ސިނގިރެޓް އޮޅާ ސާމާނު އެތެރެކުރުން އަދި މަނަލެއް ނުވޭ، ޝިޕްމަންޓް ހިފެހެއްޓީ އެހެން މައްސަލައެއްގައި
ސިނގިރެޓް އޮޅަން ބޭނުންކުރާ ސާމާނުތަކެއް ހިމެނޭ 6 ޝިޕްމަންޓެއް މޯލްޑިވްސް ކަސްޓަމުން ހިފެހެއްޓީ އެހެން މައްސަލައެއްގައިކަން އަދި ސިނގިރެޓް އޮޅަން ބޭނުންކުރާ ސާމާނު (މެޝިން، ފިލްޓަރު، ކަރުދާސް) މަނާކުރަން އަދި މިހާތަނަށް ނިންމާފައިނުވާކަން ހާމަވެއްޖެ އެވެ.
ދުންފަތް ކޮންޓްރޯލް ކުރުމާ ބެހޭ ގާނޫނަށް ގެނައި އިސްލާހާ އެކު ދުންފަތް އޮޅަން ބޭނުންކުރާ ތަކެތި ހިފަހައްޓަން ހެލްތު މިނިސްޓްރީން އޮތީ ކަސްޓަމްސް އަށް އަންގާފަ އެވެ. އެ އިސްލާހުގައި ދުންފަތް އޮޅަން ބޭނުންކުރާ ސާމާނަކީ މަނާ އެއްޗެއް ކަމުގައި ސީދާ ބުނެފައެއް ނުވެ އެވެ. އެކަމަކު ހެލްތުން މަނާކުރަނީ އެ ތަކެއްޗަކީވެސް ސިނގިރެޓް އުފައްދަން ރާއްޖޭގައި ބޭނުންކުރާ ތަކެތީގެ ގޮތުގަ އެވެ.
ހެލްތުން އެހެން އަންގާފައި އޮއްވައި ރާއްޖެ އެތެރެކުރި ސިނގިރެޓް އޮޅާ ޝިޕްމަންޓުތަކެއް ކަސްޓަމުން ހިފެހެއްޓި އެވެ. އޭރު މައުލޫމާތު ލިބިފައިވާ ގޮތުން އެ ޝިޕްމަންޓް އެހެން ހިފެހެއްޓީ ސިނގިރެޓް އޮޅާ ސާމާނުތަކަކަށް ވާތީ އެވެ.
އެކަމަކު ހޯމް މިނިސްޓްރީގެ އިސް އޮފިޝަލަކު "ދެން" އަށް މިއަދު ވިދާޅުވީ އެ ޝިޕްމަންޓު ހިފެހެއްޓީ ދުންފަތް އޮޅާ ސާމާނުތަކެއް އޭގައި ހުރެގެން ނޫން ކަމަށެވެ. އެ ހިފެހެއްޓީ އެހެން މައްސަލައެއްގައި ކަމަށެވެ. އެކަމަކު ސީދާ ކޮން މައްސަލައެއްގައިކަމެއް އެނގިފައެއް ނުވެ އެވެ.
"ކަސްޓަމުން ބަލަންޖެހޭ ކަންކަން ބެލުމަށް އަބަދުވެސް އެކި މުދާ ހިފަހައްޓާ އުސޫލުން ހިފެހެއްޓީ އެކަންކަން ބެލުމަށް ފަހު ދޫކޮށްލާނީ ދޫކުރަންވާ ތަކެތި" އޮފިޝަލް ވިދާޅުވި އެވެ.
ސިނގިރެޓް އޮޅާ ސާމާނު ހިފަހައްޓަން ހެލްތުން އަންގާފައިވާއިރު އެ ޝިޕްމަންޓު ދޫކޮށްލީ ސަބަބާ ގުޅޭ ގޮތުން ސުވާލުކުރުމުން ކަސްޓަމްސްގެ މީޑިއާ އޮފިޝަލް "ދެން" އަށް ވިދާޅުވީ ކަސްޓަމުން ހިފަހައްޓަނީ ގާނޫނުގައި ބަޔާންކޮށްފައިވާ ތަކެތި އެކަނި ކަމަށެވެ.
"އިމްޕޯޓް އެކްސްޕޯޓް ގާނޫނުން އަދި އެހެން ގަވައިދަކުންވިޔަސް މަނާނުކުރާ ކަމަށް ވަންޏާ ނުހިފެހެއްޓޭނެ" އޮފިޝަލް ވިދާޅުވި އެވެ.
އޭނާގެ ވާހަކައިން ދޭހަވީ ސިނގިރެޓް އޮޅާ ސާމާނު ރާއްޖެ އެތެރެކުރުން އަދި މިހާތަނަށް މަނާކޮށްފައިނުވާ ކަމެވެ.
ޤާނޫނު ހަދާ ފަރާތްތަކުގެ އިޚްލާސްތެރިކަން ހުރި މިންވަރު ވަރަށް ސާފު
ސިނގިރޭޓްގެ މައްސަލަވަނީ ސަރުކާރުން ރޭވިގޮތާއި އިނދިކޮޅަށް ގޮއްސައެވެ. ރޫޓަކީ އެންމެ ހިނގާ ސިނގިރޭޓްގެ ބާވަތްތަކުގެ ސޯލް ޑިސްޓްރިބިއުޓަރ އެވެ. ދުވާލަކު 6 ލައްކައަށްވުރެ ގިނަ ސިނގިރޭޓް ވިކެމުންދިޔަ ރޫޓު މިހާރުވަނީ ބަނގުރޫޓް ވާން ގާތްވެފައެވެ. މަހެއްގެ ތެރޭ އެތައް ކޮންޓެއިނަރެއް ސ.ޑިސްޓްރިބިއުޓަރ ނަގަންޖެހޭ، އެކަމަކު މިހާރު އެކަން ނުވާގޮތް ވެފައިވާއިރު، ގިނަ ބަޔަކު ސިނގިރޭޓްގެ އަގު ބޮޑުކަމުން އެ ދޫކޮށްލައި، އޮޅައިގެން ބުއިމަށް ބަދަލުކޮށްފިއެވެ. ރޫޓް އޯނަރަކީ ސިޔާސީންނަށް ފައިސާގެ ލޯނު ދެއްވާ، އެހީތެރިވާ ބޭފުޅަކަށްވާތީ ސަރުކާރު ވަނީ ހާސްކަމެއްގައެވެ. ދުވަސްކޮޅަކުން އޮޅައިގެން ބޯ ސާމާނު އެއްކޮށް މަނާކޮށް، ސީދާ ސިނގިރޭޓް ބުއިމަށް މަޖުބޫރުވާ ގޮތަށް ކަންކަން ބަދަލުކުރުމަށް ދަނީ މަޝްވަރާ ކުރެވެމުންނެވެ.