ހާފިޒުން އިމްތިހާނުކުރާ ކޮމިޓީތައް އިތުރުކުރަން ނިންމައިފި
ދިވެހިރާއްޖޭގައި ކީރިތި ޤުރުއާން ހިތުދަސްކުރާ ދަރިވަރުންގެ ނިސްބަތް އިންތިހާއަށް އިތުރުވަމުންދާތީ، ހާފިޒުން އިމްތިހާނުކުރާ ކޮމިޓީތައް ގިނަކުރުމަށް އިސްލާމީ ކަންތައްތަކާއި އައުޤާފާ ބެހޭ ވުޒާރާއިން މިއަދު ނިންމައިފިއެވެ.
މިކަން ހާމަކުރައްވައި އިސްލާމީ ކަންތައްތަކާއި އައުޤާފާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު މީސްމީޑިއާގައި ޙިއްސާކުރެއްވި މެސެޖެއްގައި ބަޔާންކުރައްވާފައި ވަނީ، ޤުރުއާނާ ބެހޭ ޤައުމީ މަރުކަޒުގެ އިމްތިހާނުކުރުމުގެ ނިޒާމު މިހާރަށްވުރެ ފުޅާކުރުމަށް ސަރުކާރުން ގަސްތުކުރައްވާ ކަމަށެވެ. މި ބަދަލާ އެކު، އެއްފަހަރާ އެތައް ދަރިވަރުންނަކަށް އިމްތިހާނުގައި ބައިވެރިވުމުގެ ފުރުޞަތު ފަހިވެގެންދާނެކަން ވަޒީރު ފާހަގަކުރެއްވިއެވެ.
ދިވެހި މުޖުތަމަޢުގައި ގިނަ އަދަދެއްގެ ހާފިޒުން އުފެއްދުމަކީ މި ސަރުކާރުން ޚާއްޞަ އަހައްމިއްޔަތުކަމެއް ދެއްވައިގެން ކުރިއަށްގެންދަވާ މަސައްކަތެކެވެ. އިސްލާމީ ކަންތައްތަކާ ބެހޭ ވުޒާރާގެ ތަފާސްހިސާބުތައް ދައްކާގޮތުން، ފާއިތުވި އަހަރުގެ ސެޕްޓެމްބަރު މަހާ ހަމައަށް ވެސް 1400 އަށްވުރެ ގިނަ ކުދިން އައީ ޤުރުއާން ހިތުދަސްކުރުމުގެ މަރުޙަލާ ފުރިހަމަކުރަމުންނެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅާ އެއްގޮތްވާ ގޮތުގެ މަތިން، ދައުލަތުން ހާފިޒުންނަށް ދެއްވަމުން ގެންދަވާ ޚާއްޞަ އިނާޔަތް މިހާރު ވަނީ ދެގުނައަށް ބޮޑުކުރައްވާފައެވެ. މީގެ އިތުރުން، ކުރިއަށް އޮތް ފަސް އަހަރުގެ ދުވަހުގެ ތެރޭގައި އެއްހާސް ހާފިޒުންނަށް ސަނަދު ދިނުމާއި، ކޮންމެ އަހަރަކު ސަތޭކަ ހާފިޒުން އުފެއްދުމަކީ ސަރުކާރުގެ ވަރަށް ބޮޑު އަމާޒެކެވެ.
