ސިނގިރޭޓު ވައްކަން: މައްސަލައިގެ ދައުވާތަކަށް އާއްޓޭ އާއި ދިގަލި އިންކާރުކޮށްފި

13.6 މިލިއަން ސިނގިރޭޓު ވަގަށް ނެގިކަމަށް ތުހުމަތުކުރެވޭ މައްސަލައިގައި، ރާއްޖޭގެ މަޝްހޫރު ދެ ވިޔަފާރިވެރިން ކަމަށްވާ ލޮޓަސް އަޙްމަދު އާރިފް (އާއްޓޭ)އާއި އެޕޯލޯ މުޙައްމަދު ވަޙީދު (ދިގަލި)ގެ މައްޗަށް ދައުލަތުން އުފުލާފައިވާ ދައުވާތަކަށް ކްރިމިނަލް ކޯޓުގައި އާދީއްތަ ދުވަހު އެ ފަރާތްތަކުން އިންކާރުކޮށްފިއެވެ.

މި ވައްކަމުގެ މޭސްތިރިން ކަމަށް ތުހުމަތުކޮށް މި ދެމީހުންގެ މައްޗަށް ކޮށްފައިވަނީ މުދަލެއްގެ މައްޗަށް ހުއްދަ ނޫން ގޮތުގައި ބާރު ހިންގުމަށް ރޭވުމާއި އެކަމުގައި ބައިވެރިވުމުގެ ކުށުގެ ދައުވާއެވެ. މީގެ ކުރިން ތަހުގީގު މަރުހަލާގައި ފުލުހުން އެ ދެމީހުން ހައްޔަރުކުރި ނަމަވެސް، ޕްރޮސެކިއުޓަރ ޖެނެރަލްގެ އޮފީހުން ފަހުން ވަނީ އެމީހުން ބަންދުން ދޫކޮށްލާފައެވެ. އެގޮތަށް ނިންމީ ކުށުގެ އަމަލުގައި ސީދާ ގޮތުން ބައިވެރިވިކަމުގެ ހެކި ނެތި، ހަމައެކަނި ކުށް ރޭވުމުގެ ތުހުމަތު އޮތުމުން ޝަރުތުތަކެއް ކަނޑައެޅުމަށްފަހުގައެވެ.

މި މައްސަލައިގައި ކަސްޓަމްސްގެ އިސް އޮފިސަރެއް ކަމަށްވާ ޒިވާރު އިސްމާއިލާއި އެމްޕީއެލްގެ ދެ މުވައްޒަފުން ކަމަށްވާ ހދ. ވައިކަރަދޫ ނޫރަލީގޭ، އަހުމަދު ޝަހީމާއި ހ. ރުމޭނިއާ، އަހުމަދު ފިރުސާންގެ މައްޗަށް އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތުގައި ބާރުހިންގުމާއި އެކަން ރޭވުމުގެ ދައުވާ ވެސް ވަނީ ކޮށްފައެވެ. އަދި މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ މުވައްޒަފެއް ކަމަށްވާ ސ. ހިތަދޫ ޗާންދަނީގޭ ހުސައިން ސާމިހުގެ އިތުރުން ސިނގިރޭޓް ދެ ކޮންޓެއިނަރު އުފުލި ދޯނީގެ ކެޕްޓަން އާދަމް ވަހީދުގެ މައްޗަށް އުފުލާފައި ވަނީ އެހެން މީހެއްގެ މުދަލެއްގެ މައްޗަށް ބާރު ހިންގުމުގެ ދައުވާއެވެ.

މީގެ އިތުރުން މި މައްސަލައިގައި ހިމެނޭ ބަންގްލަދޭޝް މީހެއް ކަމަށްވާ މުހައްމަދު އަލަމިން މިއާ އާއި ކ. ތުލުސްދޫ، ލިންކް ހަސަން އަބްދުއްރަހުމާނުގެ މައްޗަށް އުފުލާފައި ވަނީ އެހެން މީހެއްގެ މުދަލެއްގެ މައްޗަށް ބާރު ހިންގުމަށް ބައިވެރިވުމުގެ ދައުވާއެވެ. މި މީހުންގެ ތެރެއިން ދެ މީހަކު ވަނީ ކުށަށް އިއުތިރާފުވެ، ދައުލަތާ އެކު އިއުތިރާފުގެ އެއްބަސްވުން ހެދުމަށް އެދި ހުށަހަޅައިފައެވެ.

ފުލުހުންގެ ތަހުގީގަށް ހާމަވެފައިވާ ގޮތުގައި މި ޖަރީމާ ހިންގާފައި ވަނީ ވަރަށް ބޮޑަށް ރާވައިގެންނެވެ. އެގޮތުން، ކަސްޓަމްސްއިން ހިފަހައްޓާފައިވާ ދެ ކޮންޓެއިނަރާ އެއްގޮތް ދެ ކޮންޓެއިނަރު ކުރިން ތައްޔާރުކޮށް، އެމްޕީއެލް ސަރަޙައްދުގައި ހުރި އަސްލު ކޮންޓެއިނަރުތަކާ ބަދަލުކޮށްގެން ވަގަށް ނެރެފައިވެއެވެ. އޭގެ ފަހުން، ނަމާއި ރަޖިސްޓްރީ ބަދަލުކޮށްފައިވާ ދޯންޏެއްގައި އެ ތަކެތި ތިލަފުއްޓަށް ގެންގޮސް ކޮންޓެއިނަރުތައް ފަޅާލައި ސިނގިރޭޓުތައް ހުސްކޮށްފައިވެއެވެ. މިކަމުގައި ބޭނުންކުރި ކޮންޓެއިނަރުތަކުގެ ބައިތައް ތިލަފުށީގެ ސައިޓަކުން ފުލުހުން ވަނީ ހޯދާފައެވެ.