ފަރަންސޭސިވިލާތުގެ ނީސްގައި ކުރިއަށްދާ 'ބާރަތު އިނޮވޭޓްސް' އިވެންޓުގެ ތެރެއިން މޯދީ އާއި މެކްރޮން ބައްދަލުކުރައްވައިފި

އިންޑިއާގެ ބޮޑުވަޒީރު ނަރެންދުރަ މޯދީ އާއި ފަރަންސޭސިވިލާތުގެ ރައީސް އެމަނުއެލް މެކްރޮން އާދީއްތަ ދުވަހު ބައްދަލުކުރައްވައިފިއެވެ. މި ބައްދަލުވުން ކުރިއަށްދިޔައީ، ބޮޑުވަޒީރު މޯދީ ފަރަންސޭސިވިލާތުގެ ނީސްއަށް ކުރައްވަމުން ގެންދަވާ ދަތުރުފުޅުގައި ބައިވެރިވެވަޑައިގަންނަވާ 'ބާރަތު އިނޮވޭޓްސް' އިވެންޓުގެ ހަވާސާގައެވެ.

މި ބައްދަލުވުމަށްފަހު، އެކްސްގައި މޯދީ ކުރެއްވި ޕޯސްޓެއްގައި ވިދާޅުވީ، "އެކުވެރި ރައީސް މެކްރޮންއާ ނީސްއިން ބައްދަލުވުމުން ވަރަށް އުފާވެއްޖެ. އަޅުގަނޑުމެންގެ ދެ ގައުމުން 'އިނޮވޭޝަންގެ އަހަރު' ފާހަގަކުރަމުންދާ ދަނޑިވަޅެއްގައި 'ބާރަތު އިނޮވޭޓްސް' ގައި ބައިވެރިވެވަޑައިގަތީތީ ޝުކުރުދަންނަވަން" ކަމަށެވެ.

އިންޑިއާ އާއި ފަރަންސޭސިވިލާތާ ދެމެދު އުފެއްދުންތެރިކަމާއި އީޖާދީ ރޮނގުން ގުޅުން ބަދަހިވަމުން އަންނަކަން ފާހަގަކުރައްވައި، މެކްރޮން މި ހަރަކާތުގައި ބައިވެރިވެވަޑައިގަތުމަކީ ލިބިވަޑައިގަތް ވަރަށް ބޮޑު އުފަލެއްކަމަށް ވެސް މޯދީ ވިދާޅުވިއެވެ.

ނީސްއަށް ކުރެއްވި މި ދަތުރުފުޅުގެ ތެރެއިން ބޮޑުވަޒީރު މޯދީ ވަނީ ޚާއްސަ އިންވެސްޓަރުންނާއި ވެންޗަރ ކެޕިޓަލިސްޓުންނާ ވެސް ބައްދަލުކުރައްވާފައެވެ. އެ ބައްދަލުވުންތަކުގައި، އިންޑިއާގައި ފުޅާވަމުން އަންނަ އީޖާދީ މާހައުލާއި، އިންވެސްޓްކުރުމަށް ހުރި ފުރުސަތުތަކުގެ އިތުރުން، އިގްތިސާދީ ކުރިއެރުމަށް އަމާޒުކޮށްގެން ފަހަކަށް އައިސް ސިޔާސަތުތަކަށް ގެނެސްފައިވާ ހެޔޮ ބަދަލުތަކުގެ މައްޗަށް އެމަނިކުފާނު އަލިއަޅުވާލެއްވިއެވެ.

އިންޑިއާގެ މިނިސްޓްރީ އޮފް އެކްސްޓަރނަލް އެފެއަރޒް (އެމްއީއޭ) ގެ ތަރުޖަމާނު ރަންދީރު ޖައިސްވާލް އެކްސްގައި ހިއްސާކުރެއްވި މައުލޫމާތުގައިވާ ގޮތުން، ނީސްގައި ކުރިއަށްދާ 'ބާރަތު އިނޮވޭޓްސް 2026' ޕްލެޓްފޯމުގައި އިންވެސްޓަރުންނާއި ވީސީ ލީޑަރުންނާ ބޮޑުވަޒީރު ބައްދަލުކުރައްވައި، ޓެކްނޮލޮޖީގެ އެހީގައި ތަރައްގީ ހޯދުމަށް އިންޑިއާއިން ދޭ އަހައްމިއްޔަތުކަން ވަނީ ހާމަކުރައްވާފައެވެ.

އިންޑިއާ އާއި ފަރަންސޭސިވިލާތުން ފާހަގަކުރާ 'އިނޮވޭޝަންގެ އަހަރު' ގެ ތެރެއިން ބާއްވާ 'ބާރަތު އިނޮވޭޓްސް' އިވެންޓަކީ ދެ ގައުމުގެ ދެމެދުގައި އޮންނަ އިގްތިސާދީ އަދި ސްޓްރެޓީޖިކް ގުޅުން އިތުރަށް ބަދަހިވަމުން އަންނަކަން ރަމްޒުކޮށްދޭ މުހިންމު ހަރަކާތެކެވެ.