ހަށިގަނޑުގައި ރައްކާކޮށްގެން ޑްރަގު އެތެރެކުރަން އުޅުނު ދެ މީހަކު ހައްޔަރަށް

ހަށިގަނޑުގައި ރައްކާކޮށްގެން ރާއްޖެއަށް މަސްތުވާތަކެތި އެތެރެކޮށް ސްމަގަލްކޮށް އެ ތަކެތި ޓްރެފިކްކުރާ ކަމަށް ތުހުމަތުކުރެވޭ މައްސަލައާ ގުޅިގެން ދެ މީހުން ހައްޔަރުކޮށްފިއެވެ.

ފުލުހުންގެ ޚިދުމަތުން ބުނީ، މި މައްސަލައާ ގުޅިގެން ހައްޔަރުކޮށްފައި ވަނީ ނިއްކަ ތަމަންގް (47އ)އާއި، އީތްރާނީ ގަލެ (40އ) ކަމަށެވެ. މި ދެ މީހުންނަކީ ވެސް ނޭޕާލް މީހުންނެވެ. މި ދެ މީހުން ހައްޔަރުކޮށްފައި ވަނީ އެ މީހުން ރާއްޖެއައި އިރު ހަށިގަނޑުގައި މަސްތުވާތަކެތި ރައްކާކޮށްފައި ހުރިކަމަށް  ތުހުމަތުކުރެވޭ މައްސަލައާ ގުޅިންނެވެ.

މޯލްޑިވްސް ކަސްޓަމްސް ސާވިސްއިން އެ މީހުން ފުލުހުންނާ ހަވާލުކުރުމުން ޑްރަގް އެންފޯސްމަންޓުން އެ މީހުން ހައްޔަރުކޮށްފައި ވަނީ މި މަހު 25ވަނަ ދުވަހުއެވެ. އެ ދެ މީހުން ހައްޔަރުކޮށް ބަލައިފާސްކުރިއިރު 142 ބުލެޓް ފެނިފައިވާ ކަމަށާއި މި ތަކެތީގެ ވަގުތީ ބަރުދަން 1.5 ކިލޯއަށްވުރެ ގިނަވާނެ ކަމަށް ފުލުހުން މައުލޫމާތުދެއެވެ.

މި މައްސަލައާ ގުޅިގެން ހައްޔަރުކުރި މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން 30 ދުވަހަށް ބަންދުކުރުމަށް އަމުރުކޮށްފައިވެއެވެ.

މި މައްސަލަ ފުލުހުން ދަނީ ތަހުގީގުކުރަމުންނެވެ.