މި އަހަރުގެ ނިޔަލަށް ހުރިހާ ރަށެއްގައި ޕޮލިސް އިމާރާތްތައް އަޅަނީ
އަމާޒަކީ މި އަހަރުގެ ނިޔަލަށް ހުރިހާ ރަށެއްގައި ފުލުހުންގެ ހިދުމަތް ދިނުމަށް އަމިއްލަ އިމާރާތްތަކެއް އެކަށީގެންވާ ފެންވަރެއްގައި ގާއިމުކުރެއްވުން ކަމުގައި ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
މާޅޮސްމަޑުލު އުތުރުބުރީގެ ރަށްތަކަށް މިއަދު ހެނދުނު ފެއްޓެވި ދަތުރުފުޅުގައި އެ އަތޮޅުގެ އެގާރަ ރަށަކަށް ރައީސް ވަޑައިގެންނެވުމަށް ހަމަޖެހިފައިވެ އެވެ. އެމަނިކުފާނު ވަޑައިގެންނެވުމަށް ހަމަޖެހިފައި ވަނީ ވާދޫ، އަނގޮޅިތީމު، ހުޅުދުއްފާރު، އިންނަމާދޫ، ކިނޮޅަސް، މާކުރަތު، މަޑުއްވަރި، ފައިނު، ރަސްގެތީމު، ރަސްމާދޫ އަދި އުނގޫފާރަށެވެ.
ރައީސް އޮފީހުން ބުނީ ތިން ދުވަހުގެ ދަތުރުފުޅުގައި އެ އަތޮޅުގެ ބައެއް ރަށްތަކަށް ޒިޔާރަތް ކުރައްވައި، އަތޮޅުގެ ރަށްތަކުގެ ކައުންސިލުތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކާ ބައްދަލުކުރައްވާނެ ކަމަށެވެ. އަދި ރަށުގެ މުއައްސަސާތަކުގެ އިސްވެރިންނާ ބައްދަލުކުރައްވައި، އެ ރަށްރަށުގެ ތަރައްގީއަށް ބޭނުންވާ ކަންކަމުގެ އިތުރުން ރައްޔިތުން އެންމެ އެދޭ ކަންކަމާ ގުޅޭގޮތުން މަޝްވަރާ ކުރައްވާ ގޮތަށް ހަމަޖެހިފައިވާ ކަމަށެވެ.
ދަތުރުފުޅުގައި އެންމެ ފުރަތަމަ ރައީސް ވަޑައިގެންފައި ވަނީ ވާދޫއަށެވެ. ރަށުގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައި ރައީސް ވިދާޅުވީ ފުލުހުންގެ ހިދުމަތް މީހުން ދިރިއުޅޭ ހުރިހާ ރަށަކުން ލިބޭނެ އިންތިޒާމު ހަމަޖެއްސެވުމަކީ އެމަނިކުފާނު ވެވަޑައިގެންނެވި ރިޔާސީ ވައުދުފުޅެއް ކަމަށެވެ. އެކަމަށް ހާއްސަ މަޝްރޫއެއް މިހާރު ފަށާފައިވާ ކަމަށެވެ.
ރަށްތަކުގައި، އެ ރަށެއްގެ އާބާދީއަށް އަދި އާބާދީ އިތުރުވަމުންދާ ނިސްބަތަށާ އަދި އިގުތިސޯދީ ގޮތުންނާއި އެހެނިހެން ގޮތްގޮތުން ހިދުމަތަށް ބޭނުންވާ މިންވަރަށް ބަލައި، އެކަށީގެންވާ ސައިޒުގެ މަރުކަޒެއް ގާއިމުކުރައްވާނެ ކަމަށް ރައީސް ވިދާޅުވި އެވެ.
"އަމާޒަކީ މި ފެށިގެން މިދާ އަހަރު ނިމެންވާއިރަށް، 2025 ވަނަ އަހަރުގެ ނިޔަލަށްދާއިރުގައި މުޅި ރާއްޖޭގައި ވެސް ކޮންމެ ރަށެއްގައި ވެސް، އެ ރަށެއްގައި އެންމެ އެކަށީގެންވާ ފެންވަރުގައި ޕޮލިސް ހިދުމަތް ދެވޭނެ އަމިއްލަ ތަނެއް. ތަނެއް ކުއްޔަށް ހިފައިގެނެއް ނޫން. އަމިއްލަ އިމާރާތެއް، އެކަމަށް އެންމެ އެކަށީގެންވާ ފެންވަރެއްގައި ގާއިމުކުރުން،"
އެ މަޝްރޫއުގެ ތެރެއިން ވާދޫގައި ވެސް އެ މަސައްކަތް ކުރިއަށްދާނެކަން ފާހަގަކުރެއްވި އެވެ.
