400 އަކަފޫޓަށްވުރެ ކުޑަ ބިން އާއިލާ މީހަކަށް ދެވޭ ގޮތަށް ބަދަލުކުރަނީ
ސަރުކާރުން ދޫކުރާ ބޯހިޔާވަހިކަމެއް ލިބޭ ހާލަތުގައި، އެމީހާގެ ނަމުގައި އޮންނަ 400އަކަފޫޓަށްވުރެ ކުޑަ ބިން ދައުލަތަށް ދޫކޮށްލުމުގެ ބަދަލުގައި އާއިލާގެ އެހެން މީހަކަށް ދެވޭ ގޮތަށް އުސޫލު ބަދަލުކުރަން ނިންމާފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
މިހާރު އުސޫލުގައި އޮންނަނީ ސަރުކާރުން ދޫކުރާ ފްލެޓެއް ނުވަތަ ގޯއްޗެއް ލިބޭ ހާލަތެއްގައި، އެމީހެއްގެ ނަމުގައި 400އަކަފޫޓަށްވުރެ ކުޑަ ބިންކޮޅެއް އޮވެއްޖެނަމަ ދައުލަތަށް ދޫކޮށްލަން ޖެހޭނެ ކަމަށެވެ. ނަމަވެސް އާ ބަދަލާއެކު އެ ބިންކޮޅު އެމީހާގެ އަނބިމީހާ ނުވަތަ ފިރިމީހާ ނުވަތަ ދަރިން ނުވަތަ އެއްބަނޑުއެއްބަފާ މީހަކަށް ދެވިދާނެ ކަމަށް ރައީސް ވިދާޅުވިއެވެ.
ރައީސް ވިދާޅުވީ މިދިޔަ ސަރުކާރުން ހިންގި ބިންވެރިޔާ ސްކީމްގެ ތެރެއިން ބިން ދޫކޮށްލަން ޖެހޭ މީހުންނަށްވެސް އެއުސޫލުގެ ދަށުން އާއިލާގެ މީހަކަށް އެ ބިން ދެވޭނެ ކަމަށެވެ.
އެގޮތަށް ބަދަލުކުރީ ރައީސް ވިދާޅުވި ގޮތުގައި ބިމަށް ލޯނު ނަގައިގެން އިންވެސްޓްކޮށް، އެތަން ހަދާނަމަ އެކިކަހަލަ ތަކުލީފުތަކާއެކު ހަދާފައިވުންފަދަ ސަބުބަތަކާ ގުޅިގެން ކަމަށެވެ. މިހެން ހެދުމުން އެމީހެއްގެ އާއިލާތެރޭގައި އެ ބިން އޮންނާނެ ކަމަށް ރައީސް ވިދާޅުވިއެވެ.
އުސޫލަށް ބަދަލު ގެނައުމަށްފަހު މިއަދު ނޫނީ މާދަމާ ގެޒެޓްކުރާނެކަންވެސް ރައީސް ފާހަގަކުރެއްވިއެވެ.
ސަރުކާރަށް ދޫކޮށްލަންޖެހޭނެ ކަމަށް ހަމައެކަނި ޝަރުތު ކުރަނީ ސޯޝަލް ހައުސިން ސްކީމެއްގެ ދަށުން ލިބިފައިވާ ފްލެޓެއް ދޫކޮށްލާ ހަލާތުގައިކަން ވެސް ރައީސް ފާހަގަކުރެއްވިއެވެ.
