ޔުމްނު ވެއްޓުނު މައްސަލަ: ރިޕޯޓުގައި ފާހަގަކުރި ކަންކަމާ ގުޅިގެން ފިޔަވަޅު އަޅަން ރައީސް އަންގަވައިފި
މިދިޔަ އެޕްރީލް މަހުގެ 18 ވަނަ ދުވަހު މާލޭގެ ގެއެއްގެ ފުރާޅު މައްޗަށް ހައްވާ ޔުމްނު ރަޝީދު ވެއްޓުނު މައްސަލަ ތަހުގީގުކުރަން ރައީސް ޑރ. މުހައްމަދު މުއިއްޒު އުފެއްދެވި ހާއްސަ ކޮމިޝަންގެ ރިޕޯޓުގައި ފާހަގަކުރައްވާފައިވާ ކަންކަން ތަންފީޒުކުރެއްވުމަށް އަޅުއްވަންޖެހޭ ފިޔަވަޅުތައް އެޅުއްވުމަށް ހޯމް މިނިސްޓްރީ އަދި ހެލްތު މިނިސްޓްރީއަށް އެމަނިކުފާނު މިއަދު އަންގަވައިފި އެވެ.
ކޮމިޝަންގެ ރިޕޯޓުގައި އެ މައްސަލައި ތަހުގީގުކުރުމުގައި ފުލުހުންގެ އިދާރާގެ ބޮޑެތި މައްސަލައެއް ފާހަގަކޮށްފައި ވެއެވެ.
އޭގެ ތެރޭގައި
- ހާދިސާގެ މައުލޫމާތު ލިބުމުން، ފުލުހުންގެ ކޮމާންޑް ސެންޓަރުން އިންވެސްޓިގޭޝަން އޮފިސަރަށް މައުލޫމާތު ދީފައިވަނީ ގަޑިއެއްހާއިރު ފަހުންކަމަށްވާތީ ކުށުގެ ވެށިން ތަހުގީގަށް ބޭނުންވާނެ ހެކި، ގަރީނާ، ސީން އޮފް ކްރައިމް އޮފިސަރު ނަގައި ނިމުނު ފަހުން އިންވެސްޓިގޭޝަން އޮފިސަރު ކުށުގެ ވެއްޓަށް ދިޔުން
- ކްރައިމް ސީން ޕްރޮސެސްކޮށް ނިމުނުއިރު ވެސް، މައްސަލަ ތަހުގީގުކުރާ އޮފިސަރަކު ސީންއަށް ހާޒިރުވެފައި ނެތުމުގެ ސަބަބުން، ތަހުގީގަށް ބޭނުންވާ ފުރިހަމަ މަައުލޫމާތާއި ހެކިތައް އެވަގުތު ހޯދިފައިނުވުން
- ކުށުގެ ވެށްޓަށް ދިޔަ ސީން އޮފް ކްރައިމް އޮފިސަރު، ކްރައިމް ސީން ޕްރޮސެސްކުރިއިރު، ކުށުގެ ވެށީގެ ހުރިހާ ސަރަހައްދެއް އެކަށީގެންވާ ގޮތެއްގައި ޕްރޮސެސްކޮށްފައި ނުވުމާއި ސީން އޮފް ކްރައިމް އޮފިސަރެއްގެ ހައިސިއްޔަތުން ކުރަންޖެހޭ ގިނަ ކަންތައްތަކެއް ނުކޮށް، ކުޑަ ވަގުތުކޮޅެއްގެ ތެރޭގައި ސީން ދޫކޮށްލުން
- ޔުމްނު ވެއްޓިފައި އޮތް ހ.މިޓާޒްގެ ފުރާޅުމަތިން އެއްވެސް ހެއްކެއް ލިބޭތޯ މަސައްކަތެއް ނުކޮށް ކުށުގެ ވެށީގެ ބައުންޑްރީއެއް ކަނޑަނާޅައި ކުށުގެ ވެށި ރައްކާތެރިނުކުރުން.
އެހެންކަމުން އެ ކަންކަން ތަކުރާރުވެ ނުދިނުމަށް ޓަކައި، ފުލުހުންގެ އެސްއޯޕީތައް ރިވައިސްކޮށް، މުވައްޒަފުން އަހުލުވެރިކޮށް، ތަމްރީނުދީ އެ ހާދިސާގައި ފަރުވާކުޑަކުރި މުވައްޒަފުންގެ މައްސަލަ ބަލައި، އެ މުވައްޒަފުންނާމެދުގައި އިސްލާހީ ފިޔަވަޅު އެޅުމަށް ރިޔާސީ ކޮމިޝަނުން ދީފައިވާ ލަފަޔާއި އެއްގޮތަށް އަޅަން ޖެހޭ ފިޔަވަޅުތައް އެޅުމަށް ރައީސް ވަނީ އަންގަވައިފަ އެވެ.
ކޮމިޝަންގެ ރިޕޯޓުގައި ހެލްތު މިނިސްޓްރީގެ ދަށުން ހިންގާ އައިޖީއެމްއެޗް އަދި ފެމިލީ ޕްރޮޓެކްޝަން ޔުނިޓްގެ ބޮޑެތި މައްސަލަތަކެއް ވެސް ފާހަގަކޮށްފައި ވެއެވެ.
އޭގެ ތެރޭގައި
- ޔުމްނުއަށް ޖިންސީ އެއްވެސް އަނިޔާއެއް ލިބިފައިވޭތޯ ބެލުމަށް ޓަކައި އައިޖީއެމްއެޗްގެ އިންޓެންސިވް ކެއާ ޔުނިޓް (އައިސީޔޫ) އިން އައިޖީއެމްއެޗުގެ އެފްޕީޔޫއަށް އެންގުމަށްފަހު، އެފްޕީޔޫގެ މުވައްޒަފު އެޓެންޑުނުވުމުން އެކަން ނުކޮށް ދޫކޮށްލުން
އެހެންކަމުން އައިޖީއެމްއެޗާއި އެ ހޮސްޕިޓަލުގައި ހުންނަ އެފްޕީޔޫގެ އިދާރީ ކަންކަން ހަރުދަނާކުރުމަށް ޓަކައި އަޅަންޖެހޭ ފިޔަވަޅުތައް އެޅުމަށް ރައީސް މުއިއްޒު ވަނީ ހެލްތު މިނިސްޓްރީއަށް އަންގަވައިފަ އެވެ.
ރައީސް ވަނީ ޔުމްނު ވެއްޓުނު ހާދިސާގައި އިހުމާލުވި ރައުދު އަހުމަދު ޒިލާލުގެ ބޭބެގެ ދާއުދު އަހުމަދު ޒިލާލުގެ މައްޗަށް ވެސް ފިޔަވަޅު އަޅަން އަންގަވައިފަ އެވެ.
ދާއުދުގެ މައްޗަށް ފިޔަވަޅު އަޅަން އެންގީ ފުލުހުންނަށް ދޮގު ބަޔާން ދިނުމާއި ޔުމްނު ވެއްޓުނުކަން އެނގިހުރެ އިދާރާތަކަށް ނާންގައި ތިބިކަމަށް ރިޕޯޓުގައި ފާހަގަކޮށްފައިވާތީ އެވެ.
Ads by STO