ރައްޔިތުންގެ މަޖިލިހުގައި މެމްބަރަކު ކުރެއްވި ސުވާލެއްގެ ޖަވާބު ދެއްވަމުން މިދިޔަ މާޗް މަހު ހޯމްލޭންޑް މިނިސްޓަރު އަލީ އިހްސާން ވިދާޅުވެފައި ވަނީ ފުލުހުންގެ މަރުކަޒުތައް ގާއިމުކުރުމުގައި ބަލަމުން އަންނަނީ ހަރަދު ކުޑަކޮށް އެކަން ކުރުމަށް ކަމަށެވެ. އެގޮތުން ރާވާ އިމާރާތް (ޕްރީ ފެބްރިކޭޓެޑް) ފަރުމާކުރަމުންދާ ކަމަށެވެ. އެގޮތަށް އިމާރާތްކުރާ ނަމަ ހަރަދު ކުޑަވުމުގެ އިތުރުން މަސައްކަތް އަވަސްވާނެކަން ފާހަގަކުރައްވާފައިވެ އެވެ.
އިހްސާން ވިދާޅުވެފައިވާ ގޮތުގައި މަސައްކަތް ކުރުމުގައި އިސްކަންދޭނީ ފުލުހުންގެ ހިދުމަތް ފެށިފައި ނުވާ ރަށްތަކަށް ކަމުގަ އެވެ. ފުލުހުންގެ މަރުކަޒުތައް ނެތް 46 ރަށެއް ފާހަގަކުރެވިފައިވާ ކަމަށާއި 2027 ވަނަ އަހަރު އަންނައިރަށް، އެ ރަށްތަކުގައި މަރުކަޒުތައް އެޅުމަށް ތާވަލެއް ހަދާފައިވާ ކަމުގަ އެވެ.
ކައުންސިލުގެ ބެލުމުގެ ދަށުގައިވާ އިމާރާތްތަކުގަ އާއި އާންމުންގެ ގެތައް ކުއްޔަށް ނަގައިގެން ގާއިމުކޮށްފައިވާ މަރުކަޒުތަކަށް ބޭނުންވާ އިމާރާތްތައް އެޅުމުގެ މަސައްކަތް ކުރިއަށް ގެންދާނީ އެފަހުން ކަމަށް ވެސް އޭރު މިނިސްޓަރު ވިދާޅުވެފައިވެ އެވެ.
ރަށްތަކަށް ދިމާވެފައިވާ ކަރަންޓުގެ މައްސަލައަށް އިޝާރަތްކުރައްވާ ރައީސް ވިދާޅުވި ގޮތުގައި ރޯދަ މަސް ފެށޭއިރަށް އެ މައްސަލައަށް ހައްލެއް ގެނެސްދެއްވާނެ ކަމުގަ އެވެ. އެގޮތުން ޖެނެރޭޓަރު ބޭނުންވާ ރަށްރަށަށް ޖެނެރޭޓަރު ފޯރުކޮށްދީ އިންސްޓޯލް ކުރުމުގެ އިތުރުން ވަސީލަތްތައް ހުރި ތަންތަނުގައި ހިދުމަތް އިތުރަށް ރަނގަޅު ކުރުމުގެ މަސައްކަތް ކުރައްވާނެ ކަމަށެވެ. އެކަމަށް ބޭނުންވާ މަސައްކަތްތައް ހިނގަމުން އަންނަ ކަމުގަ އެވެ.
މަސައްކަތުގެ ތެރެއިން ވާދޫއަށް ދިމާވެފައިވާ ކަރަންޓުގެ މައްސަލައަށް ވެސް ހައްލު ލިބިގެންދާނެ ކަމަށް އެމަނިކުފާނު ވިދާޅުވި އެވެ.
ދަތުރުފުޅުގައި ރައީސްގެ އަރިހުގައި މިނިސްޓަރުންނާއި ސަރުކާރުގެ ބައެއް މުއައްސަސާތަކުގެ އިސްވެރިން ބައިވެރިވެވަޑައިގަންނަވަ އެވެ.
ރައީސް މާޅޮސްމަޑުލު އުތުރުބުރީގެ ބައެއް ރަށްރަށަށް ކުރައްވާ މި ދަތުރުފުޅު ނިންމަވާލައްވައި، މާލެ ވަޑައިގެންނެވުމަށް ހަމަޖެހިފައި ވަނީ ބުރާސްފަތި ދުވަހު އެވެ.
