ރާއްޖޭގައި ފުރަތަމަ ފަހަރަށް ގައިނޮކޮލޮޖިކަލް ސާޖިކަލް ވޯކްޝޮޕެއް
އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އާއި ސޮސައިޓީ އޮފް އޮބްސްޓެޓްރިކްސް އެންޑް ގައިނޮކޮލޮޖިސްޓްސް އޮފް މޯލްޑިވްސް (އެސްއޯޖީއެމް) ގުޅިގެން ރާއްޖޭގައި ފުރަތަމަ ފަހަރަށް ގައިނޮކޮލޮޖިކަލް ސާޖިކަލް ވޯކްޝޮޕެއް ފަށައިފި އެވެ.
ވޯކްޝޮޕް ކުރިއަށް ގެންދިއުމަށް ޗައިނާގެ ބެއިޖިންގައި މަސައްކަތްކުރާ ތަޖުރިބާކާރު ޕްރޮފެސަރު ޑރ. ޝިއައުމިންގް ގޮންގް ވަނީ ރާއްޖެ ވަޑައިގެންފަ އެވެ. ގޮންގްއަކީ މިނިމަލް އިންވޭސިވް ގައިނަކޮލޮޖިކް ސާޖަރީ (އެމްއައިޖީއެސް) ގެ ރޮނގުގައި ފާހަގަކުރެވޭ ދުނިޔޭގެ ފެންވަރުގެ މާހިރެކެވެ.
ގޮންގްއަކީ ރަހިމުގެ ފައިބްރޮއިޑް އެބްލޭޝަން ތެރަޕީގެ އާ މަގެއް ހުޅުވާލި ފަރާތެކެވެ. އަހަރަކު 500 އަށް ވުރެ ގިނަ ސާޖަރީ ހަދާއިރު، އޭގެ ތެރެއިން 95 އިންސައްތައަކީ މިނިމަލީ އިންވޭސިވް އުކުޅުތައް ބޭނުންކޮށްގެން ހަދާ ސާޖަރީތަކެވެ. އޭނާއަކީ ސިންގަލް-ޕޯޓް ލެޕޮރޮސްކޯޕިކް ސާޖަރީ، ވީ-ނޯޓްސް ސާޖަރީ އަދި ލިންސް ހިސްޓަރޮސްކޮޕިކް ރިސެކްޝަން ޓެކްނިކް ފަދަ ޕްރޮސީޖާތައް ޗައިނާއަށް ތައާރަފުކުރި ފަރާތެވެ.
ރަހިމުގެ ފައިބްރޮއިޑްސް އަދި އެޑިނޯމައޯސިސް ފަރުވާއަށް ހައި-އިންޓެންސިޓީ ފޯކަސްޑް އަލްޓްރާސައުންޑް (އެޗްއައިއެފްޔޫ) އަދި މައިކްރޯވޭވް ރޭޑިއޯފްރީކުއެންސީ ޓެކްނިކްތައް ބޭނުންކޮށްގެން 2009 ވަނަ އަހަރުން ފެށިގެން ކުރި މަސައްކަތްތަކުން މި ދާއިރާއަށް ގޮންގް ވަނީ ގިނަ ކުރިއެރުންތަކެއް ހޯދައިދީފަ އެވެ.
ގައިނޮކޮލޮޖިކަލް ސާޖިކަލް ވޯކްޝޮޕްގައި ގައިނޮކޮލޮޖިސްޓުންނާއި އޮޕަރޭޓިން ރޫމް ނަރުހުންނަށް އަމަލީ ތަމްރީނު ދިނުމަށް ވަނީ ހަމަޖެހިފަ އެވެ. ވޯކްޝޮޕްގައި ހުޅުމާލެ ހޮސްޕިޓަލާއި ޓްރީޓޮޕް ހޮސްޕިޓަލާއި އޭޑީކޭ ހޮސްޕިޓަލް އަދި މެޑިކާ ހޮސްޕިޓަލުގެ 7 ގައިނޮކޮލޮޖިސްޓުން ބައިވެރިވެ އެވެ.
މި ވޯކްޝޮޕް އިފުތިތާހުކޮށްދެއްވީ ހެލްތު މިނިސްޓަރު އަބްދުﷲ ނާޒިމް އިބްރާހިމެވެ. ވޯކްޝޮޕް އިފުތިތާހުކޮށްދެއްވުމަށް ފަހު ނާޒިމް ދެއްކެވި ވާހަކައިގައި ރާއްޖޭގައި ގައިނޮކޮލޮޖީގެ ފަރުވާ ކުރިއެރުވުމަށް މި ހަރަކާތުގެ މުހިންމުކަން ފާހަގަކުރެއްވި އެވެ.
ގައިނޮކޮލޮޖިކަލް ސާޖިކަލް ވޯކްޝޮޕްގެ ސަބަބުން ރާއްޖޭގައި މިހާރު ވެސް އަންހެނުންގެ ހާއްސަ ބަލިތަކުގެ ފަރުވާއަށް ލިބެންހުރި ހިދުމަތްތައް އިތުރަށް ފުރިހަމަވެގެންދާނެ ކަމަށް އައިޖީއެމްއެޗުން ބުންޏެވެ. އަންހެނުންގެ ބަލިތަކަށް ހާއްސަ ދިވެހި ސާޖަނުންނަށް މުހިންމު ތަޖުރިބާތަކެއް ލިބިގެންދާނެ ކަމަށެވެ. އަދި މިކަމަކީ އަންހެނުން ބާރުވެރިކުރުމުގެ ގޮތުން އަންހެނުންގެ ސިއްހަތަށް އަހައްމިޔަތުކަން ދިނުމަށް އެޅޭ މުހިންމު ފިޔަވަޅެއްކަން ވެސް ފާހަގަކުރި އެވެ.
