މެމްބަރުންގެ އަދަދު ހަމަނުވާތީ، ސިޔާސީ ޕާޓީތަކަށް ފައިސާ ދޫކުރާ ލިސްޓުން އަދާލަތު ޕާޓީ ކަޓައިފި
މެމްބަރުންގެ އަދަދު ހަމަނުވާތީ، ސިޔާސީ ޕާޓީތަކަށް ފައިސާ ދޫކުރާ ލިސްޓުން އަދާލަތު ޕާޓީ ކަޓައިފި އެެވެ.
އިލެކްޝަންސް ކޮމިޝަންއިން މިއަދު އެކްސްގައި ކުރި ޕޯސްޓެއްގައި ބުނީ އަންނަ ވަނަ އަހަރުގެ ބަޖެޓު ރައްޔިތުންގެ މަޖިލީހުން ފާސްކުރި އިރު މިދިޔަ ނޮވެމްބަރު މަހު 25ގެ ނިޔަލަށް، 10،000 މެންބަރުން ހަމަވެފައިވަނި ހަތަރު ސިޔާސީ ޕާޓީއެއްގެ ކަމަށެވެ.
އެ ހަތަރު ޕާޓީގައި ޕީއެންސީ، އެމްޑީޕީ، ޖުމްހޫރީ ޕާޓީ އަދި އެމްޑީއޭ ހިމެނޭ އިރު ކުރިން އެ ލިސްޓުގައި ހިމެނެމުން އައި އަދާލާތު ޕާޓީ ނުހިމެނެ އެވެ.
އިލެކްޝަންސް ކޮމިޝަންއިން ޖޫން މަހާ ހަމައަށް އާންމުކުރި ލިސްޓުގައިވާ ގޮތުން އަދާލާތު ޕާޓީގައި 9000 މީހުންވެސް ހަމަ ނުވެ އެވެ.
ފާއިތުވި އަހަރުތަކުގައި ގަވައިދުން ކަހަލަ ގޮތަކަށް ފައިސާ ލިބެމުން އައި އަދާލަތު ޕާޓީއަށް މިދިޔަ އަހަރުވެސް އިލެކްޝަންސް ކޮމިޝަންއިން 1.7 މިލިއަން ރުފިޔާ ދޫކުރި އެވެ.
އަދާލާތު ޕާޓީގެ މެމްބަރުންގެ އަދަދު 10،000 އިން ދަށަށް ގޮސްފައިވާ އިރު އެ ޕާޓީގެ ރައީސް އިމްރާން އަބްދުﷲ ދިރިއުޅުއްވަން ގެންދަވަނީ ތައިލެންޑުގަ އެވެ.
ތައިލެންޑުގައި ހުންނަވައިގެން ރައީސް ޑރ. މުހައްމަދު މުއިއްޒުއަށް ދޭތެރެ ދޭތެރެއިން ވަރަށް ބޮޑަށް ފާޑުވިދާޅުވެ އެކްސްގައި ޕޯސްޓުތައް ކުރެއްވި ނަމަަވެސް އަދާލަތު ޕާޓީން ސިޔާސީ މާބޮޑު ހަރަކާތެެއް ނުބާއްވާތާވެސް އެތައް ދުވަހެެއް ވަނީ ވެފަ އެވެ.
