މިދިޔަ އަހަރު ބިދޭސީންނާ ކައިވެނި ކުރި ދިވެހިންގެ އަދަދު 163އަށް
މިދިޔަ އަހަރު 163 ދިވެހިން ބިދޭސީންނާ ކައިވެނިކޮށްފައިވާ ކަމަށް ފެމިލީ ކޯޓުން އާންމުކުރި ތަފާސްހިސާބުން އެނގިއްޖެ އެވެ.
ފެމިލީ ކޯޓުން ނެރުނު ތަފާސްހިސާބުގައި ބުނާ ގޮތުން އެއީ ބިދޭސީ 45 ފިރިހެނުންނާއި ދިވެހި އަންހެނުން ކުރި ކައިވެނިތަކާއި ބިދޭސީ 118 އަންހެނުންނާއި ދިވެހި ފިރިހެނުން ކުރި ކައިވެނިތަކެވެ.
މިދިޔަ އަހަރު ޖުމުލަ 2،485 ކައިވެނި ކޮށްދީފައިވެ އެވެ. އޭގެ ތެރޭގައި ރާއްޖޭން ބޭރުގައި ކުރި 181 ކައިވެނި ރާއްޖޭގައި ރަޖިސްޓްރީކުރުން ހިމެނެ އެވެ. އަދި 1،326 ވަރި ކޮށްފައިވެ އެވެ.
އަނބިދަރިންގެ ހަރަދު، ޢިއްދާގެ ހަރަދު، ވިހެއުމުގެ ހަރަދު އަދި ކައިވެނީގެ ރަން ހިމެނޭ ގޮތަށް ހަރަދު ދެއްކުމަށް ކޯޓުން ކުރި ހުކުމްތަކުގައިވާ ފައިސާގެ އަދަދު 97 މިލިއަން ރުފިޔާއަށް އަރަ އެވެ.
ހުކުމްތަކުގައިވާ ފައިސާގެ ތެރެއިން ކޯޓަށް ލިބި ބަލައިގެންފައިވަނީ 46 މިލިއަން ރުފިޔާ އެވެ.
ގެވެށި އަނިޔާއިން ރައްކާތެރިކުރުމުގެ އަމުރާއި ކުޑަކުދިންގެ ހައްގުތަކާ ގުޅޭ އަމުރުތައް ހިމެނޭ ގޮތަށް މިދިޔަ އަހަރު ޖުމުލަ 117 އަމުރު ނެރެފައިވެ އެވެ.
