2100  ހައުސިން ޔުނިޓް ތަރައްގީކޮށްދޭނެ ބަޔަކު ހޯދަނީ

13 ރަށެއްގައި 2100 ހައުސިން ޔުނިޓް ތަރައްގީކޮށްދޭނެ ބަޔަކު ހޯދުމަށް ހުޅުވާލައިފިއެވެ.

Ads by FSM

ހައުސިން މިނިސްޓްރީ އިން ކުރި އިއުލާނުގައި ބުނެފައިވާ ގޮތުގައި މިއީ ޕަބްލިކް ޕްރައިވެޓް ޕާޓްނާޝިޕް (ޕީޕީއީ) މޮޑެލްގެ ދަށުން 13 ރަށެއްގައި ގާއިމްކުރުމަށް ހަމަޖެހިފައިވާ 2100 ހައުސިން ޔުނިޓެވެ. މި މަޝްރޫއުއަށް ޕްރޮޕޯސަލް ހުށަހެޅުމުގެ ދައުވަތުދީފައިވަނީ އޮގަސްޓު މަހުގެ 17 ވަނަ ދުވަހުގެ މެންދުރުފަހު 1 ގެ ނިޔަލަށެވެ. އަދި މި  މަޝްރޫއުގެ ދަށުން އަޅަން ޖެހެނީ، ތިރީގައި ޕާކްކުރެވޭނެ ޖާގަ އާއި ވިޔަފާރިކުރެވޭނެ ޖާގަ ހިމެނޭ ގޮތަށް ތިން ކޮޓަރީގެ އެޕާޓްމަންޓްތަކެއް ކަމަށް ވެސް ބުނެފައިވެއެވެ.

މި މަޝްރޫއުގައި ހައުސިން ޔުނިޓް އެޅުމަށް ހަމަޖެހިފައިވާ ރަށްތަކާއި އެޅުމަށް ހަމަޖެހިފައިވާ ހައުސިން ޔުނިޓްތަކުގެ އަދަދުތަކަކީ:

• ހއ. ހޯރަފުށި - 100 ހައުސިން ޔުނިޓް
• ރ. އުނގޫފާރު - 100 ހައުސިން ޔުނިޓް
• ބ. ތުޅާދޫ - 50 ހައުސިން ޔުނިޓް
• ޅ. ނައިފަރު - 300 ހައުސިން ޔުނިޓް
• މ. މުލި - 100 ހައުސިން ޔުނިޓް
• ދ. މީދޫ - 100 ހައުސިން ޔުނިޓް
• ލ. ގަން - 200 ހައުސިން ޔުނިޓް
• ގދ. ތިނަދޫ - 300 ހައުސިން ޔުނިޓް
• ފުވައްމުލައް - 300 ހައުސިން ޔުނިޓް
• އައްޑޫ ހިތަދޫ - 300 ހައުސިން ޔުނިޓް
• އައްޑޫ ފޭދޫ - 200 ހައުސިން ޔުނިޓް
• އައްޑޫ މަރަދޫފޭދޫ - 25 ހައުސިން ޔުނިޓް
•  އައްޑޫ މަރަދޫ - 25 ހައުސިން ޔުނިޓް

ހައުސިން މިނިސްޓްރީ އިން ކުރި އިއުލާނުގައި ބުނެފައިވަނީ މި ކަމަށް އެދި ހުށަހެޅޭނީ 100 އިންސައްތަ ދިވެހިންގެ ހިއްސާ އޮންނަ ރާއްޖޭގައި ރަޖިސްޓްރީކޮށްފައިވާ ޖަމިއްޔާ ޖަމާއަތްތަކުގެ އިތުރުން ކުންފުނިތައް ނުވަތަ ކޮންސޯޓިއަމްތަކަށެވެ. އަދި މި މި މަޝްރޫއަކީ އަގުހެޔޮ ބޯހިޔާވަހިކަން ހޯދައިދިނުމަށާއި ރޭވުންތެރިކަމާ އެކު ރަށްވެހިކަން ތަރައްގީކުރުމަށާ އަދި ދިވެހި ރައްޔިތުންގެ ދިރިއުޅުމުގެ ފެންވަރު މަތިކުރުމަށް ސަރުކާރުން ކުރަމުންދާ މަސައްކަތްތަކުގެ ބައެއް ކަމަށް ވެސް އެ މިނިސްޓްރީ އިން ބުނެފައިވެއެވެ.

މީގެ އިތުރުން އެ މިނިސްޓްރީ އިން ބުނީ ފްލެޓްތައް ހެދުމަށް ފައިސާ ހަމަޖައްސަން ޖެެހެނީ މަޝްރޫއު ހަވާލުކުރެވޭ ޑިވެލޮޕަރު ނުވަތަ ކުންފުނިން ކަމަށާއި ފްލެޓްތައް އެޅުމަށް ފަހު ކުންފުންޏަށް ފްލެޓްތައް ވިއްކޭ އިރު ގިނަ ފްލެޓްތައް އަގުހެޔޮކުރުމަށް ލާޒިމުކޮށްފައިވާ ކަމަށް ވެސް ބުނެފައިވެއެވެ. އެގޮތުން އަޅާ ފްލެޓްތަކުގެ 60 އިންސައްތަ ވާންޖެހޭނީ އަގުހެޔޮ ފްލެޓްތަކަށް ކަމަށާއި މި ފްލެޓްތަކުގެ އެންމެ ކުޑަ ބޮޑުމިނަކީ 900 އަކުފޫޓު ކަމަށް ވެސް ކަނޑައަޅާފައިވާ ކަމަށް ވެސް ބުނެފައިވެއެވެ. އަދި މި ފްލެޓްތައް ވިއްކޭނެ އެންމެ ބޯޑު އަގަކީ 1.5 މިލިއަން ރުފިޔާ ކަމަށާއި ކަނޑައެޅިފައިވާ އެންމެ މަތީ އަގަށް ވުރެ ހެޔޮ އަގެއް ހުށަހެޅިދާނެ ކަމަށް ވެސް އެ މިނިސްޓްރީ އިން ބުނެފައިވެއެވެ.