ގާޒާއަށް ލިބުނު ނަސްރު ފާހަގަކުރަން މާލޭގައި މާދަމާ އެއްވުމެއް ބާއްވަނީ
އިޒްރޭލުން ފަލަސްތީނުގެ ގާޒާއަށް ދެމުން އައި ލާއިންސާނީ ހަމަލާތައް ހުއްޓާލުމަށް އެއްބަސްވުމާ ގުޅިގެން އެކަން ފާހަގަކުރަން ބޮޑު އެއްވުމެއް ބާއްވަން ނިންމައިފި އެވެ.
ހަމަލާތައް ހުއްޓާލުމަށް ނިންމައި އިޒްރޭލާއި ފަލަސްތީނުން ގައިދީންނާއި ރަހީނުން މިނިވަންކުރަން އެއްބަސްވީ ހުސްވި ހަފުތާގަ އެވެ. އެ އެއްބަސްވުން އިޒްރޭލުގެ ސެކިއުރިޓީ ކެބިނެޓުން ފާސްކޮށް، މުޅި ކެބިނެޓުން ވެސް ވަނީ އެކަމަށް ރުހުންދީފަ އެވެ. އެއްބަސްވުމާ އެއްގޮތަށް ދެ ފަރާތުން ވަނީ ގައިދީންނާއި ރަހީނުން ބަދަލުކުރުމުގެ މަސައްކަތް ފަށާފަ އެވެ.
"ގާޒާގެ ނަސްރު" ގެ ނަމުގައި ބާއްވާ ބޮޑު އެއްވުން އިންތިޒާމު ކުރަނީ އިސްރާ އެސޯސިއޭޝަނުންނެވެ.
މި ބޮޑު އެއްވުން އޮންނާނީ މާދަމާ ހަވީރު އާޓިފިޝަލް ބީޗުގަ އެވެ. އެއްވުން ފަށަން ނިންމާފައި ވަނީ 4:15 ގަ އެވެ.
އިޒްރޭލުން ގާޒާއަށް ހަމަލާދޭން ފަށާފައި ވަނީ 2023 ވަނަ އަހަރުގެ އޮކްޓޫބަރު މަހުގެ 7 ވަނަ ދުވަހު ހަމާސް އާއި ގުޅިފައިވާ ބައިވެރިން ދިން ކުއްލި ހަމަލާތަކާ ގުޅިގެންނެވެ. ހަމަލާތަކުގައި އެ ގައުމުން ހާހަކަށް ވުރެ ގިނަ މީހުން މަރާލައި، 250 އަށް ވުރެ ގިނަ މީހުން ރަހީނުކުރި އެވެ.
ބަދަލުގައި ހަމަލާތައް ދޭން ފަށައި 15 މަސް ދުވަހުގެ ތެރޭގައި އިޒްރޭލުން ވަނީ ފަލަސްތީނުން 47،000 އަށް ވުރެ ގިނަ މީހުން ޝަހީދުކޮށްލާފަ އެވެ. އޭގެ ތެރޭގައި 17،400 އަށް ވުރެ ގިނަ ކުޑަކުދިން ހިމެނެ އެވެ. ހަމަލާތަކުގައި 110،700 އަށް ވުރެ ގިނަ މީހުންނަށް އެކިވަރުގެ އަނިޔާތައް ލިބިފައިވާއިރު، 11،100 އަށް ވުރެ ގިނަ މީހުން ވީނުވީއެއް ނޭނގި ގެއްލިފައިވެ އެވެ.
ހަމަލާތައް ހުއްޓާލުމާ ގުޅިގެން އިންސާނީ އެހީ ފޯރުކޮށްދޭ ޖަމާއަތްތަކުން ދަނީ ގާޒާގެ އާންމުންނަށް ބޭނުންވާ ކާބޯތަކެއްޗާއި ތެލާއި ބޭހުގެ ބާވަތްތަކާ އަދި ޒަރޫރީ ކަންކަމަށް ބޭނުންވާ ތަކެތި ފޯރުކޮށްދިނުމުގެ މަސައްކަތް ކުރަމުންނެވެ.
ފަލަސްތީނާ އެކު ދިވެހިން ތިބިކަން ހާމަކުރުމުގެ ގޮތުން މީގެކުރިން ވެސް ވަނީ މާލެ ސަރަހައްދުގައި ބޮޑު އެއްވުމެއް ބާއްވާފަ އެވެ. ސަރުކާރާއި ކުންފުނިތަކުންނާއި އެކި ޖަމިއްޔާ ޖަމާއަތްތަކުން ކަމާ ގުޅުންހުރި އެކި ހަރަކާތްތައް ރާއްޖޭގެ އެކި ސަރަހައްދުތަކުގައި އިންތިޒާމުކޮށްގެން ކުރިއަށް ގެންގޮސްފައިވެ އެވެ.
އެގޮތުން "ފަލަސްތީނާ އެކު ދިވެހިން" ގެ ނަމުގައި ގައުމީ ފެންވަރުގައި ޓެލެތޯނެއް ނިމުނު އަހަރުގެ ޖޫން މަހު ވަނީ ކުރިއަށް ގެންގޮސްފަ އެވެ. ޓެލެތޯނުން ޖުމްލަ 1،248،826.56 ޑޮލަރު ލިބިފައިވާ ކަމަށް އެކަން އޮޑިޓްކުރި ފަރާތުން ފާހަގަކޮށްފައިވެ އެވެ.
އެ ޓެލެތޯނުން ލިބުނު ފައިސާ ޔުނައިޓެޑް ނޭޝަންސް ރިލީފް އެންޑް ވޯކްސް އޭޖެންސީ ފޯ ޕަލަސްތީނިއަން ރެފިއުޖީޒް (އަންރުވާ) އަށް މިދިޔަ އޮގަސްޓު މަހުގެ 20 ވަނަ ދުވަހު ފޮނުވާފައިވާ ކަމަށް ފޮރިން މިނިސްޓްރީން އޮކްޓޫބަރު މަހުގެ ފަހުކޮޅު ބުނެފައިވެ އެވެ.
އިތުރަށް ބުނެފައިވާ ގޮތުގައި ދިވެހި ރައްޔިތުން ހަދިޔާކުރި ފައިސާ ހަރަދުކުރާނެ ކުރު މުއްދަތުގެ އަދި ދިގު މުއްދަތުގެ ޕްރޮގްރާމްތަކާއި ޕްރޮޖެކްޓުތަކާ ގުޅޭގޮތުން ސަރުކާރުން އަންރުވާ އާއެކު މަޝްވަރާ ކުރަމުންދާ ކަމުގަ އެވެ.
Ads by STO
