މީހަކަށް ދެރައެއް ދީފައި އުފަލުގައި އުޅެވޭނެތަ؟
އެކަކު އަނެކަކު ލޯބީގައި ދީވާނާވެ، އެ ލޯތްބަކީ ތިމާގެ މުޅި ދިރިއުޅުން ހަފުސް ކޮށްލާ ނުރައްކާތެރި ހަތިޔާރަކަށް ވަނީ ވެފައެވެ. މިހެންވެ މި ސަބަބަށްޓަކައި ލޯބިވުމަށް ޖެހިލުން ވެސް ވެއެވެ. އެހެންނަމަވެސް ލޯތްބަކީ ގަސްދުގައި ކުރާ ކަމެއް ނޫނެވެ. އެއީ ބޭއިޚުތިޔާރުގައި ވެވޭ އެއްޗެކެވެ. އެހެނަސް މުޅި ޙަޔާތް ނެތި ކޮށްލަނިވި ނުބައި ހަތިޔާރަކަށް ވެސް ލޯބި ބަދަލުވާކަށް ސުކުންތެއް ވެސް ނުނަގާނެއެވެ.
ލޯބިން އެކު އެކީގައި ވަގުތުތައް ހޭދަ ކުރަމުން އަންނަ ދެ ލޯބިވެރިންގެ ލޯތްބަށް ނުބައި ނުލަފާ ވިހަގަދަ ހަރުފައެއް އަންނާނީ ކޮން އިރަކު ކަމެއް އެއްވެސް މީހަކަށް ނޭނގޭނެއެވެ. އެހެންވެ މީހުންގެ ނުބައި އެސްފީނާ ޖެހިދާނޭ ބުނާ އަޑުވެސް އަހަމުއެވެ. އެހެންނަމަވެސް މިހާ އަވަހަށް މިފަދަ ކަމެއް ވާނެއެކޭ ދުވަހަކު ވެސް މީހަކު ހިތައް އަރާނެ ހެއްޔެވެ؟
ކުރީގައި އުފާކޮށް، ހީސަމާސާ ކޮށް އުޅުނު ދެ ލޯބިވެރިންގެ ދޭތެރޭގައި ޖެހޭ މައްސަލަތައް ގިނަވެއެވެ. އުފާވެރި ދެ ލޯބިވެރިންގެ ދޭތެރެއަށް ތިންވަނަ މީހަކު އައިސް އެ އުފާތައް ތިމާއަތުން ނިގުޅައިގަތުމަކީ ހާދަހާ ލާއިންސާނީ ޢަމަލެކެވެ. އަދި ދަންނަވަންތޯއެވެ؟ މީގައި އެންމެ ހިތަށް އަސަރު ކުރާނީ ކައިރީގައި ހީސަމާސާ ކޮށް ހަދާ ގާތް ރަޙުމަތްތެރިޔާ މިފަދަބޮޑު “ދޯކާ” އެއް ދިނުމުންނެވެ.
ދިވެހި ޅެމެއްގެ ބަސްކޮޅެއް ހަނދާން ކޮށްލަމާތޯއެވެ. “ އެންމެ ކައިރީގައި ހީފާ އުޅޭ ރައްޓެހިން، ވާނޭ ފަހުން ބޭވަފާ” އާދެ ވަރަށް ވެސް ބޮޑު ހަގީގަތެކެވެ. ކާންދޭ އަތުގައި ދަތް އެޅުމަކީ ހަމަ އާންމު ކަމަކީއެވެ. މިފަދަ ކަމެއްގެ ހިތި ރަހަ ލިބިފައިވާ މީހަކަށް މިއީ ކިހާ ވަރެއްގެ ކަމެއް ކަން ވިސްނޭނެއެވެ. ހަނދާނުން ފޮހެލަން ދަތިވާނެއެވެ. ދެކޮޅުންވެސް ކެއީތާއެވެ. އެންމެ ގާތް ރަޙުމަތްތެރިޔާވެސް ގެއްލުނީއެވެ. ނުވީތާކަށް އެހާ ލޯބިން އުޅުނު ލޯބިވެރިޔާ ވެސް ގެއްލުނީއެވެ.
