ހުޅުމާލޭގެ ތިންވަނަ ފިޔަވަހީގެ ބިން ހިއްކައި ނިންމައިފި
ހުޅުމާލޭގެ ތިންވަނަ ފިޔަވަހީގެ ބިން ހިއްކައި ނިންމާލައި، ގޯތި ހަވާލުކުރަން ތައްޔާރުވެއްޖެއެވެ.
ހުޅުމާލެ ތިންވަނަ ފިޔަވައްސަކީ މާލެ ސަރަހައްދުގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ ދަތިކަމަށް ހައްލު ހޯދައިދިނުމަށް ކުރިއަށް ގެންދިޔަ މަޝްރޫއުއެކެވެ. ކުރީ ސަރުކާރުން ފެށި މި މަޝްރޫއު މި ސަރުކާރުން ނިންމާލާފައިވަނީ ހޮލެންޑުން 2 ޑްރެޖަރު ގެނެސްގެންނެވެ.
މި ޑްރެޖަރުތަކާއެކު މި މަޝްރޫއު މިއަހަރުގެ ފުރަތަމަ ކުއާޓަރުގައި ނިންމާލެވޭނެ ކަމަށް މީގެ ކުރިން ރައީސް ޑރ. މުހައްމަދު މުއިއްޒު ވަނީ ވިދާޅުވެފައެވެ.
މި މަޝްރޫއުގެ ދަށުން ހުޅުމާލެ ތިންވަނަ ފިޔަވަހިން 63 ހެކްޓަރުގެ ބިން ވަނީ ހިއްކާފައެވެ. މި މަސައްކަތް ނިންމާލާފައިވަނީ 2 މަސް ދުވަސް ތެރޭގައެވެ.
ރައީސްގެ ވައުދުފުޅާ އެއްގޮތަށް، އެތަނުން ދޫކޮށްފައިވާ ގޯތިތައް ވަރަށް އަވަހަށް ހަވާލުކުރާނެއެވެ. އެތަނުން ދޫކުރާ 698 ގޯތީގެ ގުރުއަތު މިހާރުވަނީ ނަގާފައެވެ.
