ޑްރަގު އެތެރެކޮށްފި ނަމަ މަރުގެ އަދަބުދޭ ގާނޫނަށް އަމަލުކުރަން ފަށައިފި
ރާއްޖެއަށް މަސްތުވާތަކެތި އެތެރެކޮށް، އެތަކެތީގެ ވިޔަފާރި ކުރާ މީހުންނަށް މަރުގެ އަދބު ހިމެނޭހެން ބޮޑެތި އަދަބުތައް ކަނޑައެޅުމުގެ ބާރު ލިބިދޭ އިސްލާހުތަކަށް މިއަދުން ފެށިގެން އަމަލުކުރަން ފަށައިފިއެވެ.
އެ އިސްލާހުގައިވާ ގޮތުގައި، މަސްތުވާތަކެތި އެތެރެކުރާ މީހަކަށް މަރުގެ އަދަބު ދެވޭނީ، ސުޕްރީމް ކޯޓުގެ މައްސަލަ ބަލާ ފަނޑިޔާރުންގެ ބެންޗުގެ އިއްތިފާގުން ހުކުމް ކުރުމުންނެވެ. އިއްތިފާގުން މަރުގެ ހުކުމް ކަނޑަނާޅުއްވާ ނަމަ އެ ހާލަތުގައި އެ މީހަކު އުމުރަށް ޖަލަށްލުމާ އެކު 100،000 ރުފިޔާއާއި 10،000،000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެ ކަމަށް ވަނީ ކަނޑައަޅައިފައެވެ.
އެ ބިލު މަޖިލީހުން ފާސްކޮށްފައި ވަނީ މިދިޔަ ޑިސެމްބަރު މަހުގެ ތިންވަނަ ދުވަހުއެވެ. އޭގެ ތިން ދުވަސް ފަހުން ރައީސް ޑރ. މުހައްމަދު މުއިއްޒު ތަސްދީގު ކުރެއްވި ބިލަށް އަމަލުކުރަން ފަށަން ކަނޑައަޅާފައިވާ ތިން މަހުގެ މުއްދަތު މިއަދު ހަމަވެ، އެ ގާނޫނަށް މިހާރު ވަނީ އަމަލުކުރަން ފަށައިފައެވެ.
މި އިސްލާހުގެ ދަށުން ތިން ހާލަތަކަށް ފެތޭ ބަރުދަނުގެ މަސްތުވާތަކެތި ފެނިއް ޖެނަމަ މަރުގެ އަދަބު ދެވޭނެއެވެ. އެއީ 350 ގްރާމަށް ވުރެ އިތުރު އަދަދެއްގެ ކެނެބިސްއާއި، 250 ގްރާމަށް ވުރެ އިތުރު އަދަދެއްގެ ޑައިފޯމިން، އެ ނޫން ބާވަތެއްގެ މަސްތުވާތަކެތި 100 ގްރާމަށް ވުރެ އިތުރު ނަމަ މަރުގެ އަދަބު ދެވޭނެއެވެ. އަދި އެ މީހަކު ރާއްޖެއަށް އެތެރެވާ އިރު، މަސްތުވާތަކެތި އެތެރެ ކުރުމުން ވެސް މަރުގެ އަދަބު ދެވޭނެއެވެ.
މި އިސްލާހަށް އަމަލުކުރަން ފެށުމުގެ ކުރިން މަސްތުވާތަކެތީގެ ގާނޫނުގެ ދަށުން ކަނޑައަޅާފައި އޮންނަ އެންމެ ބޮޑު އަދަބަކީ އުމުރަށް (25 އަހަރަށް) ޖަލަށްލުމާ އެކު އެއްލައްކަ ރުފިޔާއާއި 10 މިލިއަން ރުފިޔާއާ ދެމެދުގެ އަދަދަކަށް ޖޫރިމަނާ ކުރުމެވެ.
