މީދޫ ކައުންސިލް އިންތިޚާބުގެ އިތުރު ބުރު: 11 ޖެހުމާ ހަމައަށް 33 އިންސައްތަ ވޯޓުލައިފި

މިއަދު ކުރިއަށްދާ ދ. މީދޫ ކައުންސިލްގެ ރައީސްކަމުގެ މަޤާމަށް ބޭފުޅަކު އިންތިޚާބުކުރުމަށް ބާއްވާ އިތުރު ބުރުގެ ވޯޓުލުމުގައި، މިއަދު ހެނދުނު 11:00 އާ ހަމައަށް، ވޯޓުލުމުގެ ޙައްޤު ލިބިފައިވާ އާބާދީގެ 33 އިންސައްތަ ރައްޔިތުން އެ މީހުންގެ ވޯޓު ދީފައިވާކަމަށް އިލެކްޝަންސް ކޮމިޝަން (އީސީ)އިން ހާމަކޮށްފިއެވެ.

އީސީގެ އެންމެ ފަހުގެ މަޢުލޫމާތުތައް ދައްކާގޮތުން، މިހާތަނަށް ވޯޓުލީ މީހުންގެ ޖުމްލަ އަދަދު ވަނީ 341 އަށް އަރާފައެވެ. މީގެ ތެރޭގައި ގިނައީ ފިރިހެނުން ކަމަށްވާއިރު، އެއީ 220 ފިރިހެނުންނާއި 121 އަންހެނުންނެވެ.

މި އިންތިޚާބުގައި ވޯޓުލުމުގެ ޙައްޤު ޖުމްލަ 1049 ރައްޔިތަކަށް ލިބިފައިވެއެވެ. އޭގެ ތެރޭގައި 566 ފިރިހެނުންނާއި 483 އަންހެނުން ހިމެނޭއިރު، މީދޫގައި ޤާއިމުކޮށްފައިވާ މަރުކަޒުތަކަށް 587 މީހަކު ވޯޓުލުމަށް ވަނީ ހަމަޖެހިފައެވެ. އަދި މާލޭގައި ތިބި 462 ރައްޔިތަކު ވޯޓުލާނީ މާލޭގައި ބަހައްޓާފައިވާ ފޮށްޓަށެވެ.

މި ވޯޓުލުމަށްޓަކައި ޖުމްލަ ތިން ވޯޓުފޮށި ބަހައްޓާފައިވެއެވެ. އެއީ މީދޫގައި ހުންނަ ދ. އަތޮޅު މަދަރުސާގައި ބަހައްޓާފައިވާ ދެ ފޮށްޓާއި، މާލޭގައި ދިރިއުޅޭ ރައްޔިތުންނަށް ޚާއްޞަކޮށްގެން ދަރުމަވަންތަ ސްކޫލުގައި ބަހައްޓާފައިވާ އެއް ފޮށްޓެވެ. ކައުންސިލްގެ ރައީސްކަމަށް މި އިތުރު ބުރުގައި ވާދަކުރައްވަނީ ވެރިކަންކުރާ ޕީއެންސީގެ ފަރާތުން ސުހާ އިބްރާހީމް އަދި އެމްޑީއޭގެ ކެންޑިޑޭޓް މުޙައްމަދު ޝާހިދެވެ.