ރޯދައަށް މާލެ ސާފުކުރަން ސިޓީ ކައުންސިލާއި ވެމްކޯއިން ނުކުންނަނީ
ކުރިއަށް އޮތް ރޯދަ މަހަށް ތައްޔާރުވުމުގެ ގޮތުން މާލެ ސިޓީގެ މަގުތައް ސާފުކުރުމުގެ މަސައްކަތް، މާލެ ސިޓީ ކައުންސިލާއި ވޭސްޓް މެނޭޖްމަންޓް ކޯޕަރޭޝަން (ވެމްކޯ) ގުޅިގެން ކުރުމަށް ނިންމައިފި އެވެ.
އެގޮތަށް ނިންމާފައި ވަނީ، ވެމްކޯއިން ކައުންސިލާ އެކު ބޭއްވި ބައްދަލުވުމަކަށް ފަހު އެވެ. އެ މަސައްކަތުގެ ތެރެއިން މަގުތަކަށް އުކާފައި ހުންނަ ކުނިތައް ނަގައި، މަގުތައް ސާފުކުރުމަށް ވަނީ ނިންމާފަ އެވެ. މި މަސައްކަތް ފެށުމަށް ހަމަޖެހިފައި ވަނީ އަންނަ މަހުގެ 15 ވަނަ ދުވަހު އެވެ.
ވެމްކޯ އާއެކު ބޭއްވި ބައްދަލުވުމުގައި ވާހަކަ ދައްކަވަމުން މާލެ ސިޓީގެ މޭޔަރު އާދަމް އާޒިމް ވިދާޅުވީ ރޯދަ މަހަކީ އާންމުން އަޅުކަމައިގެން އުޅޭ މަހެއް ކަމަށެވެ. އެހެންކަމުން މާލޭގެ މަގުތަކާއި ގޯޅިތަކާއި ހުސްބިންތަކާ އަދި ޕާކުތައް ސާފުތާހިރުކޮށް ބޭއްވުމަކީ ވަރަށް މުހިންމު ކަމެއް ކަމަށެވެ. އަދި މަގުތައް ރީތިކޮށް ބޭއްވުމަށް ކައުންސިލުން މަސައްކަތް ކުރަމުން ގެންދާނެ ކަމަށް ވެސް މޭޔަރު ވިދާޅުވި އެވެ.
"މި މަސައްކަތުގައި ވެމްކޯ އާ ގުޅިގެން މަސައްކަތް ކުރުމަށް ނިންމީ، މާލޭގެ ރައްޔިތުންނަށް އިތުރު ފަސޭހަތަކެއް ހޯދައިދިނުމުގެ ގޮތުން،" އާޒިމް ވިދާޅުވި އެވެ.
މި މަސައްކަތުގެ ތެރޭގައި މަގުތަކަށް އުކާފައި ހުންނަ ކުންޏާއި ބާ ވެހިކަލްތައް ނެގުމާ އަދި މަގުތަކުގެ ކާނުތައް ސާފުކުރުން ހިމެނެ އެވެ. މާލެ ސިޓީ ސާފުތާހިރުކޮށް ބޭއްވުމަށް ސިޓީ ކައުންސިލުގެ ކޮމިއުނިޓީ ޔުނިޓުން ވަނީ ހާއްސަ ޓާސްކްފޯހެއް ވެސް އެކުލަވާލާފަ އެވެ.
ރޯދަ މަހަކީ އާންމު މަސްމަހަށް ވުރެ ކުނިބުނިތައް އިތުރުވާނެ މަހަކަށްވާތީ، މަގުތަކަށް ކުނި ނޭޅުމަށާއި މާލެ ސާފުކޮށް ބޭއްވުމަށް، ކުރަމުންދާ މަސައްކަތަށް އެއްބާރުލުން ދިނުމަށް މާލެ ސިޓީ ކައުންސިލުން ވަނީ އިލްތިމާސްކޮށްފަ އެވެ.
Ads by STO
