ލަންކާގައި ޙާލުގަ ޖެހުނު ދިވެހި 3 ޢާއިލާއަކަށް އެހީތެރިކަން ފޯރުކޮށްދީފިން: ދިވެހި ހައި ކޮމިޝަން
ސްރީލަންކާގެ ވެރިރަށް ކޮލަންބޯގައި ފެންބޮޑުވުމުގެ ސަބަބުން ގޭގައި ތާށިވެފައިތިބި ދިވެހި 3 ޢާއިލާއަކަށް އެހީތެރިކަން ފޯރުކޮށްދީފައިވާ ކަމަށް ދިވެހި ހައި ކޮމިޝަނުން ބުނެފިއެވެ.
ޕީއެސްއެމްއަށް މަޢުލޫމާތު ދެމުން ހައި ކޮމިޝަނުން ބުނީ، އެހީތެރިކަން ފޯރުކޮށްދިން ޢާއިލާތަކުގައި ކުޑަ ކުދިންނާއެކު ޖުމްލަ 12 މީހުން ތިބިކަމަށާއި އެ ޢާއިލާތައް މިހާރު ވަނީ ލަންކާގައި ދިރިއުޅޭ އެ ޢާއިލާތަކުގެ ރައްޓެހިންނާއި ތިމާގެ މީހުން ދިރިއުޅޭ ގެތަކަށް ބަދަލުވެފައެވެ. އަދި އެއް ޢާއިލާ ވަނީ އެމީހުން އަމިއްލަ ޚަރަދުގައި ހޮޓަލްއަކަށް ބަދަލުވެފައެވެ.
ގޭގައި ތާށިވެފައިތިބި ޢާއިލާތައް ރައްކާތެރި ސަރަހައްދަށް ބަދަލުކުރެވުނީ އެ ސަރަހައްދުގައި ހަރަކާތްތެރިވަމުންދިޔަ ފުލުހުންގެ އެހީތެރިކަމާއެކުގައި ކަމަށާއި އެ ސަރަހައްދުގައި 3 ފޫޓާއި 7 ފޫޓާ ދެމެދަށް ފެންބޮޑުވެފައިވާކަމަށް ހައި ކޮމިޝަނުން މަޢުލޫމާތުދެއެވެ. އަދި އެ ޢާއިލާތައް ދިރިއުޅޭ ގެ ތަކުގެ ފުރަތަމަ ފަންގިފިލާގައި ހުރި ސާމާނަށް ގެއްލުން ލިބިފައި ހުންނާނެކަމަށް ފަލާކުރެވޭ ކަމަށް ވެސް ހައި ކޮމިޝަނުން ބުނެއެވެ.
މީގެއިތުރުން ކޮމިޝަނުން ބުނީ، އެ ޤައުމުގައި ދިރިއުޅޭ ދިވެހިންގެ ތެރެއިން 1273 ފަރާތަކަށް ގުޅާ، ޙާލު ބަލާފައިވާކަމަށާއި އެމީހުންގެ ޙާލު ރަނގަޅު ކަމަށެވެ. އަދި އެހީތެރިކަމަކަށް ބޭނުންވި 45 އަށްވުރެ ގިނަ ފަރާތަށް އެހީ ފޯރުކޮށްދީފައިވާނެ ކަމަށާއި މިހާރުވެސް އެހީތެރިކަން ބޭނުންވާ ފަރާތްތަކަށް އެހީވުމުގެ މަސައްކަތް ހުއްޓުމެއްނެތި ކުރަމުން އަންނަކަމަށެވެ.
