ހައިކޯޓުގެ ފަނޑިޔާރު ނިޔާޒު ރިޓަޔާކުރައްވައިފި
ހައިކޯޓުގެ ފަނޑިޔާރުކަމުގެ މަގާމުން މުހައްމަދު ނިޔާޒު މިއަދު ރިޓަޔާކުރައްވައިފި އެވެ.
ޝަރަފުވެރިކަމާއެކު ފަނޑިޔާރުކަމުގެ މަގާމުން މިއަދު ވަކިވެވަޑައިގެންނެވިކަން ހާމަކޮށް ހައި ކޯޓުގެ ރަސްމީ އެކްސް އެކައުންޓުން ކުރި ޕޯސްޓެއްގައި ނިޔާޒް ކޮށްދެއްވާފައިވާ އަގުހުރި ހިދުމަތްތަކަށް ޝުކުރު ދަންނަވާފައިވެ އެވެ.
ނިޔާޒް ހައިކޯޓުގެ ފަނޑިޔާރު ކަމުގެ ހުވާކުރެއްވީ، 2018 ވަނަ އަހަރުގެ ޖެނުއަރީ މަހުގެ 25 ވަނަ ދުވަހުއެވެ.
ނިޔާޒްވަނީ ޖޭއެސްސީގެ ނާއިބު ރައީސްކަން މިދިޔަ އަހަރުގެ މާޗު މަހުގެ 20 ވަނަ ވަނަ ދުވަހުން ފެށިގެން، 22 އޮކްޓޫބަރުއާ ހަމައަށް ފުރުއްވައިފަ އެވެ.
ނިޔާޒް ކުރިން ފުރުއްވާފައިވާ މަގާމުތަކުގެ ތެރޭގައި، ހދ. ޖުޑީޝަލް ދާއިރާގެ އިސް މެޖިސްޓްރޭޓްކަމާއި، ހދ. ވައިކަރަދޫ ކޯޓުގެ މެޖިސްޓްރޭޓްކަން ހިމެނެއެވެ. އޭގެ އިތުރުން މިނިސްޓްރީ އޮފް ޖަސްޓިސްގެ ލީގަލް އެސިސްޓެންޓްކަންވެސް އޭނާ އަދާ ކުރެއްވި އެވެ.
ނިޔާޒަކީ މެލޭޝިއާގެ އިންޓަނޭޝަނަލް އިސްލާމިކް ޔުނިވާސިޓީއިން ޝަރީއަތާއި ގާނޫނުގެ ރޮނގުން މަތީ ތައުލީމު ހާސިލު ކުރައްވައިގެން ހުންނެވި ބޭފުޅެކެވެ.
