ޕީއެންސީން މިދިޔަ މުއްދަތުގައި ހުށަހެޅި ހުރިހާ ފޯމެއް ބާތިލްކުރަން ޖެހޭ: ފައްޔާޒު

ވެރިކަންކުރާ ޕީއެންސީން މި ފަހުން ހުށަހެޅި ހުރިހާ ފޯމުތަކެއް އިލެކްޝަންސް ކޮމިޝަން (އީސީ) އިން ބާތިލްކުރަން ޖެހޭ ކަމަށް އިދިކޮޅު އެމްޑީޕީގެ ޗެއާޕާސަންގެ ފައްޔާޒު އިސްމާއީލް މިރޭ ވިދާޅުވެއްޖެ އެވެ.

Ads by Hajj Corporation

ޕީއެންސީއަށް 75،000 މެންބަރުން ހަމަކުރުމަށް ކެމްޕެއިން ވަރުގަދައަށް ކުރިއަށް ދަނިކޮށް ބައެއް ސައްހަ ނޫން ފޯމުތަކެއް ހުށަހެޅިކަން ވަނީ ފެންމަތިވެފަ އެވެ. ފެންމަތިވީ އިދިކޮޅު އެމްޑީޕީގެ ގައުމީ މަޖިލީހުގެ ބައެއް ސީނިއާ މެންބަރުން ވެސް އެ މީހުނަށް ނޭނގި ޕީއެންސީ ދަފްތަރުގައި އޮވެގެނެވެ.

އޭގެ ފަހުން ޑިޕާޓްމަންޓް އޮފް ނެޝަނަލް ރެޖިސްޓްރޭޝަން (ޑީއެންއާރު) ގެ މީޓިން ރޫމުގައި ހައުސިން މިނިސްޓްރީގެ ސިޔާސީ މުވައްޒަފުންތަކެއް ތިބެގެން ޕީއެންސީއަށް ފޯމު ފުރައިދޭ މަންޒަރު ފެންނަ ފޮޓޯތަކެއް ސޯޝަލް މީޑިއާގައި ދައުރުވި އެވެ.

މިއަދު ނޫސްވެރިންނަށް އެ ތަން ދައްކައިލި އެވެ. އަދި ސްޓޭޓް މިނިސްޓަރު އަބްދުއްމަޖީދު ވިދާޅުވި ގޮތުގައި ފޯމުތައް ފުރީ އެ ތަނުގަ އެވެ. އެއީ ޑީއެންއާރުން ދައުލަތުގެ ކޮންމެ އިދާރާއަކަށް ބޭނުން ކުރުމަށް ދޫކުރާ މީޓީން ރޫމެއް ކަމަށާއި އެ ތަނުގައި ސިޔާސީ މުވައްޒަފުން ފޯމު ފުރަން ތިބީ އެ އުސޫލުން ކަމަށެވެ.

ނަމަވެސް ނޫސްވެރިން ކުރި ހޫނު ސުވާލުތަކަށް ސީދާ ޖަވާބެއް ނުދީ ޑީއެންއާރުގެ ވެރިން ވަޑައިގަތުމުން، ނޫސްވެރިން އެތައް އިރަކު އެ ތަނުގައި ޝަކުވާ ކުރަން ތިއްބެވެ.

މި އިވެންޓު ކަވަރުކޮށް ދެ ނޫހެއްގައި ޝާއިއުކުރި ހަބަރުތަކުގެ ލިންކް 'އެކްސް'ގައި ޕޯސްޓް ކުރެއްވުމަށް ފަހު ފައްޔާޒު ވިދާޅުވީ "ނޫސްވެރިން ކުރި ސުވާލުތަކަށް ޖަވާބު ނުދެވުމުން ހޯމް މިނިސްޓްރީގެ އިސްވެރިން ފިލި ނަމަވެސް މިކަމުގެ ހަގީގަތް މިއޮތީ ހާމަވެފައި،" ކަމަށެވެ.

ދެންނަ އޮންނަ ރިޔާސީ އިންތިހާބުގައި ވާދަކުރެއްވުމުގެ ޝައުގުވެރިކަން ވެސް ފާޅުކުރައްވާފައިވާ ފައްޔާޡު ވިދާޅުވީ "ޕީއެންސީއަށް 'ވަގު' ފޯމު ފުރީ ރައްޔިތުންގެ ޒާތީ މައުލޫމާތު ރައްކާކުރެވިފައިވާ ދައުލަތުގެ މުއައްސަސާއެއްގެ ތެރޭގައި، ދައުލަތުގެ މުދާ ބޭނުންކޮށްގެން، އެ ތަނުގެ މުވައްޒަފުން،" ކަމަށެވެ.

"ޑީއެންއާރުގެ ވެރިން މި ކުށަށް އިއުތިރާފުވެފައި ވާތީ މައްސަލަ ބަލައި އިދާރާތަކުން ފިޔަވަޅު އަޅަން ޖެހޭ، އަދި ޕީއެންސީން އީސީއަށް މިދިޔަ މުއްދަތުގައި ހުށަހެޅި ފޯމުތައް ބާތިލުކުރަން ޖެހޭ،" ރައްޔިތުންގެ މަޖިލީހުގެ މެންބަރު ކަމާއި ކުރީގެ ސަރުކާރުގައި އިކޮނޮމިކް މިނިސްޓަރު ކަން ކުރައްވާފައިވާ ފައްޔާޒު ވިދާޅުވި އެވެ.