ދުންފަތް ކޮންޓްރޯލް ކުރުމާ ބެހޭ ގާނޫނަށް އަމަލުކުރަން ފެށިފަހުން އެ ގާނޫނާ ހިލާފުވެ، ވޭފް ބޭނުންކޮށްގެންނާއި ގެންގުޅެގެން ކުރި ޖޫރިމަނާތަކުގެ ޖުމުލަ 195،500 ރުފިޔާއަށް އަރާފައިވާ ކަމަށް ފުލުހުން ބުނެފި އެވެ.
ފުލުހުން ހިއްސާކޮށްފައިވާ ތަފާސްހިސާބުތަކުން ދައްކަނީ:
- މިދިޔަ މަހު ވޭޕްގެ 13 މައްސަލައެއްގައި 12 މީހުން، ޖުމުލަ 65،000 ރުފިޔާ ޖޫރިމަނާކޮށްފައިވޭ
- މިދިޔަ ޖެނުއަރީ މަހު ވޭޕްގެ 14 މައްސަލައެއްގައި 12 މީހުން، ޖުމުލަ 70،000 ރުފިޔާ ޖޫރިމަނާކޮށްފައިވޭ
- މިދިޔަ ޑިސެމްބަރު މަހު ވޭޕްގެ 14 މައްސަލައެއްގައި 11 މީހުން، ޖުމުލަ 60،500 ރުފިޔާ ޖޫރިމަނާކޮށްފައިވޭ
ޖޫރިމަނާ ކުރި ނަމަވެސް ފުލުހުން ވޭޕް އަތެއް ނުލަ އެވެ.
މީގެ ކުރިން ފުލުހުން ބުނީ، ޖޫރިމަނާ ކުރެވޭ ފަރާތްތަކަށް އެކަމުގެ މައުލޫމާތު މޯބައިލް ފޯނުގެ ޒަރިއްޔާއިން ކުރު މެސެޖެއް މެދުވެރިކޮށް ފޮނުވާނެ ކަމަށެވެ. އަދި އެ މެސެޖުގައި، ޖޫރިމަނާ ދެއްކުމަށް ވާރު ޕޭގެ ޕޭމަންޓް ލިންކެއް ހިމެނިފައިވާނެ ކަމަށް ފުލުހުން ބުނެފައިވެ އެވެ.
އެ ގާނޫނަށް ގެނައި އިސްލާހު ރައީސް ޑރ. މުހައްމަދު މުއިއްޒު ތަސްދީގު ކުރެއްވީ މިދިޔަ ނޮވެމްބަރު މަހުގެ 14 ވަނަ ދުވަހު އެވެ. އެ އިސްލާހާ ގުޅިގެން ޑިސެމްބަރު މަހުގެ 15 ވަނަ ދުވަހުން ފެށިގެން އީ-ސިނގިރޭޓާއި ވޭފް ކުރުމަށް ބޭނުން ކުރާ އާލާތްތަކާއި އެ އެއްޗެއްސާ އެކު ބޭނުން ކުރުމަށް ތައްޔާރުކޮށްފައިވާ އުފެއްދުންތައް ރާއްޖޭގައި ވިއްކުމާއި ހިލޭ ބެހުމާ އަދި ބޭނުން ކުރުން ވަނީ މަނާކޮށްފަ އެވެ.
ކޮމެންޓް