މަސްތުވާތަކެއްޗާއެކު 9 މީހަކު ރަސްގެތީމުން ހައްޔަރުކޮށްފި
މަސްތުވާތަކެއްޗާއެކު ރ. ރަސްގެތީމުން 9 މީހަކު ހައްޔަރުކޮށްފިކަމަށް މޯލްޑިވްސް ޕޮލިސް ސަރވިސްއިން ބުނެފިއެވެ.
ކައުންޓަރ ނާކޮޓިކްސް އިންޓެލިޖެންސަށް ލިބުނު މަޢުލޫމާތަކާ ގުޅިގެން މި ނޮވެމްބަރު މަހުގެ 1 ވަނަ ދުވަހު ހިންގުނު އޮޕަރޭޝަންއެއްގައި ރ. ރަސްގެތީމު ގެއެއް ބަލައިފާސްކޮށް 9 މީހަކު ހައްޔަރަށް ގެންދެނެވުނީ އެ ގޭގައި މަސްތުވާތަކެތި ބޭނުންކުރަން ތިއްބާކަމަށް ފުލުހުން މަޢުލޫމާތުދެއެވެ.
މި އޮޕްރޭޝަނުގައި އެ ގެއިން މަސްތުވާތަކެތިކަމަށް ޝައްކުކުރެވޭ އެއްޗެހި އަޅާފައިވާ 15 ކަރުދާސްކޮޅާއި ދެ ރަބަރު ޕެކެޓު ފެނިފައިވާކަމަށާއި މަސްތުވާތަކެތި ބޭނުން ކުރުމަށް ގެންގުޅޭ ބައެއް ތަކެތި އެގެއިން ފެނިފައިވާކަމަށް ފުލުހުން ބުނެއެވެ. މީގެ އިތުރުން 43،500 ދިވެހި ރިފިޔާ ވެސް ފެނިފައިވާކަމަށް ފުލުހުން ބުނެފައިވެއެވެ.
ފުލުހުންގެ ހައްޔަރަށް މި މައްސަލައާ ގުޅިގެން ގެނެވުނު މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން، އަޙްމަދު ނިހާން (23އ) އާއި އިބްރާހީމް ޢާދިލް (38އ) ޢާއި އާދަމް ނަސީމް (30އ) އަދި އިބްރާހީމް ރިޝާމް (36އ) ވަނީ 10 ދުވަހަށް ބަންދުކުރުމަށް އަމުރުކޮށްފަކަމަށް ފުލުހުން މަޢުލޫމާތުދެއެވެ.
އަދި އަމީނާ މުޙައްމަދު (32އ) އާއި އައްޔޫބު އާދަމް (33އ) އާއި ފަރީޙާ ބިންތި ޢަލީ ވަޙީދު (21އ) އާއި އަޙްމަދު ވިޝާމް (41އ) އަދި ޙުސައިން ސަރްޙާން (30އ) ވަނީ 30 ދުވަހަށް ބަންދުކުރުމަށް އަމުރުކޮށްފަކަމަށް ފުލުހުން ބުނެފައިވެއެވެ.
ފުލުހުން ބުނެފައި ވަނީ މި މައްސަލަ އިތުރަށް ތަހްޤީޤު ކުރަމުންދާކަމަށެވެ.
Ads by STO
