ގިރާވަރުފަޅުން ދޫކުރާ ގޯތިތަކުގެ ގުރު ނެގުން ހޮނިހިރުގައި
ގިރާވަރުފަޅުގެ ލޭންޑް ޔޫސް ޕްލޭނަށް ބަދަލުތަކެއް އައިސްފައި ވާތީ، އެ ތަނުން ގޯތި ލިބުނު މީހުންގެ މެދުގައި އަންނަ ހޮނިހިރު ދުވަހު ގުރުއަތު ނަގަން ނިންމާފައިވާ ކަމަށް ހައުސިން މިނިސްޓްރީން ބުނެފިއެވެ.
ހައުސިން މިނިސްޓްރީން ރޭ ނެރުނު ބަޔާނެއްގައި ބުނީ، ކުރިން ހަދާފައިވާ ލޭންޑް ޔޫސް ޕްލޭންގައި 610 ގޯތި މަދުވާތީ، އާ ލޭންޑް ޔޫސް ޕްލޭނެއް ތައްޔާރުކޮށް މިދިޔަ ހޯމަ ދުވަހު ގެޒެޓްކޮށްފައިވާ ކަމަށެވެ.
އާ ޕްލޭނާ އެކު ގިރާވަރުފަޅުން 4،072 ގޯތި ދޫކުރުމަށް ވަނީ ހަމަޖެހިފައެވެ.
އެބަދަލާ އެކު، ގިރާވަރުފަޅުން ގޯތި ލިބުނު މީހުންނަށް ކަނޑައަޅާފައިވާ ބިމުގެ ސަރަހައްދުތަކަށް ބަދަލު އައިސް، އާ ލޮޓް ނަންބަރު ކަނޑައަޅާފައިވާ ކަމަށް މިނިސްޓްރީން ބުނެފައިވެއެވެ.
އެހެންކަމުން، އާ ޕްލޮޓްތަކުގެ ގުރުއަތު ނެގުން އޮންނާނީ އަންނަ ހޮނިހިރު ދުވަހުގެ 9:30ގައި ސޯޝަލް ސެންޓަރުގައެވެ. ގުރުއަތު ނަގާ ހޯލަށް ވަދެވޭނީ ބިން ލިބިފައިވާ ފަރާތް ނުވަތަ ފަރާތްތަކުގެ ތެރެއިން ކޮންމެ ޕްލޮޓަކަށް ވެސް އެކަކަށެވެ.
މިނިސްޓްރީން ބުނީ، ގުރުއަތު ނަގައިގެން ލިބޭ ޕްލޮޓް ހިޔާވަހި ޕޯޓަލް މެދުވެރިކޮށް ވަގުތުން އޮންލައިންކޮށް ފެންނާނެ ކަމަށާއި، އެ މީހަކަށް ލިބުނު ޕްލޮޓް ނަންބަރު އެސްއެމްއެސް މެދުވެރިކޮށް ފޮނުވާނެ ކަމަށެވެ.
ގިރާވަރުފަޅުން ދޫކުރާ ގޯތިތަކުގެ ތަފްސީލް:
- 1250 އަކަފޫޓިގެ 2603 ގޯތި
- 1650 އަކަފޫޓުގެ 1214 ގޯތި
- 2050 އަކަފޫޓުގެ 254 ގޯތި
- 2450 އަކަފޫޓުގެ 1 ގޯތި
ކޮމެންޓް