ރާއްޖޭގެ ޑިވޮލޮޕްމަންޓް ބޭންކަށް ވިޔަފާރި ފެށުމުގެ ހުއްދަ ދީފި
ސައްތައިން ސައްތަ ސަރުކާރުގެ ހިއްސާ އޮންނަ މޯލްޑިވްސް ޑިވޮލޮޕްމަންޓް ބޭންކް (އެމްޑީބީ)އަށް ވިޔަފާރި ފެށުމުގެ ހުއްދަ ދީފިއެވެ.
ރާއްޖޭގައި ޑިވެލޮޕްމަންޓް ބޭންކެއް ހުޅުވުމަށް ބޭނުންވާ ބޭންކިން ލައިސަންސް މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން އެމްޑީބީއަށް ދޫކުރީ 2024ވަނަ އަހަރުގެ އޮކްޓޯބަރު މަހުގެ 13ވަނަ ދުވަހުއެވެ. އެހެން ނަމަވެސް އޭގެ ފަހުން ދޮޅު އަހަރުހެއްހާ ދުވަސް ފާއިތުވިއިރު ވެސް އެ ބޭންކުން މާބޮޑު މަސައްކަތެއް އަދި ނުފަށައެވެ.
އެމްއެމްއޭއިން މިއަދު ބުނީ އެ ބޭންކަށް ވިޔަފާރި ފެށުމުގެ ހުއްދަ ދީފައިވާ ކަމަށެވެ.
އެމްއެމްއޭއިން ބުނީ އެ ބޭންކުގެ ހިދުމަތް ފެށުމުން، ދިގުމުއްދަތުގެ މާލީ އެހީތެރިކަން ހޯދުމަށް މަގުފަހިވެ، ރާއްޖޭގެ އިގުތިސާދު ދެމެހެއްޓެނިވި ގޮތެއްގައި ކުރިއެރުވުމަށް ބޮޑު އެހީތެރިކަމެއް ލިބިގެންދާނެ ކަމަށެވެ. އަދި މިއީ ރާއްޖޭގެ މާލީ ދާއިރާ ފުޅާކޮށް ހަރުދަނާކުރުމަށް ކުރެވޭ މަސައްކަތްތަކަށް ލިބުނު މުހިންމު ކުރިއެރުމެއް ކަންވެސް އެމްއެމްއޭއިން ފާހަގަކުރިއެވެ.
އިކޮނޮމިކް މިނިސްޓަރު މުހައްމަދު ސަޢީދު ކުރިން ވިދާޅުވީ، އެ ބޭންކަަކީ ރައީސް ޑރ. މުޙައްމަދު މުޢިއްޒުގެ މެނިފެސްޓޯގައި އިއުލާންކުރައްވައިފައިވާ އިގުތިސާދީ ތަރައްގީއަށް އެޅުނު ތާރީހީ މޭލުގަލެއް ކަމަށެވެ. އަދި އެ ބޭންކު މެދުވެރިކޮށް ކުރިމަގުގައި ރާއްޖޭގެ ރިސޯޓުތަކާއި ގެސްޓްހައުސްތައް ތަރައްގީކުރަން ބޭރުގެ ބޭންކުތަކާ ގުޅިގެން މާލީ އެހީތެރިކަން ހޯދޭނެ ކަމަށެވެ. އަދި އޭގެ ސަބަބުން ރިސޯޓުތަކުގެ ދިވެހިންގެ އަތްމައްޗަށް އަންނާނެ ކަމަށް ވެސް މިނިސްޓަރު ވިދާޅުވެފައި ވެއެވެ.
Ads by STO
