ޚަބަރު އިޖުތިމާޢީ ދުނިޔެ

ދިވެހީންގެ ޙާލަތު ބެލުމަށް ލަންކާއަށް ގުޅާނެ ޚާއްޞަ ހޮޓްލައިނެއް ގާއިމްކޮށްފި

ފާތިމާ އިބްރާހީމް ، ދެން އޮންލައިން
ސްރީލަންކާ / ފޮޓޯ: ދެން މީޑިއާ

ލަންކާއަށް ކުރިމަތިވެފައިވާ ފެންބޮޑުވުމުގެ ޙާދިޞާގައި ލަންކާގައި ދިރިއުޅޭ ދިވެހީންގެ ޙާލަތު ބެލުމަށް ގުޅާނެ ޚާއްޞަ ހޮޓްލައިނެއް ގާއިމްކޮށްފައިވާ ކަމަށް ލަންކާގައި ހުންނަ ދިވެހި ހައިކޮމިޝަނުން ވިދާޅުވެއްޖެއެވެ.

Ads by MPL
Ads by MPL

ޕީއެސްއެމް ނިއުސްއަށް މަޢުލޫމާތު ހިއްސާ ކުރައްވަމުން ހައިކޮމިޝަނުން ވިދާޅުވީ، ދިވެހިންގެ ޙާލު ވަރަށް ގާތުން ބަލަމުންދާ ކަމަށާއި އެއްވެސް ދިވެހި ޢާއިލާއަކަށް ގެއްލުމެއް ލިބިގެން ރިޕޯޓްކޮށްފައި ނުވާ ކަމަށެވެ. އަދި ކޮންމެހެން ކުރަން ޖެހިގެން ނޫނީ އެއްވެސް ޙާލަތެއްގައި ދަތުރުފަތުރު ނުކުރުމަށާއި ޒަރޫރީ ބޭނުންތަކަށް ބޭނުންވާ ކާޑުގެ ބާވަތްތަކާއި، ފެނާއި ބޭސް ފަދަ ތަކެތި ހޯދައި، ރައްކާތެރި ތަންތަނުގައި ބެހެއްޓުމަށް ހައިކޮމިޝަނުން އިލްތިމާސް ކުރައްވައެވެ.

"އެއްވެސް އެހީތެރިކަމެއް ބޭނުން ވެއްޖެ ޙާލަތެއްގައި ކޮމިޝަންގެ ހޮޓްލައިން 768816666 އަށް ގުޅުއްވާ." ހައި ކޮމިޝަނުން ވިދާޅުވިއެވެ.

މީގެއިތުރުން އެންމެ ބޭފުޅުންގެ މުހިންމު ލިޔެކިޔުންތައް ރައްކާތެރިކޮށް ބެލެހެއްޓުމަށާއި މޯބައިލް ފޯނު އަބަދުވެސް ޗާޖުކޮށްފައި ބޭއްވުމަށް ހައި ކޮމިޝަނުން އިލްތިމާސް ކުރައްވައެވެ. އަދި ބިން ތިރި ސަރަހައްދުތަކުގައި ދިރިއުޅުއްވާ ބޭފުޅުންނާއި މޫދު ކައިރި ސަރަހައްދުތަކުގައި ދިރިއުޅޭ ފަރާތްތަކުން، ރައްކާތެރި ހިސާބުތަކަށް ދިއުމަށް ވެސް ކޮމިޝަނުން އިލްތިމާސް ކުރައްވައެވެ.

ލަންކާގެ ރަސްމީ އިދާރާތަކާ ހަވާލާދީ ނޫސްތަކުން ރިޕޯޓުކޮށްފައިވާ ގޮތުގައި މިހާތަނަށް 69 އަށްވުރެ ގިނަ މީހުން ވަނީ މަރުވެފައިވާކަމަށާއި 34 މީހަކު ގެއްލިގެން ރިޕޯޓު ކޮށްފައިވާއިރު، 18000 މީހަކަށް ވަގުތީ ބޯހިޔާވަހިކަން ވަނީ ފޯރުކޮށްދީފައެވެ. މީގެއިތުރުން މި ތޫފާނުގެ ސަބަބުން 3000 ގޭބިސީއަށް ގެއްލުން ވެފައިވާ ކަމަށް ވެސް ރިޕޯޓުކޮށްފައިވެއެވެ.