އެހެންނަމަވެސް މާތް الله ދެރަ ގޮތެއް އިރާދަ ނުކުރައްވާނެއެވެ. ކޮންމެވެސް ރަނގަޅު ގޮތެއް ވާން އޮތީ ކަމަށްވެސް ވެދާނެއެވެ. ކާންދިން އަތުގައި ދަތްއަޅައި، އެ ޖަހައިގަތީ ތެޔޮނާށްޓެވެ. އެހެންނަމަވެސް ތެޔޮ ނާށި ޖަހައިގަތުމަށްފަހު އުފަލުގައި އުޅެވޭނޭ ހީކުރަނީތާއެވެ. އެއީ ކުށް ހީއެކެވެ. އެތައް ބައެއްގެ ކުރިމަތީގައި އޭނަގެ އަބުރު އެކަތިލެވުނީ އޭނާ އަމިއްލައަށެވެ. އެތައް ބައެއްގެ ނުރުހޭ ބަސްތަކެއް ރައްދު ވާނީ ވެސް ހަމަ އޭނާއަށެވެ.
އެންމެ ކައިރީގައި ގެންގުޅޭ ރައްޓެހިން މިފަދައިން ކަންތައް ކުރުމުން ރައްޓެހިންނަށް ކުރާ އިތުބާރު ގެއްލެއެވެ. ގުޅުން ކަނޑާލަން ކިތަންމެ ބޭނުން ނުވި ކަމުގައި ވީ ނަމަވެސް ގުޅުން ކަނޑާލަން މަޖުބޫރުވާނެއެވެ. ގުޅުން ކަނޑާ ނުލި ކަމުގައި ވީނަމަވެސް ކުރީގައި އެ އުޅުނު މަޖާ، ގާތް ކަމެއް ހަމަހިލާ ދެން ނޯންނާނެއެވެ. ހިތް ކިތަންމެ ހެޔޮ ކުރަން ބޭނުން ވިޔަސް އުނދަގުވާނެއެވެ.
މަޑު މަޑުން އޭނައަށް ކަންތައް ކުރެވުނީ ރަނގަޅަށް ނޫންކަން އޭނާ އަމިއްލައަށް ވިސްނެންވެސް ފަށާނެއެވެ. މަޢާފަށް އެދި އާދޭސް ކުރާނެއެވެ. ކަންކުރެވުނު ގޮތާއިމެދު ލަދުވެސް ގަންނާނެއެވެ. އެހެންނަމަވެސް ވަގުތު ފާއިތު ވެއްޖެއެވެ. ކުރެވުނު އިތުބާރު ވެއްޔާ މޮޑެވި، އަނބުރާ އެ ގުޅުން ގެންނަން ނުކުޅަދާނަ ވާނެއެވެ. މަޢާފު ކުރެވިދާނެއެވެ. ގެއްލިއްޖެ ވަގުތަކީ އަނބުރާ ލިބޭނެ އެއްޗެއް ނޫނޭ ބުނާ އަޑުހަމެވެ. އިތުބާރަކީ ވެސް ހަމަ މިފަދަ އެއްޗެކެވެ. ގެއްލިއްޖެ އިތުބާރެއް އަލުން އެމީހަކާއި ދޭތެރޭ އުފައްދަން ޖެހިލުން ވާނެއެވެ.
އެއްފުޅަށް މަތިން ފުންމާލީ ބަކަރި އަނެއް ފުޅަށް މަތިންވެސް ފުންމާނެއެވެ. އެހެންވީމާ އެއްވެސް ޙާލެއްގައި މީހަކަށް ދެރައެއް ދީފައި ތިމާއަށް އުފަލުގައި އުޅެވޭނޭ ހީނުކުރައްޗެވެ.
