ލ. އަތޮޅުގެ އާރުޓީއެލް ފެރީގެ ހިލޭ ދަތުރުތައް ނިމުމަކަށް، މާދަމާއިން ފެށިގެން ޓިކެޓް ވިއްކަން ފަށަނީ
ލ. އަތޮޅުގައި އަލަށް ތަޢާރަފުކުރި އާރުޓީއެލް ފެރީގެ ޚިދުމަތް އާންމުންނަށް ހިލޭ ތަޖުރިބާކުރުމަށް ދިން އެއް ހަފްތާގެ މުއްދަތު ހަމަވުމާ އެކު، މާދަމާއިން ފެށިގެން ދަތުރުކުރާ ފަރާތްތަކުގެ އަތުން ޓިކެޓަށް ފައިސާ ނަގަން ފަށާނެކަން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން އިޢުލާނުކޮށްފިއެވެ.
މި ބަދަލާ ގުޅިގެން ދެން އެ އަތޮޅުގައި ފެރީގެ ޚިދުމަތް ހޯދޭނީ ފައިސާ ދައްކައިގެންނެވެ. އެ ކުންފުނިން ހާމަކޮށްފައިވާ ގޮތުގައި، ދަތުރުވެރިންނަށް ފަސޭހަކަމާ އެކު އާރުޓީއެލްގެ ރަސްމީ ވެބްސައިޓް އަދި މޮބައިލް އެޕްލިކޭޝަން ބޭނުންކޮށްގެން ދުރާލާ ޓިކެޓު ގަނެވޭނެ އިންތިޒާމު މިހާރު ވަނީ ހަމަޖައްސައިދީފައެވެ. އަދި އިތުރު މަޢުލޫމާތު ސާފުކުރުމަށްނަމަ އެމްޓީސީސީގެ ހޮޓްލައިން ނަންބަރު 1650 މެދުވެރިކޮށް މަޢުލޫމާތު ލިބޭނެކަމަށް ވެސް އެފަރާތުން ބަޔާންކުރެއެވެ.
ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން ކަނޑައަޅާފައިވާ ގޮތުން، ލ. އަތޮޅުގެ އެތެރޭގެ ދަތުރުތަކަށް އަގު ކަނޑައަޅާފައި ވަނީ ރާސްތާގެ ދިގުމިނަށް ރިޢާޔަތްކުރުމަށްފަހުއެވެ. މިގޮތުން، އެންމެ ކުރު ރާސްތާގެ ދަތުރަކަށް އެއްކޮޅަށް 35 ރުފިޔާ ނަގާއިރު، އެންމެ ދިގު ދަތުރަކަށް ޗާޖުކުރާނީ 125 ރުފިޔާއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަމާޒު ހިފާފައި ވަނީ މިއަހަރުގެ ޖޫން މަސް ނިމުމުގެ ކުރިން ރާއްޖޭގެ ހުރިހާ އަތޮޅަކަށް ފެރީގެ ޚިދުމަތް ފޯރުކޮށްދިނުމަށެވެ. މިހާތަނަށް މި ޚިދުމަތް ނުފެށި އޮތީ މ، ކ، އއ، އދ އަދި ވ އަތޮޅުގައެވެ.
