Sunday, 15 November 2026
Advertisement
STO — McCoy (leaderboard)
ޚަބަރު

ކުޅިވަރު ނޫސްވެރިޔާ ސާއިދުއަށް އައިސީޔޫގައި ފަރުވާދެނީ، އާއިލާއިން އެދެނީ ހެޔޮ ދުޢާއަށް

ކުޅިވަރު ނޫސްވެރިޔާ ސާއިދުއަށް އައިސީޔޫގައި ފަރުވާދެނީ، އާއިލާއިން އެދެނީ ހެޔޮ ދުޢާއަށް

ދައުލަތުގެ މީޑިއާ (ޕީއެސްއެމް) ގައި މަސައްކަތްކުރަމުން އަންނަ ތަޖުރިބާކާރު ކުޅިވަރު ނޫސްވެރިޔާ ސާއިދު އަޙްމަދުގެ ޞިއްޙީ ޙާލަތު ކުއްލިއަކަށް ގޯސްވެ ސަބަބުން، މިއަދު ހެނދުނު އިންދިރާ ގާނދީ މެމޯރިއަލް ހޮސްޕިޓަލް (އައިޖީއެމްއެޗް) ގެ އިންޓެންސިވް ކެއަރ ޔުނިޓް (އައިސީޔޫ) އަށް ބަދަލުކޮށް ފަރުވާދޭން ފަށައިފިއެވެ.

ގިނަ ދުވަސްތަކެއް ވަންދެން ކިޑްނީގެ ބައްޔަށް ފަރުވާ ހޯދަމުން އަންނަ ސާއިދުގެ ޙާލު ދެރަވެފައި ވަނީ، އިތުރު ފަރުވާއަށް ރާއްޖެއިން ބޭރަށް ފުރުމަށް ތައްޔާރުވަމުން ދަނިކޮށެވެ. އާސަންދަ ސްކީމްގެ ދަށުން ބޭސްފަރުވާ ކުރުމަށްޓަކައި، މި ހިނގާ މަހުގެ 13ވަނަ ދުވަހު ސްރީލަންކާއަށް ފުރުމަށް ބޭނުންވާ އެންމެހާ އިންތިޒާމުތައް އޮތީ ކުރިން ހަމަޖެހިފައެވެ.

ސާއިދުގެ ދެ ކިޑްނީ ފެއިލްވެފައިވާކަން ދެނެގަނެވުނީ 2018ވަނަ އަހަރުގެ ޖޫން މަހުގެ ތެރޭގައެވެ. ބަލި ދެނެގަނެވުނު އިރު އޭނާގެ ކިޑްނީ މަސައްކަތްކުރަނީ ގާތްގަނޑަކަށް ތޭރަ އިންސައްތައިގައެވެ. އޭގެ ފަހުން އޭނާ އަންނަނީ ގަވާއިދުން ޑަޔަލަސިސް ހަދަމުންނެވެ. އަދި އާއިލާއާއި ރައްޓެހިންގެ އިތުރުން ހެޔޮއެދޭ ފަރާތްތަކުގެ އެހީތެރިކަމާ އެކު، ކިޑްނީ ބަދަލުކުރުމަށްޓަކައި ޑޯނަރެއް ހޯދުމުގެ މަސައްކަތް ވެސް އޭނާ ދިޔައީ ކުރަމުންނެވެ.

Advertisement
Allied — Dhen Online (box)

ޞިއްޙީ ގޮތުން ބޮޑެތި ގޮންޖެހުންތަކަކާ ކުރިމަތިލަމުންދިޔަ ނަމަވެސް، ސާއިދަކީ ވަޒީފާއަށް ނުހަނު ކަމޭހިތާ މުރާލި މުވައްޒަފެކެވެ. ޕީއެސްއެމްގެ ނިއުސް އެޑިޓަރެއްގެ މަޤާމުގައި ހުރެ، ކުޅިވަރު ޑެސްކް ބެލެހެއްޓުމުގެ މުހިންމު ޒިންމާ އޭނާ އައީ އަދާކުރަމުންނެވެ. 2009ވަނަ އަހަރު ނޫސްވެރިކަމުގެ ތެރެއަށް ވަން ސާއިދަކީ، ކުޅިވަރު މުބާރާތްތަކުގެ ކޮމެންޓްރީ ގެނެސްދިނުމާއި ޕްރޮގްރާމްތައް ހުށަހެޅުމުގައި އާންމުންގެ ބޮޑު މަޤުބޫލުކަމެއް ހޯދާފައިވާ ހުނަރުވެރިއެކެވެ. ދިވެހި ކުޅިވަރު އާއިލާގެ އިޙުތިރާމާއި ލޯބި ހޯދާފައިވާ ސާއިދަށް އަވަސް ޝިފާއަކަށް އެދި، އޭނާގެ އާއިލާއާއި އެކުވެރިން އެދެނީ އެންމެހާ ރައްޔިތުންގެ ހެޔޮ ދުޢާއަށެވެ.

ރިއެކްޝަން

Advertisement
Ooredoo — Square (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.