކަން އައިރީނާގެ ޑިރެކްޓާ ޖެނެރަލަށް ދެންނެވި ކަމަށެވެ.
ތޯރިގު ވިދާޅުވީ ރަށްރަށުގައި ޔުޓިލިޓީ ހިދުމަތް ދިނުމަށް ފެނަކަ ނުވަތަ ސްޓެލްކޯ ހުންނަ ކަމަށެވެ.
އެހެން ނަމަވެސް އިތުރުން ޔުޓިލިޓީ ހިދުމަތް ދިނުމުގައި އިއާދަކުރަނިވި ހަކަތައިގެ އެކި ދާއިރާތަކުން އިންސްޓޮލޭޝަން ނުވަތަ އެކަމުގައި ޖެހޭ މައްސަލަތައް ހައްލުކުރުމުގެ މަސައްކަތަށް މީހުން ހޯދަން ޖެހޭ ކަން ފާހަގަކުރެއްވި އެވެ.
