އޭދަފުށިން ޕީއެންސީއަށް ބޮޑު ކުރިއެރުމެއް: ރަށު ކައުންސިލްގެ ކޮންޓްރޯލް ސަރުކާރު ހިންގާ ޕާޓީއަށް
ބ. އަތޮޅުގެ ވެރިކަން ކުރާ ރަށް، އޭދަފުށީގެ ކައުންސިލްގެ އަޣުލަބިއްޔަތު ޕީޕަލްސް ނޭޝަނަލް ކޮންގްރެސް(ޕީއެންސީ)އިން ހޯދައި، އެ ރަށުގެ ސިޔާސީ ބާރުވެރިކަން ކަށަވަރުކޮށްފިއެވެ.
އޭދަފުށީ ކައުންސިލްގެ ރައީސްކަމަށް އަމިއްލަ ގޮތުން ވާދަކުރެއްވި ޝާމީ އިބްރާހީމް 802 ވޯޓާ އެކު (%41.5) އިންތިޚާބުވީ ނަމަވެސް، ކައުންސިލްގެ މެންބަރުކަމުގެ ގޮނޑިތައް ކާމިޔާބުކޮށް ކައުންސިލްގެ މެޖޯރިޓީ ހޯދާފައި ވަނީ ޕީއެންސީންނެވެ. ޕީއެންސީގެ ކެންޑިޑޭޓުން ކަމަށްވާ ޢަބްދުﷲ ރަޝީދު (781 ވޯޓު) އަދި ޢަލީ ޝަފީޤް (705 ވޯޓު) ވަނީ ކައުންސިލުން ޖާގަ ހޯއްދަވާފައެވެ.
މި އިންތިޚާބުގައި ފާހަގަކޮށްލެވޭ އަނެއް ކަމަކީ، އޭދަފުށީގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ރައީސްކަން އަމިއްލަ ކެންޑިޑޭޓް ޢައިޝަތު ރީތާ %64.5 ގެ ބޮޑު އަޣުލަބިއްޔަތަކުން ކާމިޔާބު ކުރެއްވި ނަމަވެސް، އެ ކޮމިޓީގެ ބާކީ ހުރި 4 ގޮނޑި ވެސް ކާމިޔާބު ކުރީ ޕީއެންސީގެ ކެންޑިޑޭޓުންނެވެ. މިއީ އޭދަފުށީގެ ސިޔާސީ މަސްރަޙަށް އައި ބޮޑު ބަދަލެއްގެ ގޮތުގައި ބެލެވެއެވެ.
ޕީއެންސީ ވަނީ ރަށްރަށުންނާއި ބައެއް މުހިންމު ދާއިރާތަކުން ކުރިއެރުން ހޯދާފައެވެ. ޚާއްސަކޮށް ބ. އޭދަފުށި ފަދަ ރަށްރަށުގެ ކައުންސިލްގެ އަޣުލަބިއްޔަތު ނެގުމާއި، ގިނަ ރަށްރަށުގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ ގޮނޑިތައް ކާމިޔާބު ކުރުމަކީ ސަރުކާރުގެ ސިޔާސަތުތަކަށް އަތޮޅުތެރެއިން ލިބެމުންދާ ތާއީދު ރަމްޒުކޮށްދޭ ކަމެކެވެ.
