އެކްސްޕޯޓުކުރާ މަސް ބޭރުގެ ބާޒާރުތަކުން ރިޖެކްޓުވާ މައްސަލަ ހައްލުކުރެވިއްޖެ: ވަޒީރު ޝިޔާމް

މިފްކޯއިން ރާއްޖެއިން ބޭރަށް އެކްސްޕޯޓުކުރާ ރޯމަހުގެ ބޮޑު އިންސައްތައެއް ބޭރުގެ މާކެޓުތަކަށް ފޯރުމުން ބަލައިނުގަނެ ރިޖެކްޓުވާ މައްސަލަ، މުދާ ބަރުކުރާ ބަނދަރުން އިންސްޕެކްޓުކުރާ ގޮތަށް އުސޫލު ބަދަލުކޮށްގެން ސަރުކާރުން ހައްލުކޮށްފިކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމު ވިދާޅުވެއްޖެއެވެ.

"އަހާ" ފޯރަމްގައި ވާހަކަފުޅުދައްކަވަމުން ވަޒީރު ފާހަގަކުރެއްވި ގޮތުގައި، މީގެ ކުރިން ރާއްޖެއިން ބޭރުކުރާ ޝިޕްމަންޓްތަކުގެ 10 ނުވަތަ 12 އިންސައްތަ މަސް ރިޖެކްޓުވަމުން ދިޔައެވެ. ނަމަވެސް، މިފްކޯގެ އޮޕަރޭޝަންތައް ހަރުދަނާކޮށް މިހާރު ގެނެވިފައިވާ ބަދަލާ އެކު، ގަންނަ ފަރާތުން ކޮލިޓީ ޗެކްކުރުމުގެ އެންމެހައި ކަންކަން ކުރިއަށްގެންދާނީ ރާއްޖޭގެ ބަނދަރުތަކުގައި ބޯޓަށް މަސް އަރުވާ ވަގުތުގައެވެ. މިކަމުގެ ސަބަބުން، ކަނޑުމަގުން ދިގު ދަތުރެއް ކުރުމަށް ފަހު މަންޒިލަށް ފޯރުމުން މުދާ ބަލައިނުގަތުމުގެ ފުރުސަތު އެއްކޮށް ބަންދުވެ، ރިޖެކްޓުކުރާނަމަ އެކަން ކުރާނީ ރާއްޖޭގައި ކަމުގެ ޔަޤީންކަން އެ މަނިކުފާނު ދެއްވިއެވެ.

މި މައްސަލައަކީ ވަރަށް ފުޅާކޮށް އޮޕަރޭޓުކުރަމުންދިޔަ ބާރުގަދަ ނެޓްވޯކްތަކަކާ ގުޅިފައިވާ، އަދި ބުއްދިއަށް ޤަބޫލުކުރަން ދަތި ކަންތައްތަކެއް ހިމެނޭ ޒަމާންވީ މައްސަލައެއްކަން ޝިޔާމު ހާމަކުރެއްވިއެވެ. މިފަދަ މޫލާފައިވާ ނުބައި އާދަތައް ނައްތާލައި، އެކަމުގައި ޝާމިލުވާ ފަރާތްތަކުގެ ނެޓްވޯކްތައް ރޫޅާލުމަކީ ވަގުތު ނަގާނެ ކަމެއް ކަމަށާއި، މި ކާމިޔާބީ ހާސިލުކުރެވުނީ ސަރުކާރުން ސާބިތުކަމާ އެކު ކުރި މަސައްކަތުންކަން ވަޒީރު ވަނީ ފާހަގަކުރައްވާފައެވެ.

މަސްވެރިކަމުގެ ސިނާއަތުގައި ދައުލަތުގެ ކުންފުނީގެ ދައުރު ބޮޑުވި ނަމަވެސް، މި ސަރުކާރުގެ އަމާޒަކީ އަމިއްލަ ކުންފުނިތަކަށް ވެސް ފަހި މާހައުލެއް ގާއިމުކޮށްދީ މުޅި ސިނާއަތް ކުރިއެރުވުން ކަމުގައި ވަޒީރު ވިދާޅުވިއެވެ. ނިމިދިޔަ ސަރުކާރުން ކުއްލިއަކަށް މަހުގެ އަގު އުފުލުމުގެ ސަބަބުން އަމިއްލަ ވިޔަފާރިތަކަށް ބޮޑެތި ގެއްލުންތަކަކާ ކުރިމަތިލާންޖެހުނުކަން ފާހަގަކުރައްވައި، އެ މަނިކުފާނު ވިދާޅުވީ މިހާރު ކަމާގުޅޭ ހުރިހާ ފަރާތްތަކެއް ގުޅިގެން ކުރެވެމުންދާ މަސައްކަތްތަކުގެ އަލީގައި މުޅި ސިނާއަތަށް އާ ދިރުމެއް ލިބެމުން އަންނަ ކަމަށެވެ.