11 ތަނެއް ބަލައި ފާސްކޮށް، 5 ބިދޭސީއަކު އަތުލައިގަނެފި
ގަވާއިދާ ޚިލާފަށް ރާއްޖޭގައި އުޅެމުންދާ ބިދޭސީން ހޯދުމަށް ކަމާބެހޭ އިދާރާތައް ގުޅިގެން އެކުލަވާލާފައިވާ ޓާސްކް ފޯސްއިން އިއްޔެ ކުރިއަށްގެންދިޔަ ޚާއްޞަ ރެއިޑް އޮޕަރޭޝަނެއްގައި 11 ތަނެއް ބަލައި ފާސްކޮށް، ގަވާއިދާ ޚިލާފަށް އުޅެމުންދިޔަ 5 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.
މޯލްޑިވްސް އިމިގްރޭޝަނުން މަޢުލޫމާތު ދީފައިވާ ގޮތުގައި، މި އޮޕަރޭޝަން މައިގަނޑު ގޮތެއްގައި އަމާޒުކޮށްފައި ވަނީ އެކި ބާވަތުގެ ވިޔަފާރިތައް ހިންގާ ތަންތަނަށެވެ. އޭގެ ތެރޭގައި ސެލޫންތަކާއި، ގަރާޖުތަކާއި، މުދާ ރައްކާކުރާ ގުދަންތަކުގެ އިތުރުން ފައިސާ މާރުކުރާ ތަންތަނާއި ކުދި އެހެނިހެން ވިޔަފާރިތައް ހިންގާ ތަންތަން ހިމެނެއެވެ.
މާލޭގެ އެކި ސަރަޙައްދުތަކުގައި ހިންގި މި އޮޕަރޭޝަނުގައި ޖުމްލަ 42 ބިދޭސީއެއްގެ މަޢުލޫމާތު ވަނީ ސާފުކޮށްފައެވެ. އަދި އޭގެ ތެރެއިން އިމިގްރޭޝަންގެ ޤާނޫނާއި ގަވާއިދުތަކާ ޚިލާފުވެފައިވާކަމަށް ފާހަގަކުރެވުނު 5 ބިދޭސީއަކު، އިތުރަށް ބަލަންޖެހޭ ކަންކަން (ސެކަންޑަރީ ވެރިފިކޭޝަން) ފުރިހަމަކުރުމަށް ފަހު ވަނީ އެއިދާރާގެ ބެލުމުގެ ދަށަށް ގެންގޮސްފައެވެ.
