ފަލަސްތީނުގެ ފުޓްބޯޅަ ޓީމުގެ ތަމްރީންތައް ރާއްޖޭގައި ބާއްވައިދޭން އެދިއްޖެ
ފަލަސްތީނުގެ ފުޓްބޯޅަ ޓީމުގެ ތަމްރީންތައް ރާއްޖޭގައި ބާއްވައިދޭން އެ ގައުމުން އެދިއްޖެ އެވެ.
ފުޓްބޯޅަ އެސޯސިއޭޝަން އޮފް މޯލްޑިވްސް(އެފްއޭއެމް)އިން ބުނީ ފަލަސްތީނުން އެދުނީ އޭޝިއަން ޗެމްޕިއަން ލީގު(އޭއެފްސީ) ކަޕްއަށް ކޮލިފައި ވުމަށް ފަލަސްތީނުގެ 17 އަހަރުން ދަށުގެ ފުޓްބޯޅަ ޓީމު ޕްރެކްޓިސް މެޗުތައް ރާއްޖޭގައި ކުރެވޭނެ ގޮތް ހަދައިދިނުމަށް ކަމަށެވެ.
އެ ހުށަހެޅުމާ ގުޅިގެން އެކަން ސަރުކާރަށް ވެސް އަންގާފައިވާ ކަމަށް ވެސް އެފްއޭއެމްއިން ބުންޏެވެ.
ނަމަވެސް އެކަމާ ގުޅޭ ގޮތުން ސަރުކާރުން ވަކި ގޮތެއް ނިންމިކަމެއް އަދި ސާފެއް ނުވެއެވެ.
ފަލަސްތީނުގެ ޓީމުން އެ ގައުމުގައި ޕްރެކްޓިސްކުރުމުގައި ދަތިތައް ކުރިމަތިވެގެން އުޅޭނީ އިސްރާއިލުން ޣައްޒާގައި މިހާރު ހިންގަމުންދާ ގަތުލު އާންމާއި ހުޅަނގު އައްސޭރީގައި ވެސް ފަލަސްތީނުގެ މީހުންގެ ގެތައް ސުންނާފަތިކޮށް ހިންގަމުންދާ އޮޕަރޭޝަންތަކާ ގުޅިގެން ނެވެ.
އިސްރާއިލުން ޣައްޒާގެ ފުޓްބޯޅަ ކުޅުންތެރިންވެސް ޝަހީދުކޮށްލައިފައިވާ އިރު ފީފާއިން އިސްރާއިލް ސަސްޕެންޑްކުރަން ގޮވާލާ ގޮވުން ވަނީ ވަރަށް ބޮޑަށް އަޑު ގަދަވެފަ އެވެ.
އެހެން ނަމަވެސް މިހާތަނަށް ވެސް އިސްރާއިލާމެދު ފީފާއިން ފިޔަވަޅެއް ނާޅަ އެވެ.
